‏ Job 15

Элипаазай хоёрдохи үгэ

1Удаань Тэмаан хотын Элипааз Иоовто дахин хандажа хэлэбэ:

2– Зүүн зүгэй хуурай һалхяар дотороо дүүргэхые сэсэн хүн хүсэхэгүйл, тэрээндэ адли хооһон үгөөр харюу үгэхэнь хэн хэндэмнай ашаггүй бэшэ юм гү? 3Сэсэн хүн дэмы үгэ алдахагүй. 4Шинии хэлэһээр, Бурханиие хүндэлхэ хэрэггүй болоно. 5Харатай хүнүүд лэ иигэжэ дуугардаг, гэм гэмшэлһээ хулжахын тулада залитай үгэ хэлэжэ байнаш. 6Шамайе заатагүй буруудхаха гэнэгүйб. Хэлэһэн бүхы үгэшни шамайе элишэлжэ байна.

7Энэ дэлхэйдэ эгээл түрүүшын хүн ши юм гүш? Бурхан газарай нюруу бүтээхын урда шамайе бүтээгээ юм гү? 8Тэрэнэй бүхы нюусые ши мэдэнэ гүш? Хүнһөө үлүү сэсэн ухаанда хүртэбэ гүш? 9Бидэнһээ үлүү юу мэдэхэбши? 10Буурал үбгэд бидэнэй үгэ зүбшөөнэ. Тэрэ эсэгэһээш үндэр наһатай бшуу.

11Бурханай шамайе дүмэхэнь багадаа гү? Бидэнэй зөөлэн үгөөр хэлэһэмнай шамда дээрэ бэшэ гү? 12Ши юу һанаархаһандаа нюдэншни омогоор ялалзанаб? 13Юундэ уурлан, Бурханда муу үгэ хэлэнэш?

14Тэрэнэй урда хүнүүд арюун сэбэр байжа шадаха гү? Энэ дэлхэйдэ эхэнэрһээ түрэһэн хүн түгэс гэмгүй байжа шадахагүй. 15Эзэн бидэнһээ байтагай Өөрынгөө гэгээнүүдтэ бата найдадаггүй. Тэрэнэй урда юрэ бусын юртэмсэшье арюун бэшэ. 16Харин хүн гэжэ бузар амитанда найдалтай гү? Булагай уһанай гараһантай адли хүнэй гэм буруу таһархагүй.

17Иоов хэлэһэн үгэдэм анхара. Үзэһэн хараһанаа ярихамни. 18Урданай ухаантан мэргэдэй хэлэһэн үгэ бшуу даа. Үбгэдһөө тэдэ һуража, энэ болотор дамжуулаа. 19Урдын тэрэ сагта гадаадын ондоо омогтон үзэл бодолыень бузарлаагүй байгаа.

20Нүгэлтэй хүнүүд наһан соогоо зобожо, үргэлжэ аймшаг үзэнэ. Дарлагшын наһанай эсэс тэдээндэ мэдэгдэхэгүй. 21Хуряажа суглуулһан зөөринь дээрмэшэнэй гарта гэнтэ ороно. 22Хэһэн үйлэдөө тэнсүү шиидхэл абахаа тэдэ ойлгожо, гунигта бодолдо абтана. 23Мяхаша шубуунай үхэл хүлеэдэгтэл Эзэнэй шиидхэл буухые тэдэ мэдээд, 24дайнда бэлдэһэн хаан мэтэ айн һандарһаар амидаралаа үнгэргэнэ.

25Юундэб гэхэдэ, тэдэ энэ дэлхэйн Түгэс Хүсэтэ Бурханда бардам хандажа байна. 26Халхабша дуулга барин дайсан тээшэ зоригтой дабшаһан сэрэг мэтэ тэдэ эсэргүүсэн тэмсэнэ.

27Гэдэһэ садхаланһаа нюурынь мяхалиг, ташаа нюрганиинь өөхэлиг болонхой. 28Хото һууринуудынь хооһорон үгыржэ, 29хүрэнгэ зөөринь үригдэн барагдана. 30Тэрэнэй шиидхэлһээ тэдэ зайлажа шадахагүй, үхэлэй харанхыда орожо, галда шатаһан сусал мэтэ үгы болоно. Иигэжэ Тэрэнэй уур хилэнсэг тэдэниие усадхана. 31Нүгэлтэн хооһон найдалаар бэеэ бү мэхэлэг, эсэстээ юушьегүй үлэхэ. 32Сагһаа урид гэнтэ муудажа, ургажа байгаад хатаһан модон мэтэ болоно. Тиимэ модоной мүшэр дахин сэсэглэжэ шадахагүй. 33Түүхэй жэмэстэй мүшэрөө таһалуулһан уһан үзэмэй модон, эртэ үхэһэн алимай модон иимэ болодог. 34Нүгэлтэ зон һайн һайханиие үзэхэгүй, үри хүүгэдгүй үхэдэг. Эдилгэ абагшын гэр гал түймэртэ хосорно. 35Иимэ хүнэй һанаанда муу үйлын үрэ һуурияа оложо, хожомой нэгэ сагта хүүгэдэй түрэһэн мэтэ гэнтэ гаража ерэдэг.