‏ Job 39

1Зэрлиг амитадые ши өөрын дураар захиржа шадаха гүш? Янгир ямаанай эшэгэлхэ сагые шиидхэжэ шадаха гүш? Зэрлиг һогооной тугаллаха үедэ хажуудань байдаг гүш? 2Һогоон хэды һара хээлитэй байдагынь хэлэхэ гүш? Тугаллаха сагынь тогтоожо шадаха гүш? 3Һогоонууд үбдэжэ зобон тугалладаг. 4Тугалынь хээрэ талада дураараа үдэжэ, хүсэ шадал ороходоо, унаһан газараа орхин ошодог. Ши тэдээн тухай хэр зэргэ нарин мэдэн захиржа шадахабши?

5Хээрын зэрлиг элжэгэндэ тэрэ сүлөөтэ амидаралыень хэн үгэһэн бэ? 6Хужартай хооһон талые тэрэнэй гэр орон болохые Би шиидэжэ тогтоогоо һэм. 7Зэрлиг элжэгэн хотын шууяанһаа хулжан ошожо, хүнэй гараар тэрэниие һурган унахын аргагүй. 8Уулын нюруугаар дамжан бэлшэжэ, ногоо оложо эдинэ.

9Зэрлиг үхэр ажалдашни зүдхэжэ, тэбшын дэргэдэ бүхэли һүни зогсохые хүсэхэ гү? 10Ши тэрээндэ анзаһа хүллэжэ, газар хахалжа шадаха гүш? 11Шадал ехэтэй зэрлиг үхэртэ найдажа, хүндэ ажалаа хүүлэжэ шадаха гүш? 12Тэрэнэй хүсөөр ургасаа хуряагаад, таряа сохидог газарта хүргүүлжэ шадаха гүш?

13Тугас шубуунда үнгэтэ дали, тэмээн шубуунда ниидэхэшьегүй һаань, үдэ ши үгөө һэн гүш? 14Тэмээн шубуун газар дээрэ үндэгэлэн хээрын дулаахан шоройдо үндэгэеэ хадагалдаг. 15Хээрын амитан хүн үндэгыем гэшхэнэ гэжэ тэрэ һанаа зобохогүй. 16Тэрэ шубуун өөрын үндэгые үри гэжэ тоолохогүй, бүхы оролдолгом дэмы болохо гэжэ ойлгохогүй байна. 17– 18Бурхан тэрээндэ сэсэн ухаан үршөөгөөшьегүй һаа, хурдан хүл, мори ахиха шадабари үгөө.

19Ши хүлэг мориндо шадал үгэжэ, хүзүүень намирһан дэлһээр хушаһан гүш? 20Шааруул мэтэ дүүлин харайха шадабари тэрээндэ үгөө гүш? Сошомо шангаар турьяха һүр солгёо ши тэрээндэ үгөө гүш? 21Солгёон хөөрүүгээр туруугаараа газар сохин, шадал соогоо урагшаа тэгүүлэн байлдаанда ороно. 22Аюул тэрэ тоохогүй, хурса һэлмэһээ багаханшье һүрдэхэгүй. 23Эзэнэйнь номо һаадаг һэлжэгэнэн, наранай гэрэлдэ жадань ялалзана. 24– 25Хүлэг мориной амыень татаха хэсүү болоно. Бүреэгэй абяа дууламсаараа морид шангаар турьян дүүлинэ. Хүлэгүүд холоһоо тулалдаанай охи үнэр абажа, сэрэгэй удамаршын хашхараа соносоно.

26Харсага шубуунда урда зүг ниидэхэ ухаа ши үгөө гүш? 27Шинии хүсэлөөр бүргэд далияа дэлгэн үндэр тээшэ дүүлижэ, уулын орьёлдо уурхайгаа түхеэрдэг гү? 28– 29– 30Тэрэ шубуун эгсэ хабсагайда уурхайгаа барижа, тэрэ үндэрһөө олзо хараашалан, дальбараадаа шуһа амасуулна. Үхэһэн һэеын холошье һаань, хурса нюдэтэй бүргэд заатагүй ерэхэ.

Иоовой шаналалга

31Эзэн Иоовто хандажа асууба:

32– Түгэс Хүсэтэ Намтай үгэ буляалдаха һанаатай байнаш. Намайе буруу болгохо үгэ байна гү? Ямар харюу үгэхэ байнаш?

33Иоов иигэжэ харюусаба:

34– Танай хажууда би хэн гээшэбиб даа. Хэлэхэ юумэн намда үгы. Амаа таглаа һаамни дээрэ. 35Энээнһээ урда би Танда хандан, хэдэн удаа яриһан байнаб. Оройдоошье абяа гарахаяа болёоб.