‏ Job 35

Элиһүүгэй дүрбэдэхи үгэ

1Элиһүү үргэлжэлүүлбэ:

2– Иоов, Бурхантай өөрыгөө сасуулан, өөрыгөө Бурханһаа үлүү шударга гэжэ тоолохо хэрэггүй. 3«Минии нүгэл хилэнсэгүй амидарал намда ямар ашагтай юм?» гэжэ хэлэнэш. 4Би энээндэшни, шамда ба шинии нүхэдтэ харюу үгэхэм:

5Хүхэ тэнгэри өөдэ харыт. Хүрэжэ болошогүй үндэртэ үүлэнүүд хөөбэлзэн байна. 6Энээндэл гэмтэ амидаралтнай Бурханда хүрэшэгүй холо. Тооложо барашагүй нүгэл хээшье һаа, Тэрэниие хохироожо шадахагүй. 7Мүн баһа гансашье гэм хээгүйб гээд, Тэрээндэ юу үгэхэбши? Энээгээрээ та Тэрээндэ туһа хүргэнэ бэшэт. 8Гэмтэ ябадалаараа өөртэйгөө адли бусад хүнүүдыел хохирооно бэзэт. Һайн үйлэ хэбэл, хүнүүдтэ туһатай. Харин юртэмсын Эзэндэ энэ бүхэн хамаагүй.

9– 10– 11Зобожо дарлагдаһан хүнүүд уйлан ёоложо, хархис этэгээдүүдэй һабарһаа гараха гэжэ тэгүүлбэшье, тэдэниие Бүтээгшэ хэсүү үедэ туһалжа шадаха гү гэжэ ойлгодоггүй. Хүнүүдые бүтээхэдээ, арьяатан амитантай, жэгүүртэн шубуунтай жэшэмээр бэшэ ехэ ухаа үгэһэниинь ушартай гэжэ ухаалдидаггүй. 12Тэдэ Тэрэниие тоонгүй омог бардам байдаг ушарһаа хэсүү үедэ туһа гуйхадаа Тэрээнһээ харюу абажа шадахагүй хадаал дэмы уйлан ёололдоно. 13Түгэс Хүсэтэ Бурхан хүнүүдэй гуйлтые хэрэгсээдэггүй.

14Тэрэниие харанагүйб, Тэрэниие хэрэг шүүлгэдэ ерэхыень хүлеэнэб гээ хадаа хүлеэхэл болоош. 15«Тэрэ хадаа гэмтэ хүниие анхарангүй, гэмтэ хэрэгые шиидхэнгүй үнгэрдэг» гэжэ дэмы хэлэхышни тоохо болихо хэрэг үнэндөө Тэрээндэ байна гү? 16Иоов үнэндөө юушье мэдэхэгүй аад, дэмы үгэ дуугаржа байна.
Copyright information for BxrBBL2024