‏ Job 6

Иоовой харюу

1Иоов иигэжэ харюусаба:

2– Минии зоболон жэнгээр хэмнэбэл, далайн бүхы элһэнһээ хүндэ байхал. 3Тиимэһээ би дэмы шашажа һуунаб даа. 4Түгэс Хүсэтын һомонууд минии дотор, тэдэнэй хорые һүнэһэмни уужа байна. Намайе айлгаха бүхы аргануудые Тэрэ хэрэглэхэ мэтэ.

5Ногоондо бэлшэһэн хулан хашхарха гү? Үбһэ тэжээлэй тэбшын хажууда үхэр мөөрэхэ гү? 6Дабһагүй хоол хэн эдихэб? Үндэгэнэй сагаанда амтан байха гү? 7Үгэшни намда иимээр лэ һанагдажа байгаа ушартаа би хүлеэн абажа шадахагүй байнам. Ойшоон үзэбэл, хоротой хоол эдиһэн мэтэ болоно.

8Минии хүсэһэниие Бурхан юундэ үгэнэгүйб даа? 9Ами наһыем Тэрэ абаа һаань, би ехэ баярлаха байгааб. 10Дууһашагүй зоболон минии эсэс болоно. Ямаршье хэсүү үедэ би арюун Эзэнэй үгэдэ зүрилдөөгүйб даа. 11Энээнһээ үлүү тэсэбэри намда байхагүй. Этигэл найдабаримни мүхэжэ, минии үхэлэй ямар хадань би тэсэхэ болонобиб? 12Би хада шулуун шэнги шанга бэшэб, минии бэе хүрэлөөр шудхаһан бэшэ. 13Туйлдаа хүрэтэр ядарһан намда тулаха найдабари үгы.

14Сүхэрһэн хүн Түгэс Хүсэтэһөө һүрдэхэ, гэбэшье анда нүхэдһөө энэрэл байха бэлэй. 15Гэхэдэш таанар хаа-яа шэргэһэн, хаа-яа үерлэһэн горхон мэтэ найдабаригүй байнат. 16Уулын саһа мүльһэнэй хайлахада иимэ горхон сэлхэлзэн харлабашье, 17халуун наранай гарахада хатажа шэргэдэг. 18Тэмээн хамбы тиимэ горхонһоо уһа ууха гэжэ зорин ошоходоо, ангажа үхэхэ туйлдаа хүрэдэг. 19Тэмаа хотын тэмээн хамбышадай, Шэбаа хотын аяншадай дэмы найдаһан ушар олон. 20Губиин элһэн соо үгы болоһон уһа горхондо найдаһандаа тэдэ сүхэрөө. 21Таанар мүнөө тиимэшүү байдалтай хадаа намда туһалжа шадахагүйт. Минии зоболон хараад һүрдэжэ байнат. 22Би таанарһаа мүнгэ эринэ гүб? Өөрын зөөриһөө минии түлөө үргэ гээ һэн гүб? 23Үгы гэбэл, дошхон дайсанай һабарһаа абарыт гэжэ гуйгаа һэн гүб? 24Намайе һургагты, тиихэдэтнай би абяагүй болохоб. Гэмыем заажа үгэгты. 25Үнэн үгэ тэсэжэ шагнахань хэсүү байна, теэд тэрээнһээ ямар үрэ гарахаб? Минии бурууе баталаа бэшэт. 26Сүхэрһэн хүнэй үгэ һалхин мэтэ үнгэрдэг гэжэ бодоод, үгыем буруудхаха гэжэ байна гүт? 27Таанар үншэн хүнэй түлөө жээрэб хаяжа, анда нүхэрөө богоол болгон худалдаха этэгээд мэтэ хатуу сэдьхэлтэй байнат. 28Намайе харагты. Би таанарта худал үгэ хэлээгүйб. Минии урда бурууе хүлеэжэ, шударга бэшээр хандахаяа болигты. 29Энэ байдалые эрьюулэн бодобол, гомдохо хүниинь би гээшэб. 30Хэлэһэн үгэнүүдтэм худал бии гү? Буруу зүбые илгаха шадабарияа би алдаа гүб? Үгы, тиимэ бэшэ.