‏ Job 19

Иоовой харюу

1Иоов харюу үгэбэ:

2– Таанар хэр удаан муу үгөөр намайе дайлан зобоохобта? 3Таанар намайе арба дахин доромжолбот, тэрээнһээ эшэхэгүй байна гүт? 4Үнэхөөр минии эндүүрһэн байгаашье һаа, танда ямар хамаатайб? 5Хэрбээ таанар өөрыгөө намһаа дээгүүр үзэн, минии амсаһан зоболон ашаглан, намайе гэмтэн болгохые баталха гээ һаа, нэгэ юумэ ойлгогты. 6Бурхан намайе нэрбэжэ унагаагаа. Иигэжэ би Тэрэнэй торто баригдаһан ушарһаа зугадаха газарни үгы. 7«Алабал!» гэжэ минии хашхархада, ямаршье харюу үгы. «Гомдолым хаража шүүгыт, туһалыт!» гэхэдэм, үмэглэл байхагүй. 8Харин Тэрэ зам дээрэм шулуу хаяжа, манан харанхы буулгаба. 9Гэм зэмэгүй би хүндэ ямба хүлеэн абадаг байгааб, теэд Эзэн бүхы нэрэ хүндыем хухалаа. 10Бүхы тээһээм Тэрэ намайе нэрбэжэ, этигэл найдабариием модоной үндэһэн шэнгеэр ходо татажа хаяа. 11Өөрын дайсадай тоодо оруулжа, уур хилэнсэгээ нам тээшэ шэглүүлээ. 12Юрэ бусын сэрэгүүдынь гэрыем хүреэлэн дайраһан мэтэ.

13– 14Аха дүүнэрни, түрэл саданарни намайе орхижо, анда нүхэд, танил таланууд тоохоо болёо. 15Гэртэм хонолго һурадаг байһан зон мүнөө намтай мэндэшэлхэеэ болижо, зарасанарни намайе хари хүн гэжэ тоолодог болоо. 16Тэдээнһээ туһа эрижэ дуудахадам, тоожо үгэнэгүй. 17Үмхэй үнэртэй аминһаам һамгамни хулжан зайлажа, түрэһэн хүүгэдни ойртохо дурагүй болоо. 18– 19Балшар хүүгэд намһаа жэгшэжэ, бии болоходом наадалдаг болоо. Хамагай дүтэ нүхэдни үзэн ядадаг болоо. 20Мүнөө намһаа арһа яһан хоёр үлэжэ, амиды голтойхон байнам.

21Бурханай мутар намайе сохёод байхадань, анда нүхэдни, таанар, юундэ хайрлахагүй байнат? 22Тэрээнтэй хамһажа намайе хашаха хэрэг бии гү?

23– 24Өөрыгөө би гэмгүй гэжэ тоолодог һэн тула минии үгые номой хуудаһанда бэшээд, хадын шулуун дээрэ һиилээд, туулгаар барлаад, эгүүридэ үлөөбэл – һайн байгаа. 25Юундэб гэхэдэ, намда Абарагша бии. Тэрэ һүүлдэнь намайе хамгаалхаа ерэхэл. 26– 27Арһа мяхамни үбшэндэ эдюулжэ үгы болоошье һаань, хожомынь би дахин ами орожо, бэеэрээ Бурханай урда ошохом зайлашагүй. Үхэн үхэтэрөө би энээнииел хүсэхэ байнаб.

28Нүхэдни, таанар намайе буруудхажа, зоболон дээрэм зоболон нэмэхэеэ болигты. 29Эзэнэй уур хилэнсэгһээ болгоомжологты. Тэрэнэй уур хилэнсэгэй хурса һэлмэдэл сабшахада, шиидхэлынь ямар болохые таанар мэдэхэт.