Job 3 | BxrBBL2024 | STEP | Удаань Иоов үгэ амалхадаа, түрэһэн үдэрөө харааба.

‏ Job 3

Иоовой гашуудалта үгэлэл

1 Удаань Иоов үгэ амалхадаа, түрэһэн үдэрөө харааба. 2 Тэрэ иигэжэ хэлэбэ:

3 – Минии түрэһэн үдэр, «хүбүүн бүрилдөө» гэгдэһэн һүни һүнэжэ һалаһай! 4 Тэрэ үдэр харанхы байг, дээрэ байһан Бурхан тэрэниие хаража бү үзэг, тэрэ үдэрые бү гэрэлтүүлэг. 5 Харанхы болон хара манан тэрэниие бусаажа абаг. Үүлэн тэрэниие бүрхөөгүүжэг. Тэрэ үдэрые харанхы айлгаг, арааха залгиг. 6 Тэрэ һүни шэб харанхыда эзэлэгдэг. Жэлэй үдэрнүүдэй дунда тэрэ үдэр бү тоологдог, һарын тоололгодо бү орог. 7 Тэрэ һүни үрэгүй байг, тэрэ һүни баярай хуугай бү зэдэлэг. 8 Левиатаные ^{▼▼ Левиатан – эхи эмхигүй байдалай, муу муухайн һүлдэ, далайн абарга томо амитан. Тэрэниие Эзэн диилээ бэлэй.} һэргээхээр забдаһан үдэрые хараагшад тэрэниие харааг. 9 Тэрэнэй үдэшын бүрэнхын мүшэд бүхэг, гэгээн гэрэл хүлеэн абангүй үүрэй сайхые бү үзэг. 10 Юундэб гэхэдэ, эхын хэбэл нээгдэхые зогсоогоогүй, намайе зоболонһоо зайлуулаагүй. 11 Юундэ би умай соогоо бүтөөгүй, гарамсаараа үхөөгүй хүмбиб?! 12 Юундэ үбдэг дээрэ бөөмэйлэн эхын хүхэнүүд эдеэлүүлхэ гэжэ хүлеэн абааб?! 13 Би мүнөө аниргүй хэбтээд, нойрсожо амарха байгаа ха юмбиб. 14 Дэлхэйн хаашуул болон туһалагшадтайнь, губида һандарһан барилгануудтайнь, 15 гэрээ мүнгөөр дүүргэжэ, алта суглуулжа байһан ноёдтой хамта хэбтэхэ һэмби. 16 Наранай гэрэл үзөөгүй нялхада адли намай хаяха байгаал. 17 Тэндэ хара һанаатайшуулшье сүйд хэхэеэ болижо, ядаран тулигшад амардаг. 18 Шорондо хаягдаһан амитан тайбан һуудаг. Тэндэ харуулшанай хашхараан дуулдахагүй. 19 Тэндэ ехэ багагүй бултадаа адли эрхэтэй, богоол эзэнһээ сүлөө байдаг. 20 Юундэ зобогшодо гэрэл, гашуудагшада амин үгтэдэг юм? 21 Тэдэ үхэлые хүлеэгөөшье һаань, ерэдэггүй, нюуһан эрдэниһээ үлүүгээр тэдэ үхэлые бэдэрдэг. 22 Үхэлэй нүхэндэ дүтэлхэдөө хүхилдэн баярладаг. 23 Замынь хаагдаһан хүндэ гэрэл хэрэгтэй бэшэ, Бурхан тэрээндэ бэрхэшээл олошоруулна. 24 Эдеэ хоолой орондо намда ёолоон ерээ, нулимсамни уһан шэнги адхараа. 25 Минии жэхын түбэгшөөдэг юумэ намтай ушаржа, минии айдаг юумэн намда ерээ. 26 Намда ажана тайбан гэжэ байхагүй, тэнюун байдал намһаа зайлаа, гай гашуудал ерээ.