‏ Job 11

Цопаарай Иоовто хандаһан үгэ

1Наамаан обогой Цопаар хэлэбэ:

2– Мянга түмэн үгэдэш харюу үгэхэнь зүб. Олон үгэтэй хүн зүб гээд бусадай ама таглаха хэрэггүй. 3Ши хэндэш зэмэлүүлэнгүй, Эзэниие торгоохо гэжэ бодобол эндүүрнэш. 4Үнэн һургаалытнай батаар дахадаг ушарһаа Танай урда гэмгүйб гэжэ хэлээш. 5Тэрэнэйш түлөө Бурхан эрид буруушааха ёһотой. 6Шамда харюусаа һаа, мэргэн ухаанай нюусануудые Тэрэ нээгээд үгэхэ һэн. Тэрэнэй оюун ухаанда хизаар байхагүй. Шинии гэмэй ехэ хубиие хэлээгүй гэжэ мэдэ.

7Ши өөрөө Бурханай гүн ухаае, Хамагые баригша Түгэс Хүсэтын хизаарые оложо шадаха гүш? 8Тэнгэри мэтэ хизааргүй Тэрэнэй үндэртэ хүрэжэ шадаха гүш? Үхэлһөө гүнзэгы бодолыень түгэс ойлгожо шадаха гүш? 9Түби дэлхэйһээ, тэнгис далайһаа үргэн ехэ ухаандань ши хэрхэн хүрэхэбши? 10Хэрбээ Тэрэ шамайе хорижо шиидхэхэ гэбэлнь хэн зогсоожо шадахаб? 11Хуурмаг хүниие тэрэ ядахагүй танидаг, хүн бүхэнэй гэм Тэрэнэй нюдэндэ эли. 12Харин зэрлиг элжэгэнһээ хүнэй түрэхэнь шам мэтын тэнэгэй ухаатай бологшоһоо хилбархан.

13Ши нүгэлөө наманшалжа, үршөөл хайра Тэрээнһээ гуйгаад, 14хожомынь гэм үйлдэхэеэ болииш. Бишыханшье бурууһаа һалаха гэжэ оролдо. Нүгэлһөө зайлажа, майхангуудтаа хорон муугай оршон усадхабал, 15толгойгоо дээшэнь үргэжэ үнэхөөр шадаха, айха эшэхын үндэһэгүй болохош. 16Зоболоншни бүримүһэн мартагдажа, голой уһанай урдан үнгэрһэн мэтэ һанагдахал. 17Амидаралшни үдын наран мэтэ гэрэлтэжэ, харанхы соо үүр сайһан мэтэ болохо. 18Тиин этигэл найдабари бии боложо, сэдьхэл амарха. Эрьен тойрогшоо хараад, ши айха юумэгүй амар унтахаш. 19Иигэжэ һайн һуухышни хүнүүд хараад, хүндэлэн туһаламжа эридэг болохо. 20Харин муу этэгээд тэрэ үедэ хэсүү байдалһаа гараха аргагүйгөө мэдээд, сэдьхэлээ муудажа, тэдэнэй гансал найдаха юумэн үхэлэй урда дүүрэн сээжээр ами абахань лэ үлөө.
Copyright information for BxrBBL2024