‏ Job 22

Элипаазай гурбадахи үгэ

1Тэмаан хотын Элипааз Иоовто хандаба:

2– Хүнэй мэргэн ухаан өөртэнь лэ хэрэгтэй, Бурханда хүнһөө ямар ашаг байба гээшэб. 3Шинии гэмгүй байдал Түгэс Хүсэтэдэ ямар хэрэгтэйб? Бэеэ сагаадхаха гэжэ оролдохошни Тэрээндэ ямар хэрэгтэй юм бэ? 4Тэрэ шамһаа түбэгшөөжэ, шамтай адли болошоод, заргалдажа байха гэжэ бодоно гүш? 5Үгы, шинии хэһэн муу хэрэгүүд олон, мянган гэмэйнгээ түлөө шиидхэлдэ орожо байнаш. 6Зээли абаха гэһэн хүнһөө барисаагаар мүнгэ эдижэ, хүнүүдые нюсэгэлдэг бэлэйш. 7Ядарһан хүндэ ши уһа һарбайгаагүйш, үлдэһэн хүнһөө талха харамнааш. 8Тиихэ хирэдээ хүсэ шадалтай хүн газар эзэлдэг, нэрэтэй солотой зон тэндэ һуудаг гэжэ тоолодог байгааш. 9Ядуу бэлбэһэн һамгадай гар сайлгангүй бусаажа, үншэн дорой хүүгэдэй эрхэ хаһажа байгааш. 10Тэрэнэй түлөө ши урьхада орожо, элдэб аюул аймшагаар хүреэлүүлжэ, гэнэ зоболондо унааш. 11Гүн харанхыда ороод, үзэжэ хараха аргагүй боложо, зоболон дүүрэн амсажа, үерэй уһанда абтаһан мэтэ болоош. 12Бурханай оршодог газар холо байна. Аласай одод тээшэ хара, тэдэ ямар үндэр бэ? 13Ши тэрэниие мэдээд, ман тухай Тэрэ юу мэдэхэб даа. Үзэгдэхэгүй ушарһаа харанхытай адли. Тэрэ гүн харанхые нэбтэлэн бидэниие хинажа шадаха гү? гэжэ хэлэхэш. 14Шинии хэлэһээр, Бурхан оршолонто юртэмсын хизаарые хараха шадабаригүй.

15Адагай муу хүнүүдэй гэмтэ замаар ябахада шамда ямар хамаатайб? 16Тиимэ хүнүүд сагһаа урид үхэжэ, амидаралайнь үндэһэн үерэй уһанда ходор татуулһан мэтэ болодог. 17«Түгэс Хүсэтэ Хамагые баригша бидэндэ хэрэгтэй бэшэ» гэжэ бодоод, холохон байхые Тэрээнһээ гуйдаг. 18Үнэндөө Тэрэл үйлыень бүтэмжэтэй, гэрыень баялигаар дүүрэн болгоо юм. Муу хүнэй бодол би зүбшөөжэ шадахагүй байнаб. 19– 20Гэмгүй хүн гэнтэ муу хүнэй һүйдхэл хараад, «Бидэнэй дайсад һүнэжэ, эд хүрэнгэнь шатаа» гэжэ баярладаг.

21Түгэс Хүсэтэ Тэрээнтэй ойртон эблэрһэншни дээрэ. Тиигэбэл ши Тэрээнһээ һайн хандаса хүлеэхэ зэргэтэйш. 22Тэрэнэй хэлэһэн үгэ заабари хүлеэн абажа, сэдьхэлдээ хадуун дэмжэ. 23– 24Түгэс Хүсэтэдэ хандаба, ажал үйлэшни бүтэмжэтэй болохонь дамжаггүй. Гэм хэхээ болижо, үнэтэй гэжэ тоолодог эд баялигаа бог нобшо дээрэ хая. Опиир нютагай эрхим шанарай алтые голой элһэ шулуунтай худхажа орхи. 25Газар дэлхэйн Түгэс Хүсэтэ Эзэн лэ шинии найдабари болоһон үнэтэ баялиг байха ёһотой. 26Тиигэбэл ши Түгэс Хүсэтэдэ түшэг тулга оложо, сэдьхэлшни тэнигэр болохо, Бурхан тээшэ харахаш. 27Тиигээд зальбарһан бүхэнэйнгөө харюу Тэрээнһээ абахаш. Харин ши талархалаа элирхэйлхын тулада хэлэһэн үгэ тангаригаа һүүлээрнь бэелүүлжэ бай. 28Тиигэбэл һанаһан бүхы һанааншни бүтэжэ, амидаралайш зам гэрэлтэй болохо. 29Хэсүү үедэ Тэрээнһээ туһаламжа эрибэлшни, даруу зантай шамда Тэрэ туһалхал ёһотой. 30Тэрээнһээ байтагай гэмтэй хүнэй зүгһөө шинии зууршалбал, Тэрэ шамайе һанан шиидхэлһээ тэрэниие сүлөөлхэ.