‏ Job 27

1Иоов дахин хэлэбэ:

2– Эрхыемни хаһаһан Түгэс Хүсэтэ Эзэнэй, сэдьхэлэй голхорол намда асарһан Хамагые баригшын байгаа сагта, 3– 4амияа табяагүй, һүнэһэ һүлдөө алдаагүйдэмни минии аманһаа хуурмаг үгэ дуулдахагүй, минии хэлэн худалаар хэлэхэгүй. 5Таанарай үгэ зүб гэжэ хэлэхэгүйб. Үхэн үхэтэрөө өөрыгөө гэмгүйдэ тоолохоб.

6Би өөрын үнэн зүбые баримталхадаа, һөөргэ сухарихагүйб. Сэдьхэлни амидаралай нэгэшье үдэрһөө халаглахагүй.

7Намда эсэргүү хүн бүхэндэ гэмтэн мэтэ хандахые би Эзэнһээ хүсэжэ байнаб. 8Тэрэнэй харгые дахаагүй хүнүүд наһа бараха туйлдаа хүрэхэдөө, юундэ найдаха гээшэб? 9Тэрээндэ зоболоной тохёолдоходо, Бурхан хашхархыень дуулаха гү? 10Түгэс Хүсэтын ойро байхадаа ярихые түбэгшөөһэн аад, үхэхынгөө урда гуйхадаа өөдэтэй харюу абаха гү?

11Би Түгэс Хүсэтын хүсэтэ гар, зан шанар тухай нюултагүй хэлэхэб. 12Таанад өөһэдөө Тэрэнэй хүсые мэдэхэ байгаад, юундэ намайе буруутан болгоно гээшэбта?

Гэмтэдэй ба дарлагшадай хойшолон

13Түгэс Хүсэтэ бусадые дарладаг гэмтэй хүнүүдые хэр шиидхэдэгынь хэлэхэ хэрэгтэй болоно. 14Тиимэ хүндэ үри хүүгэд олоншье һаа, үлэн хооһон ябажа, дай дажарта хосорно. 15Үлэһэн нэгэниинь үбшэндэ нэрбэгдэнэ. Бэлбэһэн эхэнэрынь уйлахашье шадалгүй болохо, ээлжээгээр хүүгэдынь үхэжэ эхилхэ. 16– 17Шорой мэтэ ехэ мүнгэтэй, шабар мэтэ олон хубсаһа дараһан гэмтэ хүнүүдэй наһа барахада, үнэтэ хубсаһыень ондоо шударга хүнүүд үмдэжэ, гэмгүй зон мүнгыень хубаажа абана. 18Өөрынь гал гуламта илааһанай шүлһэн тор мэтэ тогтоогдодог, харуулшанай обоохой шэнги түр зуура бодхоогдодог. 19Тиимэ хүн орон дээрээ баян унтабашье, нюдөө нээхэдэнь, зөөри гэжэ үгы. 20Тэрэ үедэ үерэй уһан мэтэ айдаһаниинь нэмэрин ерэжэ, хүсэтэ шуурганда харанхыгаар туугдаһан мэтэ болохо. 21Дурна зүгэй хара һалхин тэдэниие байраһаань хобхо татаһан мэтэ. 22Тэрэ шуурган хүниие хайрлахагүй, зугадан зайлаха ямаршье аргагүй. 23Хара һалхин тэрэниие наада барин, альга ташаһан мэтэ эшхэрэн, байраһаань хобхо татан үлдэнэ.
Copyright information for BxrBBL2024