‏ Job 38

Бурхан Иоов хоёрой үгэ андалдаан

1Хара һалхин сооһоо Иоовто Эзэн харюусаба:

2– Ши юумэ мэдэхэгүй аад, Минии хүсэл зорилго тухай яриха гэжэ оролдохо ямар эрхэтэй юмши? 3Зориглон бүһэеэ бүһэлжэ, Минии табиһан асуудалда харюуса.

4Энэ дэлхэйе бүтээжэ эхилхэдэм ши хаана байгаа юмши? Оршолоной яажа бүтэдэгые ойлгодог һаа, ши тайлбарилжа үгэ. 5Дэлхэйн хэмжээ хизаарые хэн тогтооһон бэ? Бүтээхэдээ, хэн ооһор татажа хэмжэһэн юм бэ? 6Газар дэлхэйн үндэһэн юун дээрэ табигдаһан бэ? Хэн дэлхэйн тулаха углуугай шулуу тогтоогооб? 7Тэрэ үедэ үглөөнэй одод баярлан дуулажа, Бурханай хүбүүд согтой хашхаржа байгаа.

8Гүн далайн газар дороһоо нэбтэрэн гарахадань хэн үүдыень хаажа хизаарлаһан байнаб? 9Тэрэ үедэ Би захагүй далайда үүлэн хушалта нэмэржэ, харанхы оршон тогтоогооб. 10– 11Би Өөрөө далайн үүдэ хаагаад, «Хүсэтэ долгиншни энэ хүрэтэр хүрөөд, саашаа дэлбэржэ болохогүй» гэжэ зарлиг буулгахадам, хэн гүйсэдхөөгүй байгааб?

12Иоов, ши наһан соогоо зарлиг буулган үүр сайлгажа үзэһэн гүш? 13Гэрэлтэ үглөөе дэлхэйдэ түхөөжэ, дэлхэйн захаһаа барижа һэжэрээд, харанхы һүни гэм хэдэг хүнүүдые тонилгоһон гүш? 14Үүр сайхада, хада уулын, тала хүндын илгаань шабар дээрэ тамга табижа зураһан мэтэ тодорно. 15Үдэрэй һаруул ерэхэдэнь гэмтэ хэрэгтэн хорото ажалаа хэхэ аргагүй боложо, хүсэ шадалынь бууража, гарынь хухарһан мэтэ болодог.

16Ши далайн гүнзэгыдэ орожо, эхи захыень үзөө һэн гүш? 17Үхэлэй үүдэн гэжэ мэдэхэ гүш, шэб харанхын үүдэ хэн шамда харуулааб? 18Дэлхэй юртэмсын хэр зэргэ уужам болохые ши мэдэхэ гүш? Эдэ бүгэдые ши мэдэхэ һаа, Намда харюу үгэ.

19Гэрэл харанхы хоёрой хаанаһаа ерэдэгые ши мэдэхэ гүш? 20Тэдээниие өөрын дураар захиржа шадаха гүш? 21Энэ дэлхэйе бүтээхэ үедэмни ши хажуудам байжа, хизааргүй үндэр наһа наһалһан мэтэ яридаг ушарһаа энэ бүхэниие мэдэхэл ёһотойш.

22Дай дажар зогсоохын тулада зарим үедэ саһа мүндэр оруулдагби. 23Тэрэниие хаана бэлдэн нөөсэлдэгым ши хараһан гүш? 24Ямар ушарһаа сахилгаан сахилжа, зүүн зүгһөө һалхин үлеэдэг бэ?

25– 26– 27Бороогой ороходо эзэгүй тала губинууд ундалдаг. Уһа уужа садахадаа, үбһэ ногоо ургуулдаг. Хэн энэ бороогой орохо, шуурганай хүдэлхэ нүхэсэл тогтоодог бэ? 28Хура бороо, шүүдэрэй уһан хүнтэй адли түрэдэг гэжэ гү? 29Гол нуурай уһанай, газарай хүрьһэнэй шулуун мэтэ хүлдэхэдэ, 30тэрэ саһан мүльһэн сэбдэг хүйтэн эхын хэбэлһээ түрэнэ гэхэ гүт?

31Ши Зургаан мүшэдые хоорондонь холбожо, Гурбан һогоониие һалган илгажа шадаха гүш? 32Жэлэй дүрбэн уларил соо одо мүшэдые зохихо байрадань табижа шадаха гүш? Долоон үбгэдые ши захиржа шадаха гүш? 33Тэнгэриин хуули ши түгэс мэдэжэ, дэлхэйн зүй гурим тогтоожо шадаха гүш?

34Үүлэдтэ захиралта үгэжэ, бороо оруулжа шадаха гүш? 35Сахилгааниие зонхилходош, 36тэрэ «Зай, би бэлэн» гэжэ хэлэхэ гү? 37– 38Энэ ехэ оюун ухаае хэн бии болгоһон бэ? Хүхэ тэнгэриһээ уһа сүршэжэ, хуурай шоройе норгохо гээшэ хэнэй захиралтаар хэгдэһэн бэ?

39– 40Арсаланай үлэн гүлгэдэй эшээндээ хоол хүлеэхэдэнь, ши эхэ арсаланда хоол олгожо шадаха гүш? 41Хирээгэй үлэн дальбараахайнуудай хоол эрин хушуугаа ангайлгахадань, ши эхэ хирээдэ хоол үгэжэ шадаха гүш?