‏ Job 7

1Хүнэй амидарал гээшэ хүшэр алба хааһан, хүлһэнэй ажалда жүдхэһэн мэтэ хүндэ юм. 2Зараса богоол бүхэли үдэртөө ойгоштороо халуун наранда хүдэлхэдөө, оройн һүүдэр тухай уйдан бододог. Хүндэ ажалаа арайшье дүүргээд, хүлһэеэ горидон хүлеэдэг. 3Тэрэшэлэн минии бэе уйтай үдэр һарануудые тэбшэн хүлеэбэшье, һайниие үзөөгүй. Һайниие үзэхын орондо һүни бүри зобон тэршэлдэг. 4Унтаха сагай ерэхэдэ, амаржа шадахань хэлсээтэй. Һүниин утань минии хубида жэл мэтэ. Үүр сайтар орондоо хүльбэржэ, тэсэжэ ядан хэбтэнэб. 5Үбшэн бэем хубсаһаар бэшэ, үтэтэй яраар хушагданхай. Арһамни хахаран эдеэрлэнэ, хуушан ярын хатахада, шэнэ толбо бии болоно. 6Үдэр хоногууд бүд нэхэгшын ээрүүлһээ түргөөр үнгэржэ, этигэл найдабаригүй эсэстээ дүтэлнэ.

7Бодожо үзэгты: ами наһамни һалхин мэтэ агшан зуурын хэрэг болоно. Энэ хорбоо юртэмсэдэ жаргал гэжэ минии нюдэн үзэхэгүй. 8Намайе харадаг хүнэй нюдэн намайе дахин харахагүй. Танай нюдэн нам дээрэ тогтоошье гэлэй, би байхагүй байжа магадгүй, бү гайхагты. 9Тэнгэриин үүлэнэй гэнтэ урдан ошодогтол Үхэлэй орон руу ябагша хүн хорбоо юртэмсэдэ бусажа ерэхэгүй. 10Тиигээд орон гэртээ тэрэ дахин үзэгдэхэгүй, тэрээниие түрэл танилыншье ог таһа мартадаг. 11Иимэ болохолоороо хэлэ амаа тэбшэн һууха хэрэг намда үгыл. Бэе сэдьхэлэйнгээ зоболон тухай ярингүй яахабиб даа.

12Эзэн минии, Танаар мануулжа байха тэнгис далай гү, али далайн аймшагтай шүдхэр һэн гүб? 13– 14Унтаха нойртоол зоболонгоо мартанаб гэхэдэш, аймшагтай зүүдэ үзүүлжэ улам һүрдөөнэлта. 15Иигэжэ байнхаар зүүдэн соохи амитадай намайе бажуужа алаһаниинь дээрэ. 16Амиды ябаха хүсэлгүй болоһон намайе бү тамалыт. Амидарални удха ушаргүй болоо.

17Эзэн минии! Танай дэргэдэ хүн юуншье бэшэ һаань, юундэ тэрэниие шухалада үзэнэ гээшэбта? 18Юундэ тэрэниие үглөө бүри үзэжэ, агшан бүридэ анхарна гээшэбта? 19Намайе түр зуурашье орхин, шүлһөө залгихымни сүлөө үгыт. 20Би нүгэл үйлэдөө гүб? Хүн түрэлтэниие хинан харгалзалагша Танда би юу хээ гээшэбиб? Минии өөртөө дарамта болоторни, намайе харбаха бай болгон үзэн ядана гээшэбта? 21Би Танда тиимэ хэсүүгээр үзэгдэнэ гээшэ гүб? Та юундэ хэһэн гэмыем сагаадханагүй гээшэбта? Удахагүй үхэхэ намайе хүлисэхэнь дээрэ бэшэ юм гү? Эсэ тиигэбэл намайе энэ дэлхэйдэ бэдэрээд олохогүйт.
Copyright information for BxrBBL2024