‏ Job 23

Иоовой харюу

1Иоов харюу үгэбэ:

2– Би Бурханда гашуун гомдолоо мэдүүлхэмни. Иимэ байдалые зүб гэхэгүй ушарһаа бэшээр аргагүй байна. 3Тэрэниие хаанаһаа оложо болохые би мэдэдэгһэйб, байдаг газартань дүтэлбэл, ямар һайн гээшэ һэм. 4Тэрэнэй үмэнэ хэрэгээ мэдүүлжэ, шүүн сэгнэхынь хүлеэбэл, бүришье һайн байгаа. 5Би гомдолоо ойлгуулаад, өөрыгөө үмэглэхэ байгааб. Тэрэнэй харюу шагнажа, хэлэһэн бүхы үгыень ойлгохо һэмби. 6Хизааргүй хүсөөрөө намтай заргалдаха юм гү? Үгы даа, Тэрэ намайе усадхахагүй, анхаран шагнаха ёһотой. 7Хэншье шударга үнэн хэрэгэй түлөө Тэрээнтэй арсалдахадань яахаб. Тиин минии гэмгүй болохымни хүлеэн зүбшөөжэ, Өөрын шүүлгэһээ намайе сүлөөлэн табиха һэн.

8Баруун, зүүн зүг тээшээ хайшаашье ябахадам, Тэрэ үзэгдэнэгүй. 9Урда, хойто зүгтэ хүсэ шадалынь харагдабашье, намда Өөрөө үзэгдэхэ гэжэ алга. 10Үзэгдэхэгүйнь шухала бэшэ юм бэзэ, гэшхэһэн бүхы мүрым Тэрэ һайн мэдэнэ. Намайе шалган туршаад, холисогүй шэжэр алта элирүүлһэндэл хэлэхэ. 11Би Тэрэнэй замһаа нэгэшье хадуураагүйб. 12Хэлэһэн үгэдэнь зааханшье зүреэгүйб, үгэһэн заабариһаань нэгэхэншье хадуураагүйб.

13Оршолон юртэмсэдэ ганса Бурхан байдаг. Тэрэнэй шиидхэбэриие хэн өөршэлэн хубилгажа шадахаб, хүсэһэн бүхэнөө Тэрэ хэдэг. Намда дүүрэн зоболон амасуулха гээ һаань, хэн боли гэхэб, 14Тэрэнэй нөөсэдэнь тиимэ юумэн ехэ. 15Мүнөө би Тэрэнэй урда айн шэшэржэ байнаб. 16Бурхан урма зоригымни мохообо, Түгэс Хүсэтэ намайе һүрдөөн айлгаба. 17Харанхыда оруулжа хаяхын урда һүнөөхэеэ яагааб даа. Манан харанхы соо юушье харахаа, юушье ойлгохоо болёод байнаб.
Copyright information for BxrBBL2024