Job 40 | BxrBBL2024 | STEP | Эзэн хүсэтэ шуурган сооһоо Иоовто харюусаба:

‏ Job 40

Эзэн Иоовто бүтээлнүүдээ үзүүлнэ

1 Эзэн хүсэтэ шуурган сооһоо Иоовто харюусаба:

2 – Зоригтой бодожо, Минии табиһан асуудалда харюу үгэ. 3 Ши Намайе шударга бэшэ гэхэшни гү? Өөрыгөө зүб болгохын түлөө ши Намайе буруудхахашни гү? 4 Ши өөрыгөө Бурхантай адли хүсэн түгэс гэхэшни гү? Шинии дуу хоолой Тэрэнэй нэрьеэн шэнги шанга һүртэй гү? 5 – 6 – 7 – 8 Үндэр нэрэ алдараа суурхуулхын тулада оршолоной дээдэ һүр жабхалан олыш. Тиигээд хүн түрэлтэнэй гэмтэ байдалые элишэлэн, омог бардам хүн бүхэниие доошонь даража шиидхыш. Бүгэдын нюдэн дээрэ гэмтэ зондо нэгэ мүһэн шиидхэл буулган усадхажа, үхэлэй хубсаһа үмэсхүүлээд, газарта булыш. 9 Хэрбээ энээниие хэжэ шадабалшни, Би шамайе хүндэлэн магтахаб.

10 Бегемот гэжэ амитаниие хүнүүдтэй адли бүтээгээб. Тэрэ үхэр мэтэ үбһэн тэжээлтэй. 11 Шүрбэһэлиг хүлынь харыш, ууса бэень ямар һүрөөтэйб даа. 12 Һүүлынь хүдэлхэдөө, хуша модон мэтэ, хүлэйнь булшангууд шулуун мэтэ хатуу. 13 Хүрэл хоолой мэтэ яһатай, түмэр бахана мэтэ хүсэтэй. Энэ хадаа Минии бүтээһэн зэрлиг амитанһаа эгээл һүрөөтэйнь. 14 Бүтээгшэ Эзэн Бил тэрээниие номгоруулан диилэжэ шадахаб. 15 – 16 Зэрлиг амитадай тэршэлэн ябадаг уулаһаа тэрэ тэжээлээ оложо, адаалхай һөөг доро амаран хэбтэжэ, намагай ожорһон соо бэеэ нюуна. 17 Голой бургааһан, һөөг модон тэрээниие халуун наранһаа хамгаалжа шадана. 18 Иордан голой үерлэжэ, амандань туласа хүрөөшье һаань, энэ амитан һэншье гэхэгүй. 19 Хараһаар байтарынь нюдыень халхалан барижа шадаха гүш? Урьхадан барижа, хоншоорынь нүхэлөөд, бурантаг үлгэжэ шадаха гүш?

20 Ши Левиатан ^{▼▼ Левиатан – Иоов 3:8 хара.} гэжэ аймшагтай амитаниие загаһашанай дэгээгээр урьхадан баряад, хэлэнһээнь ооһорложо шадаха гүш? 21 Хоншоортонь сахариг, үрүүндэнь дэгээ хээд, хүтэлжэ шадаха гүш? 22 Тэрэ шамһаа айн шэшэржэ, үршөөл хайра гуйха гү? 23 Тиигээд шамтай хэлсээ баталан, бүхы наһаараа зарасашни болохо гү? 24 Ши тэрээниие гэрэй тэжээбэри шубууе мэтэ хаажа, басагадтаяа наадхуулжа шадаха гүш? 25 Ханаһаанай наймаашад мяхынь эбдээд, хоорондоо хубаажа, хэсэг хэсэгээр худалдажа шадаха гү? 26 Ши тэрээниие жадаар хадхан агнажа, толгойень загаһанай һэрээгээр сүмэлжэ шадаха гүш? 27 Ши нэгэ удаа тэрэниие барижа шадабал, наһан соогоо мартахагүй һургаал абахаш.