Job 29 | BxrBBL2024 | STEP | Иоов дахин үгэ хэлэбэ:

‏ Job 29

Иоовой түгэсхэлэй үгэ

1 Иоов дахин үгэ хэлэбэ:

2 – Ай даа, Бурханай хамгаалалтада байһан сагаа тэхэрюулдэгһайб. 3 Урдань Тэрэ минии хажууда байжа, харанхы дэлхэйдэ ябаха гэрэлтэ зам заажа байгша һэн. 4 Шадал дундаа өөдэргэ ябаха үедэм Бурхан намһаа һалангүй орон гэрыем хамгаалдаг бэлэй. 5 Тэрэ саг дахин ерэбэл һайн һэн. Түгэс Хүсэтын хамгаалалта доро үри хүүгэдни хажуудам байгаа. 6 Мал адууһамни сагаан эдеэ элбэгээр хайрлажа, жэмэстэ модо хада хабсагайдашье тарихада, тоһоор билтаржа байгаа юм. 7 Минии хотын хэрэмэй хаалгын зэргэдэ ерэжэ һуудалаа эзэлхэдэм, 8 залуушуул замһаа зайлажа, үбгэд һууриһаа бододог һэн. 9 Удамаршад намайе хараад, үгэ хэлэхэеэ түбэгшөөдэг, амаа альгаараа бүтүүлдэг, 10 хэргэм зэргэтэн минии урда дуугаа хуряадаг һэн.

11 Намтай бэеэрээ уулзажа, хэлэхыемни шагнаһан хүн талархан магтадаг бэлэй. 12 Ушарынь гэхэдэ, би ядуушуулые зоболонһоо гэтэлгэжэ, үншэдтэ туһалдаг байгааб. 13 Бэлбэһэн абгайнар баярлажа, наһа дүүрэжэ байһан зон үршөөлтэ үгөөр дурдадаг байгаа. 14 Гэм нүгэлгүй амидарха гээшэ минии хубида хубсаһа үмдэхэтэй адли юрын нэгэ хэрэг бэлэй. 15 Би һохор хүнүүдтэ нюдэн, дохолон хүнүүдтэ хүл боложо, 16 ядуу хүниие эсэгэ мэтэ энхэржэ, зарга шүүхэдээ, танихагүй хүндэ адляар хандаха гэжэ оролдодог бэлэйб. 17 Хорото этэгээдэй шүдыень хуха сохижо, олзыень аман сооһоонь ходо татажа абаһан байнаб.

18 Гэр нютагтаа амгалан амидаржа, ута наһа наһалжа, амидаралаймни үдэрнүүд далайн элһэн мэтэ олон болохо гэжэ би найдажа байгааб. 19 – 20 Һүни бүри үндэһэ мүшэрөө шүүдэрээр ундалуулха модон мэтэ алдар нэрэмни намтай хамта, хүсэ шадални буурадаггүй гэжэ би бододог һэм. 21 Хүнүүд намһаа зүбшэл заабари хүлеэн, шэхээ табин шагнагша бэлэй. 22 Хэлэһэн үгэш дутуу гэжэ хэншье нэмэжэ байгаагүй. 23 Ангаһан газарай хура бороогой уһа хүлеэһэн мэтэ зон амаа нээхыем хүсэн һуудаг байгаа. Үгыем соносоһон хүн бүхэн үгэ дуугүй зүбшөөдэг һэн. 24 Энеэбхилхэдэм, этигэжэ ядан урдаһаам хаража, өөг шэнги харасыем бэдэрдэг бэлэй. 25 Би хаан хүнэй түмэн сэрэгээ захирһан мэтэ түрүү зэргэдэ һуужа, ядуушуулай һанааень тэгшэлдэг бэлэйб.