‏ Job 16

Иоовой харюу

1Иоов харюу үгэбэ:

2– Иимэрхүү үгэ би урдань оло дахин шагнаһан байнаб. Хүнэй сэдьхэл заһахын орондо таанар улам зобоодог байнат. 3Дэмы донгодожо дууһаба гүш? Юундэ үргэлжэ тоосолдоо хүмши? 4Таанарай нам шэнги болоо һаа, бишье тархяа һэжэрэн зэмэлхэ байгааб. 5Би һанааетнай заһажа, сэдьхэлыетнай уужам болгожо шадаха һэм.

6Хэды хөөрэлдэбэшье, минии зоболон бага болоногүй. Баһа үгэ дуугүй һуухань мүн лэ хэсүү. 7– 8Эзэн намайе туйлдам хүргэжэ байна. Гал гуламтыем усадхаһанаар дүүрэхэгүй, ахирхан бэеым гартаа оруулан зобоожо байна. Үбшэн зоболондо нэрбэгдэн, арһа яһан болооб. Бусад хүнэй урда гэмтэ амитан болооб.

9Уурлан хилэнлэһэн Тэрэ намайе зэрлиг амитаниие мүрдэһэн ангуушан мэтэ намнажа, үбшэн бэеым шүдөөрөө удар татахаар бэлэн байна. Дайсад болон бусад нам тээшэ нюдөө хёлойлгон, ама шүдөө арзайлгана. 10Хасар нюурым альгадахаар барахагүй өөһэд хоорондо эбсэн доромжолно. 11– 12Өөрыень сэгнэдэггүй зоной гарта Эзэн намайе оруулжа, гэнтэ бахалуурдан абажа, бүхы бэеым нюхажа хаяад, бай болгобо. 13Һурша номо агсаһан сэрэгүүдынь намайе тойрон зогсоод, доторым хаха харбажа, шуһа нүжыем гоожуулһан мэтэ. 14Тэрэ намайе хайрлаха шэнжэгүй. Харин дошхон сэрэгшэ мэтэ дахин дахин нам тээшэ добтолно.

15Иигэжэ би эгүүридэ гашуудалай шэрүүн хубсаһа үмдэһэн мэтэ болооб. Духаараа газар мүргэжэ, 16нюдэнэйнгөө хабдатар, нюурайнгаа улайтар бархирааб. 17Гэм хэхэһээ зайлажа, Бурханда сэхэ сэбэр сэдьхэлһээ зальбардаг байһандаа би иимэ зоболондо орооб.

18Минии арюун шуһые газар шорой нюуха ёһогүй. Үнэн шударга бэшэ байдалда эсрэг би бодожо байнам. Минии дуу хоолой хэншье таглаха ёһогүй. 19Гэмгүйем баталха гэршэ юрэ бусын юртэмсэдэ олдохо. Тэрэ намайе хамгаалха. 20Анда нүхэдни намайе наада барижа байна. Тиимэһээл би Бурханай урда нулимсаяа гарганам. 21Анда нүхэрөө хамгаалан зууршалһан мэтэ тэрэ гэршэ тэнгэридэ намайе Бурханай урда хамгаалхань болтогой. 22Удангүй би үхэжэ, энэ дэлхэйдэ дахин бусажа ерэхэгүй ушарһаа энэл намда шухала байна.
Copyright information for BxrBBL2024