Jos 11 | BxrBBL2024 | STEP | Энээниие дуулаад, Хацоорой хаан Ябиин Мадооной хаан Ёваавта, Шимрооной хаанда, Ахшаапай хаанда,

‏ Joshua 11

1 Энээниие дуулаад, Хацоорой хаан Ябиин Мадооной хаан Ёваавта, Шимрооной хаанда, Ахшаапай хаанда, 2 хойто зүгтэ хада дээрэ һуудаг хаануудта, Хиннээрэтэй үбэрэй талада ба доро газарта, баруун тээшээ Напоот-Доордо һуудаг хаашуулда, 3 зүүн тээшээ, далай тээшэ һуудаг ханаһаануудта, эмооршуудта, хээдүүдтэ, пэриззиинүүдтэ ба хадада һуудаг евүүсүүдтэ, Хэрмооной хажууда Мицпаагай газар дээрэ һуудаг хиивүүдтэ эльгээгээ. 4 Тэдэ булта хүдэлөө, зонойнь жагсаал тэдээндэ хамтараа. Далайн эрьеын элһэн шэнги олон зон суглараа; морид, хоёр сахаригта байлдаанай тэргэнүүд ехэ олон байгаа. 5 Эдэ бүхы хаашуул суглараад, Израильтай тэмсэхээ Мэроомой уһанай эрьедэ ерэжэ, майхан хүреэгөө дэлгээ.

6 Эзэн Иисүүстэ хэлээ:

– Тэдээнһээ бү ай, үглөөдэр, энэ үе багта, тэдээниие Би Израилиин хүбүүдэй гарта сохихынь үгэхэб; моридойнь шүрбэһэ таһа отолоорой, байлдаанай хоёр сахаригта тэргэнүүдынь шатаагаарай.

7 Иисүүс ба тэрээнтэй хамта дайлалдаха шадалтай бүхы зон гэнтэ Мэроомой уһан тээшэ гараад, тэдээндэ добтолоо. 8 Эзэн тэдээниие Израильшуудай гарта үгөө; тэдээниие хюдан даран, агууехэ Сидоон, Мисрэпоот-Мааһим хүрэтэр, зүн тээшээ Мицпээгэй тала хүрэтэр мүрдэн намнажа, бултынь хюдаа, нэгэшье амиды хүниие үлөөгөөгүй. 9 Иисүүс тэдээниие Эзэнэй хэлэһэн ёһоор шиидхээ – моридойнь шүрбэһэ таһа отолоо, байлдаанай хоёр сахаригтануудынь шатаагаа. 10 Тэрэ үедэ һөөргөө бусаад, Иисүүс Хацоорые абаа, хаанииень һэлмээр алаа (урдань Хацоор эдэ бүхы хаан оронуудай ниислэл хотонь байгаа). 11 Хотодо байһан бүхы зониие усадхажа, Хацоор хотые шатаагаа.

12 Эдэ хаашуулые ба эдэ хотонуудые эзэлэн абаад, бүхы амитай юумые һэлмээр усадхаад, Эзэнэй богоол Моисейн хэлэһэн ёһоор хараал шэнгээгээ. 13 Үндэр газарта байһан бүхы хотонуудые израильшууд шатаагаа гэхэ хэрэггүй, гансал Хацоорые Иисүүс шатаагаа. 14 Эдэ хотонуудай бүхы олзо зөөри, малынь Израилиин хүбүүд өөһэдтөө хубаагаа; зонииень бултыень һэлмээр алаа, нэгэш амиды хүниие үлөөгөөгүй. 15 Эзэнэй Өөрынгөө богоол Моисейдэ захирһанай ёһоор Моисей Иисүүстэ захяа, Иисүүс хэлэһыень хуу дүүргээ: Эзэнэй Моисейдэ захирһанһаа нэгэш үгэ хазагайруулаагүй.

Иисүүсэй эзэлһэн газарнууд

16 Иигэжэ Иисүүс бүхы энэ хада дээрэхи газарые, Нээгэбэй бүхы газарые, Гоошэнэй бүхы газарые ба хотогор доро газарнуудые, Израилиин тэгшэ тала ба хадануудые, хотогор доро газарнуудые 17 Халак хадаһаа Сэһиир хүрэтэр, Хэрмооной хажуудахи Ливаанай талын Бааһал-Гаад хүрэтэр газарые эзэлэн абаад, тэдэнэй бүхы хаашуулынь барижа хюдаа, алаа. 18 Эдэ бүхы хаашуултай Иисүүс удаан дай хээ. 19 Гибэһоондо һуудаг хиивүүдһээ ондоо Израилиин хүбүүдтэй эб баталһан хото гэжэ байгаагүй: бултынь дайлан абаа. 20 Юундэб гэхэдэ, тэдэ Эзэнһээ зүрхэеэ шэрүүдхээд, израильшуудые дайгаар угтаа. Эзэнэй Моисейдэ захиһан ёһоор, тэдэ хараалда хүртэхэ, үршөөл абахагүй, усадхагдаха хубитай байгаа.

21 Тэрэл үедэ Иисүүс хада дээрэ, Хэброондо, Дэбииртэ, Анаабта, Иудын бүхы хада дээрэ, Израилиин бүхы хада дээрэ анаакшуудые хюдаа; хотонуудтайнь хамта Иисүүс тэдээниие хараалда үгөө. 22 Израилиин хүбүүдэй газар дээрэ анаакшуудһаа нэгэш хүн үлөөгүй, гансал Гаазада, Гаадта ба Ашдоодто үлөө.

23 Тиигэжэ Эзэнэй Моисейдэ хэлэһэн ёһоор Иисүүс бүхы газар абаа, тэрээнээ Иисүүс Израилиин зондо обогууд хоорондонь хубаажа үгөө. Газар дайда дайнһаа амараа.