Jos 1 | BxrBBL2024 | STEP | Эзэнэй богоол Моисейн наһа бараһан хойно Эзэн Нүүнэй хүбүүн, Моисейн албатан Иисүүстэ хэлэбэ:

‏ Joshua 1

Эзэн заяата газараа эзэлэ гэжэ Иисүүстэ зарлиг буулгаба

1 Эзэнэй богоол Моисейн наһа бараһан хойно Эзэн Нүүнэй хүбүүн, Моисейн албатан Иисүүстэ хэлэбэ:

2 – Минии богоол Моисей үхэбэ; ши бодоод, энэ Иорданиие гатала, ши, энэ бүхы улад Израилиин хүбүүдтэ Минии үгэһэн газарта ошогты. 3 Танай үльмын гэшхэһэн бүхы газарые Моисейдэ хэлэһэн ёһоороо Би танда үгэнэб. 4 Элһэн губиһаа энэ Ливаан хүрэтэр, агууехэ Евфрат мүрэн хүрэтэр хээдүүдэй бүхы газар, наранһаа баруун тээшэнхи агууехэ далай хүрэтэр зай танай мэдэлэй болохо. 5 Шинии бүхы наһан соо хэншье шамтай тэнсэхэгүй; Моисейн хажууда байһандал адли Би хажуудаш байхаб: шамһаа холодохогүйб, шамайе орхихогүйб. 6 Хатуу, зоригтой байгаарай; юундэб гэхэдэ, эсэгэнэртэнь үгэхэб гэжэ тангариглаһан газарым ши тэдээндэ эдлэхынь үгэхэш. 7 Гансал хатуу ба тон зоригтой байгаарай, Моисейн шамда захиһан бүхы хуулиие сахижа, дүүргэжэ ябаарай, Богоолни. Тэрээнһээ хайшаашье бү хазагайраарай, тиибэл лэ бүхы хэрэгээ бодолтойгоор хэхэш. 8 Энэ хуулиин ном шамһаа бү холодог; энэ номдо бэшэгдэһэн бүхы юумэ зүб бэелүүлхын тула үдэр һүнигүй тэрээнһээ һуража байгаарай: тиибэлшнил бүхы харгыш амжалтатай байха, бодол хэрэгшни зүб байха. 9 Би шамда зарлиг буулганаб: хатуу ба зоригтой байгаарай, бү ай, бү һүрдэн бахарда. Хаанаш ошоо һааш, Эзэн, шинии Бурхан хажуудаш байха.

10 Тиигээд лэ Иисүүс зоной ахамадуудта зарлиг буулгажа хэлэбэ:

11 – Зоной байһан газараар ябажа, зондо зарлиг хэлэгты: харгыдаа хүнэһэ бэлдэгты гэгты, юундэб гэхэдэ, гурба хоноод, танай эсэгэнэрэй Бурхан, Эзэн танда энжэ болгожо үгэһэн газар абахаа энэ Иорданай саана ошохот гэгты.

12 Рэүбээнэй, Гаадай обогуудта, Мэнашшээгэй хахад обогто Иисүүс хэлээ:

13 – Эзэнэй богоол Моисейн танда юу захиһые һанагты: «Эзэн, танай Бурхан танай һанаа амаруулжа, энэ газарые танда үгөө». 14 Таанарай һамгад, таанарай хүүгэд, таанарай мал Иорданай саана Моисейн үгэһэн газарта үлэхэ; таанар булта, тэмсэхэ шадалтай зон, зэбсэг баряад, аха дүүнэрэйнгөө урда ябажа, тэдээндэ туһалагты. 15 Эзэнэй, танай Бурханай тэдээндэ энжэ болгожо үгэһэн газар абатарынь туһалагты; тииһэн хойноо энжэ газартаа бусажа, наранһаа зүүлжээ Иорданай саана Эзэнэй богоол Моисейн үгэһэн газар эдлэжэ һуугаарайгты.

16 Тэдэ харюудань Иисүүстэ иигэжэ хэлэбэ:

– Шинии захиржа хэлэһэн бүхы юумэ хэхэбди, хаанаш эльгээгээ һааш, ошохобди. 17 Моисейн үгэ дууладагтаал адли шинии үгэ дуулахабди. Гансал Эзэн, шинии Бурхан, Моисейтэй ябаһандаал адли шамтай ябуужа. 18 Шинии зарлигта эсэргүүсэһэн хүн, шинии үгэ дуулаагүй хүн үхэл амасаха. Гансал хатуу ба зоригтой байгаарай.