‏ Job 30

1Гэбэшье мүнөө ондоо болоо. Наһаар намһаа залуу хүнүүд намайе наадалжа байна. Тэдэнэй өөдэгүй муу эсэгэнэрые хони адуулдаг нохойн һургагшааршье хүлһэлдэггүй һэмби. 2Тэнхээ тамираа алдаһан тэдэ залуушуулые ажалда абахань ашаггүй. 3Үлэн хооһон тэдэ үхэдэл мэтэ 4эзэгүй губи талаар һүниндөө тэнэжэ, үбһэ ногоо таһалжа, гашуун арсын жэмэсээр хоол залгана. 5Хүнүүд тэдэниие харабал, хулгайшаниие намнаһандал хашхаран хотоһоо холо зайлуулдаг. 6Тиин тэдэ зэрлиг амитад мэтэ голой хатаһан һаба соо, 7хээрын һөөг бургааһанай дунда бархиралдан, адаалхай бог үбһэн соо шууялдан сугларжа хононо. 8Нэрэ хүндэгүй тэдэниие хүн бүхэн үлдэжэ гаргадаг.

9Гэбэшье эдэ мэтын өөдэгүй амитад нам тухай шоглон ярижа, дуу зохёохо жэшээтэй. 10Тэдэ намһаа бэшүүрхэжэ, нюур руумни нёлбохоһоо наана болоно. 11Номымни хүбшэргэйе таһа татажа, Тэрэнэй намайе зобоохые хараад, тэдэ юунһээшье гайхахаяа болинхой. 12– 13Хото хүреэлһэн сэрэгэй хэниишье табидаггүй мэтэ эдэ этэгээдүүд замдамни һаад ушаруулжа, намайе алаха туйлдаа хүрэнхэй. Хэншье тэдэниие хориглохогүй байна. 14Тиин тэдэ хотын хэрэмэй сүмэрхэйгөөр зүдхэн ороһон сэрэгтэ адляар сугларан намайе дайрана. 15Минии жэхыдэһэн хүрэжэ, алдар нэрэм һалхинда хиидэһэн мэтэ замхажа, ажана тэгшэ байдал, хүгжэлни үүлэндэл дэгдэн ошоо.

16Удаан зоболондоо шаналан, удахагүй иигээд үхэхэ саг ерээ. 17– 18– 19Һүни бүри яһамни янгинан үбдэнэ. Хүсэтэ Эзэн шэлэ хүзүүнһээмни барижа, шабар шабхада хаян, үнэһэ шорой мэтэ болгоо.

20Эзэн минии! Туһа эрижэ хандахадам, харюу үгөөгүйт. Үндын бодоод хэлэхэдэм, үгэ дуугүйл шэртэхэ юмта. 21– 22Намда хатуу шэрүүнээр хандажа, бүхы шадалаараа хашан, һалхи шуурганда хиидхэн, иишэ тиишэ шэдэлэн байнат. 23Мэдэнэм, хүн бүхэнэй ородог үхэлэй хара нүхэндэ намайе Та оруулхат. 24Дорой амитан би хайрлал гуйхаһаа бэшэ яахабиб. Иимэ хүниие хашан хабшахадаа яана гээшэбта? 25Хүнэй зоболон үзөөд, би адлихан уйлажа, хооһон ядууе үнэн сэдьхэлһээ хайрладаг байгаа бэшэ аалби?

26Би Танһаа аза жаргалай гэрэл абанаб гэжэ хүлеэгөөшье һаа, гуниг зоболоной харанхыда оробоб. 27Махабадымни хёморһон үбшэнүүд диилэжэ, зоболоной үдэрнүүд ерэнхэй. 28Наранай халуун элшэһээ бэшэ, үбшэнэй баршадһаа арһамни харлан хатаба. 29Олонһоо туһаламжа гуйбашье, харюу соносоогүй би сүл губиин сүүбэн шоно, талада хашхарһан тэмээн шубуунда адли болооб. 30Харлаһан арһамни гуужан унажа, яһамни хатажа байна. 31Урданай һайхан сагта ятага лимбын жаргалтай аялгаар дүүрэн байһан байдалнай мүнөө гашуудалай аялгаар тоглоно.