‏ Job 8

Билдаадай Иоовто хандаһан үгэ

1Шууһаа угай Билдаад харюудань хэлэбэ:

2– Ши хэр удаан иигэжэ дуугархабши? Гэмнэлгын үгэнүүдшни хүсэтэ һалхин мэтэл. 3Бурхан шударга ёһые забхайруулдаг гү? Түгэс Хүсэтэ үнэниие буруу болгодог гү? 4Үри хүүгэдшни Тэрэнэй урда гэм хэхэдэнь, Тэрэ нүгэлэйнь хүсэндэ тушаагаа ха юм. 5Тиимэ хадань ши Түгэс Хүсэтэ Бурханһаа хүлисэл гуйгыш. 6Хэрбээ ши үнэхөөр арюун шударга байбалшни, Тэрэ шинии түлөө Өөрөө бодожо, шинии үнэн шударгые гэршэлхэл. 7Тиин урдынхиһаа үлүү өөдэргэ болоно бэзэш.

8Эртын зоной ухаанһаа һуража, элинсэгүүдэй үзэжэ мэдэһэниие ойлгожо аба. 9Бидэнэй мэдэсэ һая түрэһэн хүүгэдэйхи шэнги багахан, һүүдэр шэнги газар дээгүүр үнгэрхэдөө, юушье мэдэнэгүйбди. 10Элинсэгүүдэй үлөөһэн ухаанһаа һура.

11– 12Уһагүй газарта хулһан ургадаггүй. Уһанай шэргэбэл, энэ ургамал үбһэнһөө түргэн хатана. 13Бурханда бэшэрдэггүй хүн энээнтэй адли юм. 14Тиимэ хүнэй этигэл найдабари абаахайн шүлһэндэл хэбрэг ушарһаа хатаһан хулһанһаа бэлэхэнээр хухарна. 15Абаахайн шүлһэндэ үлгэлдэһэн хүндэ ямар найдабари байхаб даа? Найдаһан гэрынь тогтодоггүй, хэдышье шагтагалдаа һаань, даахагүй. 16Бурханда үлэ анхардагууд хог үбһэн мэтэ. Халуун наранда үдхэрэн ургажа, мүшэрнүүдынь сэсэрлигээр таража, 17үндэһэнүүдынь хүрьһэн доогуур аһалдадагшье һаа, 18– 19үндэһөөрнь һугалан байраһаань хүдэлгэбэл, оро мүргүй үгы болоод, орондонь ондоо үбһэн ургана. Амидаралайнь баясхалан энээгээр дүүрээ.

20Гэмгүй хүниие Бурхан бүримүһэн орхихогүй гээшэ үнэн, гэмтэ хүндэ туһалдаггүй гэдэгынь баһал үнэн. 21Үнэхөөр ши гэмгүй һаа, Тэрээнһээ баяр жаргал оложо, 22шамайе үзэн ядагшадые аягүй байдалда оруулхаш. Муу хүнэй гал гуламта хэзээ нэгэн сагта унтардаг.
Copyright information for BxrBBL2024