‏ Job 36

Элиһүүгэй түгэсхэлэй үгэ

1Элиһүү үгэ хүүрээ үргэлжэлүүлэн, иигэжэ хэлэбэ:

2– Тэсэжэ шагнабалшни, Бурхан тухай юу хэлэхэ һанаатай байһанаа шамда харуулхаб. 3Би мэдэлгэеэ алас холоһоо абажа, зүб байдалые Бүтээгшэдэ хамааруулнаб. 4Би гансашье худал үгэ аманһаа унагаангүй, үнэнииел харуулнаб.

5Түгэс Хүсэтэ болобошье, Тэрэ хатуу сэдьхэлтэй хүниие хүлеэн абаха. 6Гэмтэй хүнүүдые удаан амиды байлгадаггүй, зобожо дарлагдаһан хүниие шударгы хамгаалдаг. 7Гэмгүй хүндэ тэрэ хайраяа үршөөжэ, хаан мэтэ хүндэтэй болгодог. 8Зарим нэгэниинь нэрэтэй болоходоо, бэеэ магтан һайрхаһаар буруутажа, түрмэдэ хаагдаһан гэнжэтэй гэмтэн мэтэ болоходонь, 9бардам занһаа боложо гэм хэһыень Тэрэ харуулжа, 10буруу замһаа зайлаха эрилтэ табина. 11Хэрбээ тэдэ Тэрэнэй үгэ дуулан, зааһан замдань оробол, байдалынь һайжаржа, үлэһэн наһа үедөө элбэг жаргалтай болоно. 12Тэрэнэй үгэ дуулаагүй һаа, үнэн байдалаа ойлгонгүй ябаһаар эритэ зэбсэгһээ наһа барана.

13Бурханиие сэгнэдэггүй зон хоро һанажа ябадаг, түрмын оёорой гэмтэн болоһоншье һаа, Тэрээнһээ туһаламжа эридэггүй. 14Тиигэжэ тэдэ эдир наһандаа янхан эрэшүүлэй дунда худхаһаар үхэдэг ушар олон. 15Гэбэшье зобоһон хүниие Тэрэ абардаг, зобохо үедэнь дарлагдагшатай ярилсадаг.

16Тэрэ таниие зоболонһоо абаржа, аюулгүй, түбшэн зохид, унда хоолтой элбэг дэлбэг амидарал үгэхэ хүсэлтэй. 17Харин та гэмтэн мэтэ шиидхүүлхэ тухай бодожо байнат. Хуули шүүлгэ, шиидхэл сааза тухай һанаа сэдьхэлээ табинат. 18Хэзээ нэгэтэ хэрэг шүүхэдээ эдилгэ абаһан байжа болоо хат. Харин мүнөө шүүлгэбэл, зөөри хүрэнгэтнай таниие хамгаалжа шадахагүй. Иигэжэ бэеэ бү мэхэлэгты. 19Хүнэй эд хүрэнгэ, хүсэ шадал Бурханай шиидхэлһээ зайлуулхагүй. Тиимэ аргаар хосоролһоо холодохогүйт. 20Һүни дунда наһа бараашье һаа, шиидхэлһээ зугадахагүйт. 21Зоболон гаталхын тулада ондоо зам шэлэхэ болонош. Тиигээгүй һаа, Бурханай үмэнэ улам буруутахат. Таниие ондоо замда оруулхын тулада Тэрэ туршалга хэжэ байна.

22Тэрэнэй хүсэ шадалай хэр зэргые мэдэнэ гээшэ гүт? Тэрээнтэй тэнсэхэ багша үгы. 23Хүнэй ухаан хажуудань юуншье бэшэ. Хэн Тэрэниие һургажа шадахаб? Хэн Тэрэниие буруудхаха эрхэтэйб? 24Хүнүүд хэһэн юумыень магтан дурдадаг. Танайшье тиигэбэл, зохистой. 25Бүхы хүнүүд тэдэ хэрэгүүдые хаража болоно. 26Түгэс Хүсэтэ Тэрэниие гүйсэд ойлгохын аргагүй. Эгүүридэ оршодог Бурханиие ойро зуура амидардаг бидэ ухаандаа багтаажа шадахагүйбди.

27Бурхан газар дэлхэйһээ уһа уурал дэгдэхээжэ, бороогой үүлэн болгон хубилгана. 28Тэрэ үүлэнһээ хура бороо орожо, бүхы дэлхэйе уһална. 29Бурханай бороогой үүлэ нүүлгэжэ, тэнгэри дуугаргадагыень хэн ойлгожо шадахаб? 30Үүлэнэй забһараар наран харагдажа, хүрьһэтэ дэлхэйдэ, далайн гүндэ гэрэл тудана. 31Иимэ аргаар Тэрэ хүнүүдые шиидхэхын зэргэ элбэг дэлбэг ургаса хайрладаг. 32Бурханай гарта сахилгаан байха, Тэрэнэй зааһан тээшэ буудал буудаг. 33Хүхэ тэнгэридэ һүрөөтэ абяанай дуулдахада, һалхи шуурган эхилхэнь гэжэ үхэр малшье ойлгодог.