‏ Joshua 13

Израильшуудай эзэлхэ ёһотой газарнууд

1Иисүүсэй хүгшэрөөд, үбгэ наһан болоходо Эзэн тэрээндэ хэлээ:

– Ши үбгэрөөд, үндэр наһа хүсэбэш, угай болгожо абаха газар үшөө олон. 2Иимэ газарнууд үлөө: Пилиштын оршон тойронхи газарнууд ба Гэшүүрэй бүхы газар. 3Египедэй урдахи Сихорһоо хойшоо Экрооной хилэ хүрэһэн газар Ханаһаанай гэжэ тоологдодог, тэндэ Пилиштын табан эзэд бии: Гаазай, Ашдоодой, Ашхэлооной, Гаадай, Экрооной. Урда зүгтэ аввиимуудай газар.

4Урагшаа Ханаһаанай бүхы газар, Сидооной Мэарааһаа Апээк хүрэтэр, эмооршуудай хилэ хүрэтэр, 5үшөө Гэбаалай газар ба наранһаа зүүн тээшэнхи Хэрмоон хадын хажуудахи Бааһал-Гаадһаа Лэбоо-Хамаатай аман хүрэтэр. 6Ливаанһаа Мисрэпоот-Мааһим хүрэтэр хадада һуудаг зониие, бүхы Сидоонойхидые Израилиин хүбүүдэй хараһаар байтар Би үлдэхэб. Минии шамда захирһан ёһоор энэ газарые Израилиин хубита болгожо хубаа. 7Энэ газарые юһэн обогой ба Мэнашшээгэй хубита болгожо хубаа.

Иорданай саанахи газар хубаалга

8Рэүбээнэй ба Гаадай обогууд, Мэнашшээгэй обогой нүгөө хахад Эзэнэй богоол Моисейн үгэһэн ёһоор Иорданһаа зүүн тээшэ хубитаяа абаа. 9Арноон урадхалай эрьедэ байдаг Ароһээрһээ эхилээд, урадхалай дунда байһан хотые, Дибоон хүрэтэрхи Мэдэбаагай үргэн талые абаа. 10Хэшбоондо аммоонуудай хилэ хүрэтэр эзэрхэжэ байһан эмооршуудай хаан Сиһооной бүхы хотонуудые абаа. 11Үшөө Галаадые, Гэшүүрэй ба Маһахаагай можонуудые, бүхы Хэрмоон хадые ба Салэхаа хүрэтэр бүхы Башааниие абаа. 12Аштароодто ба Эдрейдэ түрэ барижа байһан Башаанай Оог хаанай гүрэниие абаа. Моисейн даража үлдэһэн рэпаиимүүдһээ тэрэ гансаараа үлэһэн байгаа. 13Зүгөөр Израилиин хүбүүд Гэшүүрэй ба Маһахаагай зониие үлдөөгүй, Гэшүүр Маһахаа хоёр мүнөө хүрэтэр Израилиин дунда байна.

14Гансал Левиин обогто хубитые үгөөгүй: Эзэнэй, Израилиин Бурханай үргэл тэрээнэй хубита болоно, тэрээндэ Эзэн тиижэ хэлээ.

Рэүбээн угсаатан Иорданай саана газар абаба

15Рэүбээнэй обогой угсаатанда Моисей хубита газарынь хубаажа үгөө: 16Арноон урадхалай эрье дээрэхи Ароһээр, урадхалай дундахи хото, Мэдэбаа шадарай бүхы тэгшэ тала, 17Хэшбоон ба тэгшэ талын тэрээнэй бүхы хотонууд: Дибооншье, Бамоот-Бааһалшье, Бэт-Бааһал-Мэһооншье, 18Яаһцаа, Кэдэмоот ба Мэпаат, 19Кириатааим, Сибмаа ба Эмээг хада дээрэхи Цээрэт-Шааһар, 20Бэт-Пэһоор ба Пиисгаагай ула шадарай газар ба Бэт-Ешимоот. 21Эдэнь тэгшэ талын бүхы хотонууд, Хэшбоондо захиржа байгаад, Моисейдэ алуулһан эмоорой хаан Сиһооной бүхы гүрэн, баһал алуулһан Мидианай ударидагшадай: Эвиин, Рээкэмэй, Цуурай, Хуурай, Рээбын, тэрэ газарта байһан Сиһооной тайжанарай газар тэдээнэй заха хилэ байгаа. 22Баһал Израилиин хүбүүдэй һэлмээр алаһан мэдэлшэ Бэһоорой хүбүүн Балаһаамай газар хилэ байгаа. 23Иордан Рэүбээнэй хүбүүдэй газарай заха байгаа. Рэүбээнэй хүбүүдэй угай гэжэ үгтэһэн газарай, хото тосхонуудай хубаари иимэ.

Гаадай угсаатан Иорданай саана газар абаба

24Гаадай обогто, Гаадай хүбүүдтэ угсаагаарнь Моисей баһал хубаари үгөө: 25Язээр ба Галаадай бүхы хотонууд, Раббаае урдахи Ароһээр хүрэтэр Аммооной хүбүүдэй газарай хахад, 26Рамаат-Мицпээ ба Бэтониим хүрэтэр, Маханааимһаа Дэбиирэй хилэ хүрэтэр Хэшбооной газарнууд, 27Бэт-Һараам хүндыдэ ба Бэт-Нимраа ба Суккоот ба Цапоон, Хэшбооной хаан Сиһооной гүрэнэй үлэгдэл, Иорданһаа зүүн тээшээ Хиннээрэтэй далай хүрэтэр Иордан гол тэдээнэй заха хилэ болоно. 28Гаадай хүбүүдэй угай гэжэ үгтэһэн газарай, хото тосхонуудай хубаари иимэ.

Мэнашшээгэй угсаатанай хахад баһал Иорданай саана газар абаба

29Угсаатанаараа Мэнашшээгэй хүбүүдэй обогой хахад болодог Мэнашшээгэй обогой хахадта Моисей хубаари үгөө. 30Маханааимһаа эхилээд, бүхы Башаан, Башаанай хаан Оогой бүхы гүрэн, Башаанда байһан Яһиирай бүхы тосхонууд, жаран хотонууд тэдээнэй заха байгаа. 31Галаадай хахад, Аштароот ба Эдрей, Башаанай Оог хаанай хотонууд Мэнашшээгэй хүбүүн Махиирай хүбүүдтэ, угсаагаараа Махиирай хүбүүдэй хахадта үгтөө. 32Ерихоонһоо зүүн тээшэ Иорданай саана Моһаабай тэгшэ талада Моисей тэдээндэ иимэ хубаари үгөө. 33Зүгөөр Левиин обогто Моисей хубаари үгөөгүй: Эзэн, Израилиин Бурхан Өөрөө тэдээнэй хубита болоно, Өөрөө Тэрэ тэдээндэ тиижэ хэлээ.