‏ Job 9

Иоовой харюу

1Иоов харюудань хэлэбэ:

2– Хэлэһэн үгэшни үнэн гэжэ мэдэнэм. Гэбэшье ахирхан амидардаг бидэ Бурханай урда түгэс гэмгүй байжа яажа шадаха бэлэйбди? 3Тэрээнтэй үгэ буляалдаха гэбэл, мянган асуудал табихадань, нэгэньдэншье зүб харюу олохогүйлди. 4Тэрэнэй оюун ухаан, хүсэ шадалынь хизааргүй. Хэн Тэрээндэ эсэргүүсээд, бүтэн үлэһэн юм? 5Уур хилэнсэгээрээ уула хабсагай бутаргахань Тэрээндэ юуншье бэшэ. 6Газар дэлхэй хүдэлгэхэдэнь дэлхэй бүмбэрсэг үндэһөөрөө шэшэрэн һалганана. 7Тэрэнэй зарлигаар наран хиртэжэ, одо мүшэд бүхэдэг. 8Огторгойн түмэн одо мүшэдые бүтээһэн агуу хүсэниинь далайн мандал дээгүүр аялан зорино. 9Тиигэжэ Долоон үбгэдые, Гурбан һогоониие, Зургаан мүшэдые, тэнгэриин бүхы ододые Тэрэ бүтээгээ. 10Хүнэй ойлгохын аргагүй үй түмэн гайхамшаг юумэ бүтээжэ байдаг.

11Хажуугаарни үнгэрхэдэнь би Тэрэниие ажаглахагүй, алхасынь шэмээе дуулахашьегүй байнаб.

12Юушье абаа һаань, Тэрэниие һаатуулха арга байхагүй. «Юундэ энээниие абабат?» гэжэ хэн асууха эрхэтэйб? 13Уурлажа эхилээ һаань, номгоруулха арга байхагүй. Рааһаб шүдхэрэй урда һүгэдэгшэд бүгэдэ Тэрэнэй урда сүхэрөө юм. 14Тиимэһээ би Тэрээнтэй тоосолдохогүйб. Хэлэхэшье үгэ алга. 15Буруу бэшэшье һаа, би харюу үгэжэ шадахагүйб. Агуу шүүгшэһээ үршөөл гуйхамнил үлэнэ. 16Тэрээндэ хандахадамни, Тэрэ харюусабашье гэлэй, харин минии үгэ Тэрэ соносоо гэжэ би этигэхэгүй байнам. 17– 18Шуурган мэтээр добтолжо, ушар шалтаггүй зобоожо, амилхашье сүлөө олгохогүй гэбэл Тэрэнэй эрхэ. 19Эрхэ шадалынь хизааргүй ехэ, хэншье Тэрээндэ эсэргүүсэхэ шадалгүй. Шүүлсэхэ гээ һаа, хэн Тэрээниие дуудажа шадахаб? 20Би хэды буруу бэшэшье һаа, урдань мунхаг үгэ хэлээд лэ буруутан болохоб. Гэмгүйшье һаа, гэмтэн болохоб. 21Үнэхөөр буруугүй байнам, теэд тэрэ шухала аал? Үхэхэм намда дээрэ байна. 22Хүнэй гэмтэй гэмгүйнь үнэндөө ямар илгаатай юм бэ? 23Бүгэдэ адлихан Тэрэнэй гараар усадхагдадаг. Гэмгүй хүнэй гэнтэ үхөө гэхэдэ, Тэрэ шоглон энеэжэ байхал. 24Адагай муу хүмүүс энэ дэлхэйе зонхилжо, шүүгшэ, шүүмжэлэгшэдынь һохор мэтэ болонхой. Энэ байдалые Тэрээнһээ ондоо хэн бии болгоо юм бэ?

25Амидарални гүйгшэдэй урилдаан мэтэ хурдан үнгэрнэ. Тэрэ һайниие юрэдөө үзэнэгүй. 26Хүнэй амидарал гээшэ уһан дээгүүр һолжорһон хулһан онгосонууд мэтэ, олзодо шунаһан бүргэдэй дайраад гараһан мэтэ нюдэ сабшаха зуурын хэрэг. 27– 28Зоболон гунигаа мартажа, уруу дуруу шарайгаа орхижо, энеэшье гээ һаань, шадахагүй байнам. Би үбшэ зоболонһоо айдаг ба таанар намайе буруутан гэһээр байнат. 29Тиимэ хадань минии дэмы зүдхэһэнэй ямар хэрэг байгаа юм? 30– 31Үльгэрлэбэл, үбшэн бэеэ саһанай уһаар угаажа, гараа сабандан сэбэрлээшье һаам, намайе угаадаһанай нүхэндэ хаяхадатнай, үмдэһэн хубсаһандам хүрэтэр үмхэй бэеым үзэн ядаха болоһонтой жэшээтэй.

32Тэрэнэй хүндэ адли байгаа һаань, би шүүлгын газарта заргалдан, Тэрээндэ харюу үгэжэ болохо байгааб. 33Зүгөөр хэншье бидэ хоёрой дунда зууршалан гараа табихагүй. 34Тэрэ һүлдэ барюулаа намһаа холодуулжа, һүрдүүлэн шиидхэхэеэ болиг лэ. 35Тиигэбэл айнгүй хэдэн үгэ хэлэмээр байна. Үгэ хэлэхэгүй шалтагаан үнэндөө намда байхагүй.