‏ Job 20

Цопаарай хоёрдохи үгэ

1Удаань Наамаа хотын Цопаар Иоовто хандаба:

2– Сэдьхэлэйм зоболон харюу хэлэхыем эрилтэ табижа байна. 3Намайе доромжолһон зэмэлэл дуулаад, уурлахаһаа ондоо аргагүй.

4– 5Оршолондо хүниие бүтээжэ үгэһэн сагһаа хойшо Эзэндэ һүзэглөөгүй этэгээдүүд ойро зуурын жаргал эдлэнэ гэжэ мэдэхэ бэшэ аалши? 6Тиимэ хүн тэнгэридэ тулатараа бахархабашье, 7нэгэ сагта үмхэй бааһантаяа адли эгүүридэ үгы болоходонь, «Үнөөхимнай хаанаб?» гэжэ өөһэд хоорондоо гайхан асуухалта. 8Тиимэ хүнэй амидарал зүүдэн мэтэ үнгэрдэг. 9Орон нютагтань тэрэниие дахин оложо харахагүй. 10Тэрэ хүн ядуушуулые мүнөө дарлабашье, хожомынь тэрэнэй үри хүүгэд булхайлжа абаһан зөөрииень бусаан үгэжэ, үршөөл туһаламжа эрихэ саг болохо. 11Шадал дундаа бэень эртэ булагдан, газар шоройдо шэнгэхэ.

12Муу юумэ хэхэдээ, тиимэ хүн амаа тамшаан хорхойтодог. 13Амандаа хэһэн шэхэр амтархан хүхэһэндэл, гэнтэ ябадалаа орхихо гэжэ байхагүй. 14Гэбэшье хэһэн гэмынь хожом хоротой хоол мэтэ боложо, 15эдиһэн хоолоо бөөлжэн гаргаһантай адли, абаһан хүрэнгэеэ хаяха баатай болохо. Үнэн шударга байдалай түлөө Бурхан энээниие хэдэг. 16Муу хэрэг үйлэдэхэ гээшэ могойн хоро ууһантай адли. 17Иимэ хэрэг үйлэдэһэн хүн түргэн үхэжэ, зүгын бал, үрмэ тоһоор билтарһан элбэг амидаралые эдэлжэ шадахагүй. 18Наһан соогоо суглуулһан зөөринь ямаршье жаргал үгэхэгүй. 19Ушарынь хадаа тэрэ ядуушуулые дарлажа, өөрөө бодхоогоогүй гэрнүүдые буляажа абадаг байгаа. 20Садаха гэдэхые тэрэ мэдэдэггүй, сэдьхэлынь ханаха гэжэ байдаггүй. 21Үрэбхигшэ аманһаань юуншье зайлаагүй. Бусадые хайрлаха сэдьхэлгүй тэрэ хүнэй баян, тарганиинь удаанай бэшэ. 22Элбэг дүүрэн амидаржа байһанаа тэрэ гэнтэ хохидожо, туйлай ехэ зоболон үзэхэ. 23Сэнгэлэн байдалдаа ханажа байтарынь Бурханай уур хилэнсэгэй хатуу шиидхэл гэнтэ бууна. 24Тэрэ хүнэй байдал һэлмэһээ зайлаад, хүрэл һуршада оногдоһондо адли. 25Хурса һомоной нюргандань зоогдожо, бэеынь шобто гарахада, хүрэл булсагарынь эльгыень биса татажа, тэрэ хүндэ айдаһан ерэнэ. 26Досоонь захалһан гал тэрэниие үрэбхихэ, гэр бүлэнь суглуулһан зөөритэеэ баһал галда хуйхалагдаха. 27Тэнгэри тиимэ хүнэй гэм элишэлхэ, газар дэлхэй эсрэг гэршэлхэ. 28Эзэнэй уур хилэнсэг эд зөөрииень үерэй уһан мэтэ хаман аршана.

29Гэмтэй хүн Эзэнһээ иимэл шиидхэл абадаг юм. Тэрэниие шударга байдалай түлөө хэнэ.