‏ Job 2

Иоовые эрлиг дахин хардана

1Бурханай хүбүүдэй Эзэнэй урда суглархадань, муу ёротой эрлиг баһа ерэбэ.

2– Ши хаанаһаа ерэбэш? – гэжэ Эзэнэй һурахадань, тэрэ иигэжэ харюусаба:

– Газар дэлхэйгээр хэсэжэ ябааб.

3Эзэн эрлигтэ хандаба:

– Минии зараса Иоовые анхарба гүш? Тэрээн шэнги хүн дэлхэйдэ байхагүй. Гэм зэмэгүй, үнэн шударга тэрэ хүн намайе хүндэлжэ, буруу юумэнһээ зайлажа, болгоомжолон ябадаг. Ямаршье ушар шалтагаангүй ши бүхы юумыень үгы хэхэ зүбшөөл намһаа абаа һэнши, гэбэшье тэрэ мүнөөшье гэмтэй юумэ хээгүй.

4Эрлиг Эзэндэ харюу үгэбэ:

– Амиие амяарнь сэгнэхэ гэдэг! Хүн гээшэ ами бэеынгээ түлөө бүхыгөө үгэдэг юм. 5Харин мутараа һунгажа, яһа мяхандань хүрэбэлтнай, тэрэ Танда хараал хэлэнгүй яаха һэм!

6Эзэн эрлигтэ иигэбэ:

– Үзэлши, тэрэ шинии гарта байна, зүгөөр тэрэнэй аминда хүрэжэ болохогүй.

7Эрлиг Иоовые хүлэйнь улаһаа толгойнь орой хүрэтэр яра хадьхада барюулба. 8Иоов бэеэ маажаха гэжэ хатуу шабарай хэлтэрхэй абаад, үнэһэн бурма соо һууба. 9Һамганиинь Иоовто хэлэбэ:

– Ши үнэн шударгаяа хадагалһаар гүш? Тэрээнһээш ямар үрэ гарахаб? Мүрынь ганса Бурханиие хараагаад үхыш тиигээд.

10– Ши хиирээ гүш? Бидэ Бурханһаа гансал һайниие хүлеэгөөд, мууе абахагүй ёһотой юм гүбди? – гэжэ Иоов үгэ хэлэхэдээ, нүгэл хэлэбэгүй.

11Иоовой зоболон тухай тэрэнэй нүхэд – Тэмаан ороной Элипааз, Шууһаа ороной Билдаад, Наамаа ороной Цопаар дуулажа, тэрээндэ ошобо. Тэдэ нүхэртөө гашуудалаа мэдүүлжэ, сэдьхэлыень заһаха гэжэ ерэбэ. 12Тэдэ холоһоо хараад, нүхэрөө танибагүй. Шангаар уйлалдан, хубсаһаа таһа татажа, толгойдоо шорой хаяба. 13Тиигээд хэнииньшье тэрээндэ нэгэшье үгэ хэлэнгүй, долоон үдэр, долоон һүни хажуудань газар дээрэ һууба. Угаа ехэ үбшэн шаналалда баригдаһыень хараба.
Copyright information for BxrBBL2024