‏ Job 4

Элипаазай Иоовто хандаһан үгэ

1Удаань Тэмаан ороной Элипааз харюу хэлэбэ:

2– Минии үгэ тэбшэхэ гүш? Хэлэнгүй байхын аргагүй байна. 3Ши олон хүндэ ухаа заажа, һал унаһан хүниие хүсэ оруулдаг бэлэйш. 4Бүдэрһэн хүниие тэнхэрүүлдэг, сүхэрэгшые үгөөрөө тэдхэжэ туһалдаг байгааш. 5Харин зоболоной өөртэшни буухадань һал унааш, зоболон бэеэрээ үзэхэдөө, урма зоригшни хухараа. 6Бурханай үмэнэ бэшэрэн һүгэдэлгэ шинии этигэл, үнэн шударга замаар ябаһаншни шинии найдабари бэшэ юм гү? 7Һанаад үзыш: гэмгүй аад, хэн мүхэһэн байнаб? Хаана шулуун шударга хүнүүд һүнөөгдэжэ байгаа юм бэ? 8Харин би хараһан байнаб: нүгэлэй таряаланда зоболон таригшадта тэрэнь өөһэдынь толгой дээрэ буудаг. 9Бурханай амисхалһаа тэдэ хосордог, Тэрэнэй уур хилэнсэгэй хүсэтэ сохилтоһоо һүнэн ошодог. 10Дошхон арсалангууд шангаар хэрхирнэ, теэд залуу арсалангуудай шүдэнүүд һуга татуулан абтанхай. 11Эдишэеэ олохоо болиһон арсалан үхэжэ, гүлгэдынь бутаран тараба. 12Намда нэгэ үгэ нюусаар ерэжэ, шэхэндэмни шэбэнээн дуулдаба. 13Харанхы һүни аймшагтай зүүдэ зүүдэлээд, 14үхэн айжа, яһа мүсэмни шэшэргэнэбэ. 15Нюурайм хажуугаар һүнэһэнэй үнгэрэн гарахада, толгоймни үһэн үрзыхэдэл гэбэ. 16Тогтоод хажуудам байгаа, теэд түхэл дүрсыень илган танижа шадахагүй байбаб. Аниргүй байдал. Удаань би үгэ дуулабаб:

17– Хүн түрэлхитэн Бурханай үмэнэ гэмгүй байжа шадаха гү? Хүн өөрын Бүтээгшын үмэнэ сэбэр байжа шадаха гү? 18Тиигэжэ Өөрын зарасанарташье Тэрэ этигэдэггүй, Эльгээмэлыньшье урдань буруу байдаг. 19Шабар гэртэ һуудаг хүндэ найдахын аргагүй. Тэдэниие усадхахань хорхой алахаһаа бэлэн. 20Үглөөгүүр амиды байһан хүн үдэшэ хосордог. 21Иигэжэ амидаралай удха ушарые ойлгоогүй байтарынь, үхэл гэнтэ гэрэй тооноор сүмэрэн унахал.
Copyright information for BxrBBL2024