Jos 14 | BxrBBL2024 | STEP | Ханаһаанай газар дээрэ шажанай албатан Эльазаар, Нүүнэй хүбүүн Иисүүс, Израилиин хүбүүдэй обогуудта дарганарай хубааряар Израилиин иимэ хубитые абаа.

‏ Joshua 14

Ханаһаанай газар хубаалга

1 Ханаһаанай газар дээрэ шажанай албатан Эльазаар, Нүүнэй хүбүүн Иисүүс, Израилиин хүбүүдэй обогуудта дарганарай хубааряар Израилиин иимэ хубитые абаа. 2 Эзэнэй Моисейдэ хэлэһэн ёһоор жээрэб хаяжа, юһэн обогто, Мэнашшээгэй хахад обогто тэдэ хубаагаа.

3 Хоёр обогто, Мэнашшээгэй хахад обогто Моисей Иорданай саана хубаари үгөө; левидүүдтэ тэдээнэй хоорондо хубаари үгөөгүй. 4 Юундэб гэхэдэ, Иосифой хүбүүдһээ Мэнашшээгэй, Эпрааимай хоёр обог гараа; тиимэһээ тэдэ левидүүдтэ газар дээрэ хубаари үгөөгүй, гансал һууха хотонуудые, малаа байлгаха, ондоо юумэ хэхэ ойрын газартайгаар үгөө.

5 Газарые хубитануудта хубаахадаа, Израилиин хүбүүд Эзэнэй Моисейдэ хэлэһэнэй ёһоор хээ.

Халээб Хэброониие абаба

6 Иудын хүбүүд Гилгаал руу Иисүүстэ ерээ. Тиигээд кэнэззэйн Епуннээгэй хүбүүн Халээб хэлээ:

– Эзэнэй Моисейдэ, Бурханай хүндэ Кадээш-Барнээдэ нам тухай, шам тухай юун гэһыень мэдэнэш. 7 Эзэнэй богоол Моисейн газар хара гэжэ намайе Кадээш-Барнээһээ эльгээхэдэ, би дүшэтэй ябааб, зүрхэнэйгөө хэлэһэн руу би харюу асарааб. 8 Намтай ошоһон аха дүүнэрни арадай зүрхэ уяруулаа, би Эзэнэй, минии Бурханай хэлэһээр лэ хээб. 9 Тэрэ үдэр Моисей тангариглажа хэлээ: «Шинии хүлэй гэшхэһэн газар, шинии хубита болохо, хэтэ мүнхэдөө үхи хүүгэдэйшни хубита болохо, юундэб гэхэдэ, Эзэнэй, минии Бурханай үгэ зүб сахяаш». 10 Тиигээд Эзэн намайе амиды үлөөгөө. Энэ үгэ Эзэнэй Моисейдэ хэлэһэнһээ хойшо дүшэн табан жэл үнгэрөө. Тиихэдэ Израиль элһэн губяар ябажа байгаа. Мүнөө би наян табатайб. 11 Зүгөөр тиихэдэ Моисейн эльгээхэ үеынхидэл адли мүнөө шадалтайб, мүнөө дайлалдахашье, орохо гарахашье шадалтайб. 12 Тиимэһээ Эзэнэй тэрэ үдэр хэлэһэн энэ хадые намда үгэ. Тэндэ Анаагай хүбүүд һууна гэжэ тэрэ үдэр ши дуулааш, тэдээнэй хотонууд томо ба бэхилэгдэһэн; Эзэнэй намтай ябаа һаань, тэрээнэй хэлэһэн ёһоор би тэдээниие үлдэхэб.

13 Иисүүс юрөөгөөд, Епуннээгэй хүбүүн Халээбтэ Хэброониие хубита болгожо үгөө. 14 Тиигээд Хэброон кэнэззэйн Епуннээгэй хүбүүн Халээбэй хубита боложо мүнөө хүрэтэр үлөө, юуб гэхэдэ, тэрэ Эзэнэй, Израилиин Бурханай үгэ тон зүб сахяа. 15 Хэброоной нэрэ урдань Кирьяат-Арбаа гэдэг байгаа, Анаагай хүбүүдэй дунда тиимэ нэрэтэй нэгэ агууехэ хүн байгаа. Тэрэ газар тиигээд дайнһаа номгороо.