‏ Job 24

1Түгэс Хүсэтэ яагаад саг хугасаае тогтоогоогүй гээшэб? Бурханиие мэдэхэшье хүнүүд Тэрэнэй үдэрнүүдые юундэ мэдэнэгүй гээшэб?

2Хүршэ айлайнгаа үмсын газарые эзэлхын тула табигдаһан мужаа абаад хаяха юм. Хүнэй хони туугаад, өөрынгөө һүрэг соо нюуха юм. 3Үншэн хүүгэдэй ганса элжэгые хайрлаха сэдьхэлгүй буляан абаашана. Бэлбэһэн эхэнэрэй зээли гуйхада, ганса үнеэень барисаанда абана. 4Муу хүнүүдэй хашалтаһаа боложо, үгытэй ядуушуул бэеэ нюухаһаа ондоо аргагүй болодог.

5Иигэжэ эзэгүй талада хоол бэдэрһэн зэрлиг элжэгэн шэнги үгытэй ядуушуул тэнэжэ үл залгадаг. Хээрын үбһэнһөө бэшэ ондоо эдихэ юумэн тэдээндэ олдохо бэшэ. 6Хээрэ талаһаа зэрлиг ногоо, гэмтэ муу баяшуулай уһан үзэмэй сэсэрлигһээ хаягдаһан үжэһэн жэмэс суглуулна. 7Һүниин хүйтэндэ үмдэхэ хубсаһагүй дагжа һүрэн, 8уулын бороодо нороод, хабсагайн үбэртэ шэшэрэн зогсоно. Ондоо хоргодохо газар тэдээндэ байхагүй.

9Бэлбэһэн эхэнэрэй үритэй болоходонь, хүхөөр хүүгэдыень һалган абажа, богоол болгодог гэмтэн байдаг. Зээлеэр гуйһан ядуу хүнһөө хэтэрмэ ехэ барисаа эридэг. 10Энээнһээ боложо ядуушуул үмдэхэ хубсаһагүй нюсэгэ шабган ябана, эдеэн болохо таряа зөөгөөшье һаа, эдихэ хоолгүй хүдэлнэ. 11Баяшуулда жэмэсэй тоһо, үзэмэй дараһан архи шахан үгэбэшье, үлэн хооһон, аманайнгаа сангаа гаргаха аргагүй байдаг. 12Хотодо усалда ороһон, үхэхэ туйлдаа хүрэгшэдэй ёолоон, туһа эриһэн мүргэл Эзэнэй анхаралда абтанашьегүй.

Гэрэл туяагай дайсад

13Гэмтэй хүнүүдтэ гэрэлтэ амидарал таарахагүй. Тэрэнэй замаар тэдэ ябажа шадахагүй. 14Алууршан хүн үүрээр бодожо гараад, ядуу дорой хүнэй ами хороон дээрмэдэнэ, харин һүнинь хулгай хэнэ. 15Забхай хүн үдэшын боро харааниие хүлеэжэ, «Намайе хүн танихагүй» гэжэ нюураа далдалан гаража ошодог. 16Хулгайша хүн харанхы болохые хүлеэгөөд, үдэр хаража абаһан бусадай гэртэ нүхэ малтадаг. Тэдээндэ гэрэл хэрэггүй. 17Бусад зондо сэл харанхы һүни аймшагтай, харин хуурмаг хүнүүдтэ гэгээн үдэр мэтэ һайхан.

18Тиимэ хүнүүд уһан дээрэ хөөрэһэн хөөһэн мэтэ түргэн арилха болтогой. Тэдэнэй эзэлдэг газар хараалда хүртэг. Тэдэ түргэн үхэжэ, уһан үзэмэй сэсэрлигтээ ажаллажа шадахагүй болог. 19Ган болон халуунай уһа саһа хайлуулан шэргээһэндэл адли нүгэл үйлэдэгшэд һүнэжэ, Үхэлэй орон тэдэниие залгиг. 20Түрэһэн эхэнь тэдэниие мартаг. Үтэ хорхой үхэһэн бэедэнь найрлан сэнгэг. Тиин хамаг муу муухай хатан үмхирһэн модон шэнги унаг. 21Үри хүүгэдгүй эхэнэрые доромжолон гутаажа, бэлбэһэн абгайн зоболон хараагүй хэбэртэй үнгэрһэнэй түлөө хүн иимэл шиидхэл абаха ёһотой. 22Юртэмсын Эзэн тиимэрхүү бардам этэгээдүүдые хуха нуга дарадаг. Тэрэнэй бодоходо ямаршье хүсэтэй хүн ута наһа наһалха найдабаригүй болодог. 23Тэрэнэй хүсэтэ гарай хүндөөгүй сагтал хүн тайбан байдаг, Тэрэ харасаяа тэдэнэй харгыһаа холодуулдаггүй. 24Түр зуура дээшээ гараад, бусадтал адли үгы болодог. Хиргуулһан хоолос мэтэ унаад бусадта адли обоологдохо. Үхэхэдөө, тэдэ бусадһаа ямаршье илгаагүй байдаг. 25Минии энэ үгые хэн буруушаажа, намайе худалша гэхэ байнаб?
Copyright information for BxrBBL2024