‏ Job 32

Элиһүүгэй Иоовто болон тэрэнэй гурбан нүхэдтэ хандаһан үгэ

1Иоовой өөрыгөө гэмгүйдэ тоолоһоор байхадань гурбан нүхэдынь арсалдахаяа болибо. 2Тиихэдэнь арсалдааень шагнажа байһан Раам обогой Бүүзэй удам Барахээлэй хүбүүн Элиһүү гэжэ хүн оролсобо. Бурханиие бэшэ, өөрыгөө зүбтэн болгоходонь, Иоовто сухалдаа. 3Гурбан нүхэдэйнь Иоовые буруу болгожо шадаагүй дээрэһээнь тэдээндэ бүришье уурлаба. 4Тэрэ гурбаниинь өөрһөөнь аха байһан хадань Элиһүү Иоовые дуугайхан шагнажа, ээлжээгээ хүлеэгөөд байгаа. 5– 6Ахамад гурбанай Иоовто зохистой харюу үгэжэ шадахагүйдэнь, Элиһүү уурлаад, дуугаржа эхилбэ. Бүүзэй удам, Барахээлэй хүбүүн Элиһүү иигэжэ хэлээ:

– Ахамад таанарай урда би амаа нээхээ аягүйрхэжэ байгааб. 7«Эдэ үбгэд сэсэн һургаал хэлэхэ ёһотой» гэжэ хүлеэһэмни буруу гээшэ ха. 8Һүлдэ һүнэһэн гэжэ хүндэ байха, Түгэс Хүсэтын амисхал тэрээндэ ухаа оруулдаг. 9Гансал үндэр наһан хүндэ мэргэн сэсэниие үгэдэг бэшэ. 10Тиимэ хадань таанар миниишье хэлэхые шагнагты.

11Үгыетнай хүсэн хүлеэжэ, Иоовто харюу үгэхыетнай тэсэбэритэй шагнааб. 12Үгэ бүриие соносоходом, Иоовой гэмтэйе хэншье баталжа шадаагүй, үгэһэн харюудатнай зүб юумэн үгы. 13Өөһэдыгөө сэсэн гээд, «Хүн боложо түрэһэн бидэ Иоовой буруу зүбые баталжа шадахагүйбди, Бурхан лэ шадана» гэжэ болохо юм гү? Энээниие баталхань танайл хэрэг бэшэ юм гү? 14Иоов намда юушье хэлээгүй ушарһаа намда хамаагүй. Харин тэрэнэй намда хандаа һаань, би таанартай адли харюу үгэхэгүй һэм.

15– 16Иоов! Эдэ гурбан хэлэхэ үгэгүй болоһон ушарһаань минии ээлжээн ерээ. 17Бишье өөрын хуби харюулжа, 18һанал бодолоо хэлээгүйдэм, сэдьхэлни амар бэшэ. 19Үзэмэй дараһан архинай һабыень онгойлгоогүй сагта дэлбэ һүрэгшэтэй адли, 20һанамжаяа хэлэжэл һанаам амарха. Хэлэхэ юумэн олон. 21Намайе шагнагты, хэнэйшье тала би барихагүйб. 22Хүн болоһоор би нюур сахижа һураагүйб. Намайе бүтээгшын шиидхэхэ ушарһаа би энээниие тойрожо ябагшаб.
Copyright information for BxrBBL2024