‏ Job 21

Иоовой Цопаарта үгэһэн хоёрдохи харюу

1Тиихэдэнь Иоов харюу үгэбэ:

2– Минии хэлэхые анхаралтай шагнахадаа, һанааем тэгшэлнэ гээшэт. 3Намайе тэбшэжэ хэлүүлэгты. Һүүлээрнь наадалжа байхадатнай болоно.

4Би хүндэ гомдоно бэшэб. Удаан тэбшэжэ шадахагүймни минии буруу бэшэ. 5Үбшэн бэеым хараад, алмайран гайхахадаа, амаа таглаха бэзэт. 6Үнэн байдалаа би бодоходоо, эрхэгүй айн шэшэрнэм.

7Хэрбээ таанарай яряанай үнэн болбол, Бурхан яагаад муу хүнүүдые үтэр үхүүлдэггүй юм бэ? Тэдэ ута наһа наһалжа, улам хүсэрхэг боложол байдаг. 8Үри хүүгэдэйнгээ, аша гушанарайнгаа наһа хүсэхые үзэжэ, 9Бурханһаа ямаршье шиидхэл абаагүй, һанаа амар һууна. 10Үхэр малынь үбшэндэ нэрбэгдэнэгүй, үнеэ гунжадынь дутуу түрэнэгүй, түлынь бүтэн. 11Үнэр олон үри хүүгэдынь хонин һүрэг мэтэ хушууран, 12хуур лимбын хүгжэмэй аялга соо сэнгэн баясана. 13Тиимэ зон наһан соогоо өөдэргэ амидараад, һанаан тэгшэ үхэлэй газарта ошодог.

14– 15«Түгэс Хүсэтэ Эзэн хэн хадаа маниие зонхилхо болооб? Тэрэниие хүндэлхэнь ямар ашагтай юм бэ? Тэрээнтэй ярилдаха ямар хэрэгтэй юм бэ?» гэжэ тэдэнэр хоорондоо хэлсэдэг, «Бидэ танай замаар ябахагүйбди, харин бидэниие бү дайра» гэжэ Бурханда хэлэхэдээ һаатахагүй.

16Харагтыл даа, муу зоной һайн амидархань зан шанарһаань шалтагаалдаггүй байна. Гэбэшье тэдэнэй үзэл бодолые би хэзээшье зүбшөөн дэмжэхэгүй байнаб.

17Бурхан үнэхөөр гэмтэй хүнүүдэй гал гуламта усадхадаг гэжэ гү? Тэдэ үнэхөөр хохидол үзэдэг гэжэ байха гү? Бурхан тэдээндэ хилэгнэн зоболондо оруулдаг гэжэ гү? 18Тэдэ һалхинда хиидэхэ хатаһан һолоомо, хамагдаһан мэхиинэ мэтэ үгы болодог гэжэ үнэн гү?

19Бурхан хүнэй гэм нүгэлые үри хүүгэдтэнь хабаадуулжа шиидхэдэг гэжэ таанар бодоно гүт? Энэ буруу. Бурхан гэмтэйл хүниие шиидхэн хохироохо ёһотой. 20Тэрэ хүн өөрын лэ бэеэр Түгэс Хүсэтэ Бурханай уур хилэнсэг амсаха зэргэтэй. 21Тиин эртэ наһа барахадань, гэр бүлэнь тэрээндэ ямар хабаатай юм бэ? 22Бурхан хамагай дээрэ байжа, тэнгэридэш байгшадые шүүн шиидхэдэг, хэн нэгэн Тэрээндэ ухаа заахам гэжэ оролдодог гү?

23– 24Зарим хүн элүүр шамбай, тарган садхалан, һанаан тэнигэр ябаһаар үхэдэг. 25Тиихэ зуура ондоо нэгэн жаргал нэгэтэшье үзэнгүй, халагла халаглаһаар үхэдэг. 26Гэбэшье хэнииньшье үхэжэ булагдаад, үтэ хорхойдо эдюулээд үнгэрдэг.

27Таанарай намайе яажа буруудхаха, ямар харюу үгэхэ байһые би мэдэнэб. 28«Тэрэ алдар нэрэ ехэтэйшүүлэй гэрынь хаанаб, нүгэлтэнэй майхан алин бэ?» гэхэ һанаатайт. 29Газар үзэжэ, нюдөө тайлаһан хүнүүдһээ асуугаарайт. 30Гэмтэй муу хүн һүйдхэлэй үдэртэ бүтэн үлэдэг, Бурханай ууртай шиидхэлдэ тэрэ ородоггүй. 31Үнэхөөр гэмтэй хүнэй хэһээлтэдэ оронгүй байха ушар олон. 32Үхэхэдэнь, үргэн абаашаад, хүүр бунханайнь дээрэ харуул табидаг. 33Олон хүн ойронь ошожо хүндэлһэнөө мэдүүлдэг. Газарай зөөлэн нэмэргэдэ хушагдан, тэрэ амардаг. 34Худал үгэ ярижа, хайшан гээд һанааем тэгшэлхэ гэбэт.