‏ Job 18

Билдаадай хоёрдохи үгэ

1Шууһаа нютагай Билдаад Иоовто хандаба:

2– Хэлээ бүлюудэхэтнай хүрөө бэшэ гү? Хэзээ амаа хааха гээшэбта, бодожо үзөөд дуугардаг болоёл. 3Ши юундэ бидэниие малһаа дородо тоолонобши? 4Бардам омогһоо боложо, ши өөрынгөө бэеые таһа татахаһаа холо бэшэ байнаш. Шамһаа боложо оршолон юртэмсын зүй тогтоол хубилжа, амитай бүхы усадхагдаха, хада шулуун байраһаа хүдэлхэ юм гү?

5– 6Гэмтэй этэгээдүүдэй гэр гэрэлгүй боложо, гал гуламтань һүнэхэ болоно. Тиимэ муу хүнэй хохиржо муу шиидхэл үзэхэнь зүб гээшэ. 7Элүүр энхэ байһанаа алхадалынь һуларжа, хорото хэрэгүүдынь өөртэнь эсэргүү болодог. 8Өөрынь хүлнүүд тэрэниие, муу бодолынь тиимэ хүниие урьхадан торгожо, зангада хүлөө шэхэһэнтэйнь адли болгоно.

9Ороһон зангаһаа тэрэ мултаржа шадахагүй. 10Тиимэ хүниие зам дээрэнь далда занга үргэлжэ отожо байдаг.

11Тиимэ хүн аюул аймшагта бүһэлэгдэн, гараха газаргүй болоно. 12Тэрэнэй шадалынь барагдажа, зоболонһоо бэшэ юумэ үзэнэгүй. 13Арһа мяхан хүрэтэрни үхэлэй үбшэндэ эдигдэнэ. 14Орон гэртээ тэнюун һууна гэжэ найдажа байһанаа гэнтэ аймшагтай хаанай олзо болоһон мэтэ болоно. Тэрэ хаанай нэрэ «Үхэл» гэдэг. 15Танигдаагүй хүнүүд гэртэнь орожо һуухадаа, үмхэй үнэрынь арюудхаха гэжэ арса хүжэ шатаана. 16– 17Тэрэ хүн үндэһэ мүшэрынь хатаһан модонтой адли боложо, түрэһэн нютагтань тэрэниие таниха хүн үгы болошодог. 18– 19Тиимэ муу хүн гэрэлтэ дэлхэйһээ харанхы оршондо түлхигдэн орожо, уг галгаха гансашье үригүй үхэнэ. 20Энээниие дуулаһан хүн бүхэн гайхан жэхыдэг, хамаг зон айхын ехээр айдаг. 21Бурханиие тоодоггүй иигэжэ хохирдог байха юм.
Copyright information for BxrBBL2024