Job 26
Иоовой түгэсхэлэй үгэ
1Иоов харюу үгэбэ: 2– Шадалаа һалаһан намда ямар ехээр туһалба гээшэбта. 3Ухаагаа муудаһан намда үнэтэ зүбшэл үгэбэт. Ямар хэрэгтэй бэлиг ухаа үгэбэ гээшэбта? 4Энэ үгэ хэлэхэһээ урид таанар хэнһээ заабари абаба гээшэбтэ? Хэнэй һүнэһэн шамаар дамжуулжа яриба гээшэб? 5Бурханай үмэнэ газарай гүн доро хүлгүй оёор, бунханда ороһон хүнэй һүнэһэн айһандаа шэшэрэлдэжэ байдаг. 6Үхэлэй орон Тэрэнэй хараса доро ямаршье хаалтагүй, Үхэл Тэрэнэй урда һалганана. 7Эзэн хүлгүй оёор дээгүүр Хойто зүгые тогтоогоод, хооһон зайда газар дэлхэйе үлгэжэрхёо. 8Тэрэнэй хүсөөр уһа шиигтэй үдхэн үүлэн агаар мандалда тогтон байдаг. Хүндэ уһанай үүлэн мананай сасаран тарахагүйнь гайхалтай. 9Түхэреэн һарын нюур үүлээр бүтүүлжэ шадана. 10Гэрэл болон харанхын хилые далайн нюруу дээрэ тогтоогоо. 11Тэрэнэй уурлахада, тэнгэриин бахананууд айн шэшэрнэ. 12Тэрэ хүсэ шадалаараа далайе номгоруулдаг, Рааһаб шүдхэрые диилэн дарадаг. 13Тэрэнэй амисхалаар һалхин номгоржо, тэнгэри сэлмэдэг. Өөрын мутараар шуурга үүсхэдэг могойе таһа татаба. 14Энэ хадаа Тэрэнэй хүсэ шадалай багахан хэсэг болоно. Бидэ Тэрээн тухай шэбэнээл дууланабди. Асар хүсэтэ абяанай шэнжые хэншье хүсэд ойлгожо шадахагүй.
Copyright information for
BxrBBL2024