‏ Job 31

1Өөрын эхэнэрһээ бэшые һайшааһан нюдөөр харахагүй гэжэ үнэн сэдьхэлһээ тангариглаа һэм. 2– 3Түгэс Хүсэтын хүн бүхэнтэй тоосоо хэхэдэ, гэмтэй этэгээд гэмээ амасаха гэжэ мэдэнэб. 4Тэрэ ябаһан харгыем хёрхоор адаглан, алхам бүхэниием алданагүй бэшэ аал?

5Хуурмаг ябадалаар бусадые хохидооһон гэжэ намайе буруутан болгобол Эзэн минии амидаралые эхинһээнь шүүхэ ёһотой. 6Үнэн шударгыгаар шүүжэ үзөөд гэмгүйемни тогтооно.

7Хэрбээ замһаа хадууржа, хориглоһон хорилтодо эсэргүүсэжэ, өөрын хүсэлдэ абтан гэм хэһэн байбал, 8минии тариһан ургасые ондоо хүн хуряан эдиг, минии бүхы таримал үндэһөөрөө үхэг. Би тиимэ гэм хээгүйб гэжэ мэдэхэ болоноб.

9Хэрбээ би танилайнгаа эхэнэртэй һамуурха гэжэ үүдэнэйнь хажууда отон хүлеэдэг байһан һаамни, 10– харюудань минии һамган айлай ажалда зарагдажа, ондоо хүн тэрэнэй үбэртэ хэбтэхэ болтогой. 11Иимэ һалихай ябадалай түлөө намайе хатуу шиидхэл хүлеэхэ байгаа. 12Намайе хэтын зоболоной галда хаяхань зүб. Тиигээд минии гэһэн юумэн һэегүй усадхагдаг.

13Хэрбээ ажалшадтаа үнэн шударга буса байгаа һаам, зарасын гомдолоо мэдүүлхэдэнь, хэрэглэнгүй байгаа һаам, 14хожомынь Тэрэнэй хэрэг шүүлгэдэ ошохо нюургүй болоноб. 15Эзэн тэрэниие намдал адли эхын хэбэл соо бүтээжэ, хүн бэеынь адли үгэһэн бэшэ юм гү?

16Үгытэй ядуу хүндэ туһалхаяа татагалзаагүйб. Бэлбэһэн эхэнэрнүүдые би дэмжэн тэдхэжэ, урма зоригыень һэргээдэг байгааб. 17Өөрөө садаһан аад, үншэн ядууһаа хоол харамнажа байгаагүйб. 18Би тэдэниие түрэһэн эсэгэһээнь өөрэгүй адли энхэрээб, бэлбэһэн эхэнэртэ түшэг тулга болооб.

19– 20Үмдэхэ хубсаһагүй ядуушуулда хониной нооһоор хубсаһа оён үгэжэ дулаасуулхадань, тэдэ үнэн сэдьхэлһээ баяр хүргэдэг бэлэй.

21Хэрбээ би танил шүүгшээр тала татан үншэн хүүгэдтэй заргалдан хохирооболни, 22мүрни нюрганһаа һалуужаг, гарни тохоногһоо таһаруужаг. 23Би Бурханай шиидхэлһээ айжа, дошхон хүсэтэ шанарһаань һүрдэжэ, тиимэ гэмые тойрожо ябадаг байгааб.

24– 25Мүнгэ зөөридэ би найдажа ябаагүйб. Баян шадалтайгаараа бардамлажа үзөөгүйб. Алта мүнгые амидаралай үндэһэн болгоогүйб.

26– 27Гэгээн нарые, гэрэлтэ һарые хараад, бурхан болгон һүгэдөөгүйб, гараа таалан һунгаагүйб. 28Тиигэбэл гэмтэ ябадал хэһэн, Дээдэ Бурханиие доромжолһон болохо удхатай һэн хойнонь, хүн сээрлэхэ ёһотой.

29Дайсанай хосорхые хараад, би баярлажа байгаагүйб. 30Хараал табижа, тэдэнэй үхэл үзэхые хүсөөгүйб. 31«Мяхыень эдижэ садабагүйлди» гэжэ ажалшадни нэгэтэшье хэлээгүй. 32Замда ябаһан орохо газаргүй хүниие би газаа хонуулжа байгаагүйб.

33Ондоо хүнүүд шэнги гэмээ нюуха гэжэ оролдоогүйб. 34Зоной муу хэлэ аманһаа зайлажа, угсаатанайнгаа зоной зэбүүрхэлһээ айжа гэртээ хороогүйб.

35Хэн нэгэн намайе шагнахаяа яана гээшэб? Түгэс Хүсэтэ анхаран намда хандаг лэ гэжэ хүсэнэм. Минии гэмтэй гэмгүйе саарһан дээрэ бэшэг лэ. 36Тэрэ тэмдэгыень би энгэр дээрээ хадан, толгойдоо титим болгон үмдөөд ябаха һэм. 37Тайжа мэтэ Бурханда бараалхажа, наһан соогоо гэм нүгэлгүй ябаһанаа яриха һэм. 38Минии гэм зэмэ тухай газар орилхоор, бураздаагайнь гомдохоор 39ургасыень түлбэригүй эдижэ, таряашадые зобоогоогүйб. 40Тиигэһэн байбални, шэниисын орондо адаалхай үүргэнэ, ешмээнэй орондо хог үбһэн ургуужаг.

Иигэжэ Иоов үгэеэ дүүргэбэ.