‏ Job 34

Элиһүүгэй гурбадахи үгэ

1Элиһүү саашань үргэлжэлүүлбэ:

2– Сэсэн мэргэн таанар, намайе шагнагты. 3Хэлэн, тангалайн хоолой амта танидаг шэнги шэхэн хүнэй үгэ шагнаха дуратай байдаг. 4Бидэ өөһэд соогоо Иоовой зүб бурууе шиидхэхэ ёһотойбди. 5«Гэм зэмэгүй намда Бурхан үнэн шударга бэшээр хандажа байна. 6Өөрын зүбые баталһан би худалшан болохоёо байна гүб? Засаг хуулидань зааханшье зүришөөгүй байхадам ами наһыем абажа байна» гэжэ Иоов хэлэбэ.

7Иоов шэнги уһа ууһандал бэлэхэнээр нүгэлтэй юумэ хэлэжэ байдаг, 8хоро һанаашадтай, этэгээд үйлэ үүсхэгшэдтэй хослодог хүн хаанашье үгы. 9«Бурханай замаар ябахань ямаршье ашаггүй» гэжэ тэрэ хэлээ.

10Сэсэн мэргэн таанар, шагнагты! Бурхан буруу, Түгэс Хүсэтэ шударга бэшэ хэрэг үйлэдэхэ гэжэ байгаагүй. 11Хүн хэһэн бүхы хэрэгтээ тэнсүү харюу Тэрээнһээ абадаг. 12Бурхан муу үйлэ үнэхөөр хэдэггүй, үнэн шударгые хуурмагшалха шанар Түгэс Хүсэтэдэ байхагүй. 13Хэн Тэрээндэ газар дэлхэйе захирха эрхэ үгөө юм? Хэн Тэрээндэ юртэмсэ бүгэдые дамжуулаа юм? 14Дураа хүрөө һаа, Эзэн ами наһа үгэдэг, Өөрынгөө Һүлдэ, Өөрынгөө амисхал хүн бүхэнһөө һөөргэнь бусааха шадалтай. 15Тиигээ һаань, амитай голтой хамаг юумэн хумхиин тооһон болохол.

16Иоов, та өөрыгөө сэсэн мэргэн гэжэ тоолодог хадаа намайе шагнагты. 17Үнэн шударга байдалые үзэн ядадаг Эзэн юртэмсые яажа зонхилхо болоноб? Түгэс Хүсэтэ Эзэниие буруу болгохомной зүб юм гү? 18Хаанда «ши нүгэлтэйш», тайжа ноёдто «хуули эбдэнэш» гэжэ хэлэжэ болодог гү? 19Эзэн тайжанарай нюур харадаггүй, баян хүниие ядууһаа үлүүгээр үзэхэгүй. Юундэб гэхэдэ, хүн бүхэниие Тэрэ Өөрөө бүтээгээ. 20Гэнтын үхэл һүниндөө ерэдэг. Хүлгөөн соо угсаатан арадууд талиидаг. Хүсэтэниие хүсэн унагаадаг бэшэ. 21Эзэнэй мэлмы хүн бүхэнэй замые ажаглан байдаг. 22Хэншье харааһаань зайлажа шадаагүй, гүн харанхыдашье нюугдаха газар байхагүй. 23Иимэһээ Бурханай үмэнэ шүүлгэдэ ошохо саг болзор хүндэ тогтоогдоогүй. 24Хүсэтэниие асуултагүйгөөр усадхан хаяжа, орондонь ондоо хүнүүдые табидаг, урда тээнь хинан шалгаха хэрэг Тэрээндэ гарахагүй. 25Хүн бүхэниие онсогой наряар мэдэхэ ушарһаа, муу этэгээдые һүни дунда усадхадаг. 26Олоной урда гэмтэниие усадхадаг. 27Тиимэ хүнүүд зааһан замһаань хадууржа, хэлэһэн үгыень тоонгүй, 28ядуу зондо дээрэлхүүгээр хандахадань, ядуушуулай орилоон Тэрээндэ дуулдадаг. 29Тэрэнэй харюу үгөөгүй байхада хэн буруушааха юм? Бидэнһээ нюураа нюун байхадань, хэн Тэрэниие хараха юм? Арад үндэһэтэндэшье, хүндэшье адли, 30замһаа хадуурһан нүгэлтэнэй зониие худхуулан хаан шэрээдэ һуухагүйнь түлөө энээниие үйлэдэнэ.

31«Нээрээшье би гэмтэй гээшэ хаб. Гэм хэхэеэ болихом. 32Ойлгоогүй юумыем ойлгуулжа, зүб зам заажа үгыт. Би хэһэн гэмээ дахин дабтахагүйб» гэжэ Бурханда та хэзээ нэгэтэ хэлээ һэн гүт? 33Хэрбээ та буруугаа мэдэрэн зүбшөөхэ дурагүй юм һаа, Эзэнһээ һайн харюу абаагүйдөө гайхаха хэрэггүй. Энэшни намда хамаагүй, танайл шиидхэхэ хэрэг. Энэ үгыем та буруушаахагүй ёһотойт.

34– 35Минии үгэ шагнаһан ухаатай зон «Иоов гээшэ юумэ мэдэхэгүй хүн байна» гэжэ хэлэхэдээ болохо байна. 36Бурханиие тоодоггүй зондол адли харюусадаг ушарһаа Иоовой Тэрээнһээ хатуу сээрлэл абаха зүб. 37Иоов өөрөө нүгэл шэбэл үйлэдэжэ тогтоогүй, бидэнэй урда Бурханиие наадалжа, зүрилдэжэ байна.