‏ Joshua 10

Табан Эмоорой хаашуулые бута сохилго

1Иерусалимай хаан Адони-Цээдэг Иисүүс Һай хотые абажа, хараалда хүртөөгөө, хаанииень баһал Ерихоониие ба тэрээнэй хааниие усадхагшадаал адли усадхаа, Гибэһооной зон Израильтай эб баталаад, тэдээнэй дунда үлөө гэжэ дуулахадаа, 2тэрэ ехээр айгаа. Юундэб гэхэдэ, Гибэһоон хаашуулай хотонуудай нэгэн болохо томо хото һэн, Һай хотоһоо ехэ хото һэн, зонииньшье зоригтой байгаа. 3Тиимэһээ Иерусалимай хаан Адони-Цээдэг Хэброоной хаан Һоһаамда, Ярмуудай хаан Пираамда, Лахиишэй хаан Япииһада, Эглооной хаан Дэбииртэ элшэдые эльгээгээд, 4намда ерэжэ, Иисүүстэй, Израилиин хүбүүдтэй эб баталһанайнь түлөө Гибэһоониие дарахадам туһалагты гэжэ хэлүүлээ.

5Тэдэ суглараад, Эмоорой табан хаашуул: Иерусалимай хаан, Хэброоной хаан, Ярмуудай хаан, Лахиишэй хаан, Эглооной хаан, тэдээнэй бүхы жагсаалда гараһан зон дай хэхээ Гибэһооной хажууда майхан хүреэнүүдээ түхеэрээ. 6Гибэһооной зон Израилиин байһан газарта, Гилгаалда Иисүүстэ эльгээжэ хэлүүлээ:

– Богоолнуудһаа гараа бү аба, түргөөр манда ерэжэ абара. Туһа манда хүргэ, юуб гэхэдэ, хадада һуудаг эмооршуудай бүхы хаашуул манай урдаһаа ерээ.

7Иисүүс Гилгаалһаа өөрөө ошоо, тэрээнтэй хамта дайлалдаха шадалтай бүхы зон, бүхы зоригтой эрэшүүл ошоо.

8Эзэн Иисүүстэ хэлээ:

– Тэдээниие Би шинии гарта үгөөб: хэнииньшье шинии урдаһаа тэсэхэгүй.

9Иисүүс дайсадта гэнтэ ерээ, юундэб гэхэдэ, бүхэли һүни Гилгаалһаа ябаа. 10Эзэн тэдээниие израильшуудһаа ехээр һүрдөөгөө, тиигээд Гибэһоондо тэдээниие израильшууд бута сохёо, Бэт-Һорооной үндэртэ ошоһон харгыгаар тэдээниие мүрдөө, Азэкаа ба Маккэдаа хүрэтэр тэдээниие дараа.

11Израильшуудһаа Бэт-Һорооной хадын ташалангаар зугадахадань, Эзэн тэнгэриһээ Азэкаа хүрэтэр томо шулуугаар шэдээ, тэдэ хосороо; шулуун аадарһаа хосороошодынь Израилиин хүбүүдэй мэсэһээ үхэгшэдһөө олон байгаа.

12Эзэнэй Эмоорые Израилиин гарта үгэһэн үдэр, Гибэһоондо тэдээниие Бурханай сохиһон үдэр, Израилиин хүбүүдэй хараһаар байтар тэдээнэй сохюулһан үдэр Иисүүс Эзэндэ уряалан хандаад, Израилиин зоной урда хэлээ:

– Наран, Гибэһоон дээрэ тогто, һара Аялооной хүнды дээрэ тогто!

13Тиигээд нараншье тогтоо, һарашье зоной дайсадһаа үһөөгөө абатар тогтоод байгаа. Иашарай ▼
▼ Еврей хэлэн дээрэ «Үнэн Сэхын» гэһэн удхатай, урданай Израилиин байлдаанууд тушаа дуунуудай ном.
 номдо энээн тухай «наран тэнгэриин тэг дунда тогтоод, баруун тээшээ тонгойхоо бүхэли үдэр яараагүй»! – гэжэ бэшээтэй бэшэ гү? 14Эзэнэй хүнэй үгэ иигэжэ дуулаһан үдэр урданшье, хожомыньшье байгаагүй. Юундэб гэхэдэ, Эзэн Израилиин түлөө тэмсээ.

15Тиигээд Иисүүс, тэрээнтэй бүхы Израиль байһан газартаа, Гилгаалда бусаа.

16Илагдаһан табан хаашуул зугадаад, Маккэдаагай агуйда хоргодоо. 17«Тэрэ табан хаашуул олдоо, тэдэ Маккэдаагай агуйда хоргодожо байна» гэжэ Иисүүстэ дуулгахадань, 18Иисүүс хэлээ:

– Агуйн үүдэндэ томо шулуу унагаагаад, хажуудань харуул табигты; 19таанар бү тогтогты, дайсадаа мүрдэгты, тэдэнэй сэрэгэй һүүл талые усадхагты, хотонууд руу бү табигты, юуб гэхэдэ, Эзэн, танай Бурхан тэдээниие танай гарта үгөө.

20Иисүүсэй ба Израилиин хүбүүдэй тэдээниие нилээн ехээр усадхан дарахада амиды үлөөшэдынь бэхижүүлэгдэһэн хотонууд руу зугадаа.

21Бүхы зон Иисүүсэй байһан газарта Маккэдаа руу эб асаржа бусаба, Израилиин хүбүүд хуу толгой бүтэн байба.

22Тиихэдэнь Иисүүс хэлээ:

– Агуйн амһар онгойлгоод, тэрэ табан хаашуулые намда гаргажа асарагты.

23Хэлэһэн зарлигынь дүүргээ. Тэдэ табан хаашуулые – Иерусалимай хааниие, Хэброоной хааниие, Ярмуудай хааниие, Лахиишэй хааниие, Эглооной хааниие агуйһаа гаргаад, Иисүүстэ асараа. 24Тэдэ хаашуулые Иисүүстэ асархадань, Иисүүс бүхы Израилиин зониие дуудаад, тэрээнтэй ябаһан сэрэгэй ударидагшадта хэлээ:

– Эдээнэй хажууда ошоод, хүлөөрөө эдэ хаашуулай хүзүү гэшхэгты.

Тэдэ хаашуулай хажууда ошоод, хүлөөрөө хүзүүень гэшхээ. 25Иисүүс тэдээндэ хэлээ:

– Бү айгты, бү һүрдэгты, хатуу ба зоригтой байгты; юундэб гэхэдэ, Эзэн танай дайлалдаха бүхы дайсадта тиижэл хандаха.

26Тиигээд Иисүүс тэдээниие хадхан алаад, табан модон дээрэ үлгөө; үдэшэ болотор тэдэ модондо үлгөөтэй байгаа. 27Наранай ороходо Иисүүсэй захиралтаар тэдээниие модонһоо абаад, хоргодоһон агуй руу хаяад, амһарынь томо шулуугаар хаагаа. Тэдэ шулуунууд мүнөөш хүрэтэр байдаг.

28Тэрэл үдэрөө Иисүүс Маккэдаае эзэлээд, тэрээниие, хаанииень һэлмээр дараа, тэндэ байһан бүхы амитай юумэндэ хараал хүртөөгөө: хэнииеш бүтэн орхёогүй, Ерихооной хааниие хэһээгшэдэл адляар Маккэдаагай хааниие хэһээгээ.

29Иисүүс, тэрээнтэй хамта Израилиин бүхы зон Маккэдааһаа Либнаада ошожо, Либнаагай урдаһаа дайлалдаа. 30Эзэн тэрээниие, тэрээнэй хааниие Израилиин гарта үгөө. Иисүүс тэрээниие, тэрээн соо байһан хамаг амитай юумэ юуш үлөөнгүй һэлмээр усадхаа, Ерихооной хааниие яагаа һэм, тэрээн шэнгеэр хаанииень һалгаа.

31Либнааһаа Иисүүс, тэрээнтэй хамта бүхы Израилиинхин Лахииш тээшэ ошоод, хажуудань майхан хүреэгөө татаа, тэрээнэй урдаһаа дайлалдаа. 32Эзэн Лахиишые Израилиин гарта үгөө. Үглөөдэрынь Иисүүс тэрээниие эзэлээд, һэлмээр усадхаа, бүхы амитай юумыень алажа, Либнаада адляар һалгаа. 33Тиихэдэй Гээзэрэй хаан Һораам Лахиишдэ туһалхаа ерээ; теэд Иисүүс тэрээниие, арад зонииень хэнииешье амиды үлөөнгүй һэлмээр усадхаа.

34Тиигээд Иисүүс ба тэрээнтэй Израилиинхин Лахиишһээ Эглоон тээшэ ошоод, хажуудань байрлаа, тэрээнэй урдаһаа дайлалдаа. 35Тэрэл үдэртөө эзэлэн абаад, тэрээниие, зосоонь байһан бүхы амитай юумые һэлмээр усадхаад, Лахиишдэл адляар хараалда хүртээгөө.

36Тиигээд Иисүүс ба тэрээнтэй бүхы Израильшууд Эглоонһоо Хэброон тээшэ ошожо, тэрээнэй урдаһаа дайлалдаа. 37Хэброониие эзэлээд, тэрээниие, хаанииень, бүхы хотонуудынь, тэндэ байһан бүхы амитай амитадые һэлмээр усадхаа, Эглооние һалгааһандал адляар һалгаагаа.

38Һүүлээрнь Иисүүс ба Израиль Дэбиир тээшэ хандажа, тэрээнэй урдаһаа дайлалдаа. 39Тэрээниие, хаанииень, бүхы хотонуудынь эзэлээд, һэлмээр усадхаа. Дэбииртэ байһан бүхы амиды юумэндэ хэнэйш үлэхэгүйгөөр хараал хүртөөгөө. Дэбиирые, тэрээнэй хааниие, Либные ба тэрээнэй хааниие, Хэброониие ба тэрээнэй хааниие һалгаһандал адляар һалгаа.

40Иисүүс бүхы хадын газарые, Нээгэб ба доро газарнуудые, хадын бооридо байһан газар нютагуудые, тэдээнэй хаашуулые усадхаад, хэнииешье амиды үлөөгөөгүй, бүхы амитай амитадые Эзэнэй, Израилиин Бурханай захиһан ёһоор хараалда хүртөөгөө. 41Кадээш-Барнээһээ ба Гааза хүрэтэр, Гоошэнэй бүхы газарые Гибэһоон хүрэтэр Иисүүс усадхан һалгаа. 42Эдэ газарнуудай бүхы хаашуулые, тэдээнэй газарые Иисүүс нэгэл ябадалаар эзэлэн усадхаа; юундэб гэхэдэ, Эзэн, Израилиин Бурхан Израилиин түлөө тэмсээ.

43Тиигээд Иисүүс ба тэрээнтэй бүхы Израилиин зон байдаг газартаа, Гилгаалда бусаа.
Copyright information for BxrBBL2024