‏ Job 28

Сэсэн мэргэндэ магтаал

1– 2Уурхайн гүн сооһоо хүн алта мүнгэ олзолдог, газарһаа түмэр абадаг, шулуунһаа зэд хайлуулдаг. 3Тиихын тулада агы нүхэн соо гэрэлтүүлэн, 4нюдэ балай харанхы соогуур газарай гүн руу доошоо дүүлижэ, улһа дамжан дүүжэндэдэг. 5Газарай хүрьһэндэ хүн таряа таридаг, гэбэшье гүн соонь һэндэжэ, урбуулан уурхай малтадаг. 6Газар дорохи хадын хара шулуун соо үнэтэ миндарга шулуун, алтан нюугданхай. 7Жэгүүртэнэй хаан бүргэд тиимэ гүнзэгые үзөөгүй, харсагын нюдэндэ тэрэ харагдаагүй. 8Араатанай хаан арсаланшье тиимэ харанхыда ороогүй.

9Хүн ган булад мэтэ хада шулууе хахалжа, уула хабсагайе урбуулжа хаяна. 10Хабсагай соо харгы гаргажа, оёорынь нюдөөрөө харана. 11Уһанай эхиие газар дороһоо оложо, уурхайда оруулхагүйн тулада таглажа, нюугдаһан юумые гэрэлтэй газарта гаргадаг.

12Сэсэн ухаае хүн хаанаһаа оложо шадахаб? Олохын тулада хаана ошохо ёһотойб?

13Сэсэн ухаанай хэр зэргэ үнэтэ зүйл болодогые хүнүүд ойлгодог юм гү? Хүн түрэлтэнэй нютагта тэрэ олдохогүй. 14Далайн гүнзэгыдэ тэрэ байхагүй, далай дээрэшье үгы. 15Тэрэниие алта мүнгөөр худалдан абажа болохогүй. 16Опиир нютагай шэжэр алтаар, үнэтэ мана, эрдэни шулуугаар тэрэ үнэлэгдэхэгүй. 17Үнэтэ алтан болон тунгалаг уһан шэнги шэл тэрээндэ хүрэхэгүй, шэжэр алтаар бүтээһэн шэлдэг һайхан эдлэлшье тэрээнтэй зэргэсэхэгүй. 18Хоморой оюун шүрэ, болор шулууе дурдалтагүй. Сэсэн ухаан бадмараагаһаа үлүү. 19Эфиопиин молор эрдэни, шэжэр алтаар тэрэниие сэгнэхэ аргагүй.

20Тиигэбэл мэргэн ухаан хаанаһаа ерэдэг юм бэ? Амидаралай удха ойлгохын тулада хайшаа ошобол зохид гээшэб? 21Хүхэ тэнгэри дорохи хамаг амитанай, жэгүүртэ шубуунай нюдэнһөө тэрэ нюугдаатай. 22Һүйдхэл ба үхэл хоёр тэрээн тухай хэлэхэ: «Бага зэргэ дуулаа һэмди».

23Гансахан лэ Бурхан тэрээниие хаанаһаа олохые мэдэхэ. 24Гансахан лэ Тэрэ оршолон дэлхэйе нэгэ амяар хаража, тэнгэри дорохи бүхы хэрэгые үзэдэг. 25– 26– 27Тэрэ һалхинай хүсэ, уһанай хэмжээ, аадар бороогой орохые, сахилгаанай замые шиидхээд, оршолонгые бүтээһэн тэрэ ухаае ондоо юунтэйшье жэшэшэгүй гэжэ үнэлөө һэн.

28Тиигээд өөрынгөө бүтээл болохо хүндэ хандажа, «Ехэ Эзэн намайе хүндэлхэ гээшэ таанарай хубида эгээл сэсэн зүйл болохо. Тиин гэмтэ байдалһаа зайлажа ябахань хүнэй амидаралда хамагһаа ухаатай шухала» гэбэ.