‏ Job 13

1Эдэ бүгэдые би нюдөөрөө хаража, шэхээрээ шагнааб. 2Би таанарай мэдэхэ юумэ хуу мэдэнэм. 3Гэбэшье намда маргаха хэрэг байхагүй. Би Түгэс Хүсэтэ Эзэнтэй ярилсахые хүсэжэ байнам. Тэрээнтэй арсалдаха дуран хүрэнэ. 4Таанарай һанаанһаа баалажа зохёоһон үгэ эмээ мэдэхэгүй эмшэнэй үгэһэн эм шэнги. 5Иимэһээ амаа татан дуугай шарайлхадаа, таанар хүнэй нюдэндэ ухаатай харагдажа магадгүйт.

6Минии сэдьхэл ойлгожо, хүсэл бодолыем мэдэжэ абагты. 7Эзэнэй түлөө худалаар хэлэхэ ямар хэрэг байгаа юм, Эзэндэ танай хуурмаг хэрэгтэй юм гү? 8Тэрэнэй талые бариһан аад, зорёолхоно гүт? Бурханай түлөө тэмсэхэ гээ гүт? 9Тэрээгээр шалгуулбал, буруугүй гаража шадаха гүт? Хүниие мэхэлһэн шэнгеэр Тэрэниие мэхэлжэ шадаха гүт? 10– 11Хэрбээ таанар нюусаар нэгэнэйнь тала барижа, үнэн бэшээр шүүбэл, Тэрээнһээ шиидхэл абажа, гайхамшагта хүсыень хараад, айн һүрдэхэт. 12Һургаалайтнай үгэнүүд һалхинда хиидэхэ үнэһэн мэтэ. Баталһан тогтоолтнай шабар хэрэм мэтэ хэбрэг. 13Амаа хаажа, минии хэлэхэ ээлжээ үгэгты. Удаань болохо юумэн болуужаг.

14Үхэлшье намда хамаагүй. Үхэлһөө зугадаха хэрэг намда үгы. 15Амиием абаашье һаань, этигэһэн хэбээрээл байхаб. Ямаршье һаа, би Тэрэнэй үмэнэ ошоод, өөрыгөө хамгаалхаб. 16Бурхангүй хүнүүд Тэрэнэй урда ошожо шадахагүй, би урдань ошобол – абарал олохоб. 17Минии үгэ анхаралтай шагнагты. 18Би мүнөө хэрэг шүүлгын газарта Тэрэнэй урда ошоод өөрыгөө үмэглэхөөр бэлэн байнам. Гэмтэй бэшэеэ би батаар мэдэнэм.

19Эзэн минии, хэн нэгэнэй минии бурууе гэршэлжэ шадабал, би үгэ дуугүй үхэхөөр бэлэнби. 20Хоёрхон лэ юумэ гуйха һанаатайб. Гуйлтыем зүбшөөбэл, Та намтай уулзан хөөрэлдэхэт. 21Өөрын мутар намһаа холодуулжа, айлган шиидхэхэеэ болиит. 22Асууһан бүхэндэтнай би харюусахаб. Амаа нээхэ сүлөө үгэгты. Үгы гэбэл, минии һурахада, Та харюусагты. 23Танай урда би ямар гэмтэй гээшэбиб? Хамаг нүгэлыем нюултагүй хэлэгты.

24Юундэ өөрын нюур нюужа, намайе дайсан мэтээр үзэнэт? 25Танай урда минии бэе һалхинда хиидэхэ хамхуул, хатаһан набша мэтэ бишыхан бэшэ юм гү? Бишыхан намайе гартаа адхан иигэжэ тамалха ушар бии юм гү?

26Шиидхэлтнай хатуудажа байна. Эдир залуугай алдуу мүнөөдэрэй шиидхэлые хүндэ болгожо байна. 27Хүлыем гэнжэдэ уяжа, хэһэн юумыем нарин ажаглажа, гэшхэһэн мүрыем шалган үзэжэ байнат.

28Амидарал гээшэ табиһан хоол мэтэ муудажа, хадагалһан хубсаһан мэтэ хорхойдо эдюулжэ дууһадаг.