‏ Job 5

1Дуудахадаш харюусаха хүн байгаа юм гү? Гэгээнүүдэй алиндань хандаха болонош? 2Уур сухалынь тэнэгые үхэлдэ асарна, атаархал гэнэн нэгэниие үхүүлнэ. 3Тиимэ нэгэ тэнэг баяниие хараа һэм. Һуурижажа үрдеэшьегүй байһан тэрэнэй гэрынь уданшьегүй хараалда ороо бэлэй. 4Тэрэнэй хүүгэдтэ хэншье туһалхагүй, гэмнэлгын газарта хүүгэдыень шүүн шиидхэхэдэнь, үмэглэхэ хүн олдохогүй. 5Ядуушуул тариһан таряаень хуряан эдихэ, хадхууртай хашаа дээгүүрнь үбһэ ногоо хулгайлан шэдэхэ. Мүнгэндэ уланхатагшад зөөридэнь һанаархаха. 6Гай зоболон газар дороһоо ургадаггүй, гашуудал шоройһоо бии болодоггүй. Хүнэй буруу ябадалһаа гарадаг. 7Галай ошоной дээшээ харбадагтал хүн зоболонгой түлөө түрэдэг. 8Би шам шэнги һаа, Бурханда хандажа, ушараа хэлэхэ һэм. 9Тэрэнэй хэрэгүүд агууехэ, ухаанда орошогүй, гайхамшаг зүйлнүүдынь тоо томшогүй. 10Тэрэ газар дэлхэй дээрэ хура бороо оруулна, таряалан дээрэ уһа эльгээнэ. 11Доройтоһониие өөдэнь татажа, бэлбэһэн ядууе хамгаалан тэдхэдэг. 12Мэхэшэдэй түсэб нураажа шадана, тэдэнэй гарһаа амжалта алдагдана. 13Тэрэ мэргэн ухаантайшуулые мэхэ гохоорнь баридаг, хэдышье сог залитайгаар забдаа һаань, тэрээнииень үрэ дүнгүй болгодог. 14Тэдэндэ гараха газар үгы боложо, гэгээн үдэр гэнтэ харанхы боложо, наран шэнгэһэн мэтэ болодог. 15Хүсэтэй нэгэнэй хүсэгүйе дарлахада Тэрэ зогсоожо, ядуушуулые хүсэтэнэй һабарһаа абардаг. 16Тэрэшэлэн ядуушуул этигэл найдабари абажа, бузар булайе үүсхэгшэд амаяа хаахаһаа ондоо үгы болоно.

17Бурханһаа һургаал абажа, зан заншалаа заһуулһан хүн үнэхөөр азатай. Тиимэһээ Түгэс Хүсэтын хэһээлтэһээ бү жэгшэ. 18Тиигэжэ үбэдхөөдэг ба шархые боожо үгэдэг. Тэрэнэй мутарһаа гэмтээд, Тэрэнэй хүсөөр эдэгэһэн мэтэ болодог. 19Долоон гай гамшагһаа доройтоошье һаа, удаань ши сэхэрхэш. 20Үлэсхэлэнэй үедэ үхэлһөө Тэрэ абарха, дайнай үедэ эритэ мэсэһээ зайлуулха. 21Энгэй үдэрнүүдтэ хоб жэбһээ хамгаална. Тойроод хамаг юумэнэй һүнөөшье һаа, ши тэрээнһээ бү ай. 22Үгырэл сүйрэл, үлэсхэлэн зоболон, зэрлиг арьяатан – алинһааншье айха хэрэггүй. 23Шулуу шоройшье һаа, шамда түшэг болохо, хээрын амитан шамтай эбтэй байха. 24Орон гэртээ тайбан һуужа, хашаа һарабшашни бүтэн байха. 25Үрэ хүүгэдшни үдхэн үбһэ ногоон шэнги үнэр олон байха. 26Амидаржа ханаад, наһанай туйлда ши хүрэхэш. 27Энэ үнэниие арайхан ухаалдижа олоһомнай энэл даа, шишье баһа мэдэжэ абабал, үлүү болохогүй.
Copyright information for BxrBBL2024