Job 37
1Тэнгэри дуугархадань, айдаһамни хүрэжэ, зүрхэмни дэлбэ гарахаа һанана. 2Энэ аймшагтай дуун Тэрэнэй аманһаа гараһан бололтой. 3Тэнгэриин дуун дэлхэйн нэгэ захаһаа нүгөө заха хүрэтэр дуулдажа, сахилгаан нэбтэ шобто сахилна. 4Энэнь хадаа Хүсэтэ Эзэн һүр жабхалантай дуу хоолойгоор үгэ хэлэһэн мэтэ. Дуу сахилгаанда хизаар байхагүй. 5Тэрэ үгэеэ хэлэжэ гайхамшаг хэрэгээ бүтээдэг. Хэн энээниие ойлгожо шадахаб? 6Тэрэнэй зарлигаар саһан орожо, бороо шудхана. 7Тэрэнэй хэрэгүүдые бүхы зоной мэдэхын тулада хүсэ шадалаа иигэжэ харуулдаг. 8Хээрын зэрлиг амитад эшээндээ хороно. 9Урда зүгһөө хүсэтэ һалхин буудаг, хойто зүгһөө хүйтэн ерэдэг. 10Тэрэнэй хүсөөр гүнзэгы уһан, үргэн гол мүльһэтэн хүрэнэ. 11Тэрэнэй хүсөөр тэнгэриин үүлэндэ ехэ уһан сугларжа, тэгэн дундань сахилгаан сахилдаг. 12Тэрэнэй хүсэлөөр үүлэн нүүжэ, үгэ бүхэнииень дуулан дахана. 13Бурханай шиидхэбэреэр нэгэ газарта хайра, нүгөөдэ тээ хэһээлтэ буужа байдаг. 14Иоов, та минии үгэ анхаран шагнагты. Бурханай бүтээһэн гайхамшагта юумые бодоод үзыт. 15Тэрэнэй зарлиг үүлые захиржа, сахилгаа сахилуулха гэжэ мэдэхэ гүт? 16Үндэр тэнгэридэ үүлэнэй хайшан гээд тогтохые мэдэхэ гүт? Тэрэнэй мэдэсэ, бүтээһэн хэрэгүүдынь гайхал түрүүлдэг. 17Урда зүгһөө бүгшэм ерэхэдэнь, хубсаһаал тайлажа шаданат. 18Тэрээндэ адли шудхамал толи мэтэ сэлмэг тэнгэриие бүтээжэ шадаха гүш? 19Тэрээнтэй юугээ ярихаашье мэдэхэгүйш. Та бидэндэ заажа үгэхэ гүт? Энэ харанхыда юушье ойлгонобди. 20Би Тэрээнтэй яринаб гэжэ хэлээгүйб. Агуу хүсэниинь ерэжэ усадхана аа гү гэжэ айжа байнаб. 21Үүлэнэй саанахи наран харагдахашьегүй һаань, һалхин үлеэжэ үүлые тараадаг. 22Тэнгэриин хойто хаяада сугларһан үүлэн наранай гэрэлдэ алтан мэтэ туяаран харагдадаг. Бурханай ойро алтан үүлэнтэй жэшэхээр бэшэ бүришье һүрөөтэй. 23Хэн Түгэс Хүсэтэдэ ойртожо шадахаб? Агууехэ хүсэтэй аад, тэрэ хүнүүдые дарладаггүй, үнэн шударгыгаар харилсадаг. 24Тиимэ дээрэһээнь хүнүүд Тэрэниие үргэмжэлэн хүндэлдэг. Хэршье ухаатай һаа, Тэрэнэй урда юуншье бэшэбди.
Copyright information for
BxrBBL2024