‏ Job 12

Иоовой Цопаарта үгэһэн түрүүшын харюу

1Иоов харюу үгэбэ:

2– Дэлхэйдэ гансал таанар ухаатай юм гүт? Таанарай наһа барахада хүн түрэлтэн ухаагаар дутаха гү? 3Харин би таанарһаа дутуугүй алибаа юумэ ойлгоноб. Энэ мэтые хэн мэдэдэггүй юм? 4Танил талануудай наада зугаада би оронхойб. Урдань би Бурханһаа гуйлтадаа харюу абадаг бэлэйб. Мүнөө гэм хээгүй, үнэн шударга би бултанай доро болоо хэбэртэйб. 5Зоболон үзөөгүй сагтаа таанар зобоһон хүниие наадалжал шаданат. 6Үнэн шударга минии зобожо байхада дээрмэшэн этэгээдүүд баяжажа, Бурханиие тоодоггүй зон амар һууна. Тэдэ өөрын хүсэ шадалые бурхан болгон үргэмжэлнэ.

7– 8Ан араатан, жэгүүртэн, загаһа жараахайһаа, газар дэлхэйһээ асуугаад үзыш! 9Тэдэ нэгэл юумэ баталан хэлэхэ. Хорбоо юртэмсын хуули гурим Эзэн зохёогоо гэжэ тэдэ мэдэнэ. 10Амитан бүриин амидарал, хүнэй ами наһан Тэрэнэйл гарта байна. 11Харин эдэ бүгэдэ таанарта хамаагүй. Аманшни амтан хоолдо дуратайдал адли шэхэншни дэмы үгэ соносохо дуратай.

12– 13Үндэр наһатан уужам мэргэн ухаантайшье гэгдээ һаа, Эзэндэл оюун ухаан, хүсэ шадал түгэс байдаг. 14Тэрэнэй усадхаһаниие хэншье дахин бодхоожо шадахагүй. Тэрэнэй хааһаниие хэншье сүлөөлжэ шадахагүй. 15Тэрэнэй уһа тогтоохо гэбэл, ган болохонь зайлашагүй, уһа табибалнь дэлхэй дүүргэхэ. 16Хэмжээгүй ехэ хүсөөрөө хамагые Тэрэ диилэжэ шадаха, мэхэлэгдэһэн ба мэхэлһэн хүнүүд барандаа Тэрэнэй гарта ородог. 17Түшэмэл ноёдые гар хооһоор ябуулжа, шүүгшэдэй мунхагые харуулан тушаалһаань үлдэжэ болохо. 18Хаад ноёдые шэрээһээнь буулган, шорондо оруулжа шадана. 19Һүмын санаартад, изагуур ехэтэн Тэрэнэй хүсэһэн сагта доошоо бууна. 20Ухаатай түшэмэд хэлэхэ үгэгүй боложо, сэсэн үбгэд хүгшэд дэмы гайхан хосорно. 21Хэргэм зэргэтэйшүүл зоной наадан болоно, хүсэтэн хүсэһэн сагтань доройтоно. 22Хамагай далда зүйл эли болгожо, гүн харанхые гэрэлдэ абажа ерэдэг. 23Зарим улас үндэһэтэниие хүсэтэй болгожо, нүгөөдүүлынь нураан унагаадаг. Зарим уласай газарынь үргэдхэнэ, зариманай газар буляан абадаг. 24Арад олоной ударидагшад ушараа олохоо болижо, сүл губида харгыгаа төөрижэ жолоогоо алдана. 25Иигэжэ Эзэнһээ боложо, тэдэ харанхыда тэмтэрэн, һогтуу хүн мэтэ гуйбажа ябадаг.
Copyright information for BxrBBL2024