‏ Job 33

Элиһүүгэй хоёрдохи үгэ

1– 2Иоов! Үгыемни анхаран шагныш. Би хэлэхэ юумэеэ хэлэхэм. 3Үнэн шударга сэдьхэлэй оёорһоо мэдэхэ юумэеэ хэлэхэб. 4Түгэс Хүсэтэ Бурханай Һүлдэ намайе бүтээн, ами наһа үгэһэн бэлэй.

5Та үгэдэм харюу үгэхэ хүсэлтэй һаа, үгэ бүхэнөө һайнаар бодожо үзөөд, үнэхөөр зоригтой яряагаа эхилэгты! 6Бурханай урда та бидэ хоёрой эрхэ тэгшэ. Танииешье, намайешье тэрэ шоройһоо бүтээһэн бэшэ гү? 7Намһаа айн ербэхэ хэрэггүй. Би танда шанга эрилтэ табижа, хоолойдотнай хутага тулгана бэшэб.

8– 9– 10«Би ямаршье гэм хээгүйлби. Буруу юумэ үйлэдөөгүйб. Гэбэшье Тэрэ намайе буруудхан дайсан гэжэ тоолохо шалтаг бэдэрнэ. 11Хүлыем тушаагаар тушажа, алхам бүхэниием шалгана» гэжэ хэлэхыеш дуулааб.

12Үнэниие би хэлэһүү. Тиигэжэ хэлэхэшни үндэһөөрөө буруу. Бурханиие хүнтэй жэшэжэ болохогүйл. 13Гомдоходош харюу үгөөгүй хадань Тэрэниие буруудхажа болохогүй. 14Эзэнэй олон аргаар үгэеэ хэлээшье һаань, хүн өөрөө анхардаггүй. 15– 16Харанхы һүни хүнүүдэй унтаандань, зүүдэ үзэгдэл үзүүлэн, шэхэндэнь шэбэнэн, Тэрэ аюулһаа болгоомжолдог. 17Иигэжэ хүниие муу үйлэһөө зайлуулжа, бардамыень заһажа, 18үхэлэй нүхэнһөө зайлуулан, ами наһыень эритэ илдэһээ хамгаалхань олон.

19Зарим ушарта хүнэй зан заһахын тулада үбшэн хүргэнэ. Хүнэй бүхы бэе үбдэжэ, яһа уһаниинь шархиржа, 20эдеэн тээшэ харахашье дурагүй болодог. 21Тарган сула байһан тэрэ хүн арһа яһан болотороо туража, 22үхэлэй эрмэгтэ тулгана.

23Харин мянган Эльгээмэлнүүдэй дундаһаа үмэглэгшэ нэгэниинь тэрэ хүниие хайрлажа, 24зүб замыень заажа үгэхөөр шиидэжэ, «Нүхэндэ унахаһаань тэрэниие абарыт. Би тэрэниие шиидхэлһээ сүлөөлхэ арга олохоб» гэжэ Бурханай урда зууршалаа һаань, 25тэрэ хүн үхэлһөө сүлөөржэ, бэень тэнхэржэ, залуугайхидал адли хүсэ тамиртай болоно. 26Удаань тэрэ хүн Бурханда зальбаржа, Тэрэнэй талархал хүлеэн абаад, жаргалтай болоно. Бурхан тэрэниие гэм зэмэгүй болгоно. 27«Би нүгэл хээб, үнэн зүбые хадууруулааб, теэд Бурхан намайе хэһээгээгүй, 28үхэлһөө сүлөөлһэн ушарһаань би амиды ябанаб» гэжэ зондо бахархан яридаг.

29Бурхан иимэрхүү маягаар хүниие хэдэн удаа үхэлһөө абаржа, 30нарата дэлхэйдэ амиды ябуулха хүсэлтэйгөө харуулдаг.

31Иоов! Ойро зуура амаа хабшаад, минии хэлэхые шагныш. 32Хэрбээ үгыемни шүүмжэлхэ гээ һаа, ярихыеш хэн хорихоб даа. 33Би танда али болохоор үнэн шударга ханданаб. Хэлэхэ үгэгүй һаа, амаа хаа. Би ухаатай сэсэн үгэ хэлэжэ үгэхэб.