Jos 17 | BxrBBL2024 | STEP | Иосифой түрүүшын хүбүүн Мэнашшээгэй обогто жээрэбээр иимэ газарнууд тудаа. Дайнда зоригтой байһан Галаадай эсэгэ, Мэнашшээгэй ехэ хүбүүн Махиирта Галаад Башаан хоёр тудаа.

‏ Joshua 17

Мэнашшээгэй угсаатанай мэдэлэй газар

1 Иосифой түрүүшын хүбүүн Мэнашшээгэй обогто жээрэбээр иимэ газарнууд тудаа. Дайнда зоригтой байһан Галаадай эсэгэ, Мэнашшээгэй ехэ хүбүүн Махиирта Галаад Башаан хоёр тудаа.

2 Мэнашшээгэй бэшэшье хүбүүдтэ хубита хүртөө. Угсаагаарнь Абиээзэрэй хүбүүдтэ, Хээлэгэй хүбүүдтэ, Асриээлэй хүбүүдтэ, Шээхэмэй хүбүүдтэ, Хээпэрэй хүбүүдтэ, Шэмидаагай хүбүүдтэ хуби хүртөө. 3 Иосифой хүбүүн Мэнашшээгэй эрэ түрэһэн хүбүүн Махиирай, Махиирай хүбүүн Галаадай, Галаадай хүбүүн Хээпэрэй хүбүүн Цэлопэһаадта хүбүүд үгы, гансал басагадтай байгаа. Басагадайнь нэрэнүүд иимэ: Маһлаа, Ноһаа, Хоглаа, Милкаа ба Тирцаа. 4 Тэдэ шажанай албатан Эльазаарта, Нүүнэй хүбүүн Иисүүстэ, ударидагшадта ерээд хэлээ:

– Аха дүүнэрэймнай хоорондо манда хубитые үгэхынь Эзэн Моисейдэ захираа.

Эзэнэй зарлигаар тэдээндэ эсэгынь аха дүүнэрэй хоорондо хубита үгтөө.

5 Галаадай, Иорданай саана байһан Башаанай газарһаа ондоо арбан хэсэг Мэнашшээгэй хубида буугаа. 6 Тиигээд Мэнашшээгэй басагад хүбүүдэйнь дунда хубита абаа, Галаадай газар Мэнашшээгэй бэшэ хүбүүдтэ тудаа.

7 Мэнашшээгэй хилэ Ашээрһээ Шэхээмэй эсрэг байдаг Михмэтаат тээшэ ошоно; тэндэһээ хилэ баруулжаа Эн-Таппууһаагай зон тээшэ ошоно. 8 Таппууһаагай газар Мэнашшээдэ хүртөө, Мэнашшээгэй хилын хажуудахи Таппууһаа хото Эпрааимай хүбүүдтэ хүртөө. 9 Эндэһээ хилэ урда талаһаань Канаа урадхал тээшэ бууна. Эдэ хотонууд Мэнашшээгэй хотонуудай дунда байгаашье һаа, Эпрааимай мэдэлэй. Мэнашшээгэй хилэ урадхалай хойто талада, тэрэ далайгаар дууһана. 10 Урагшаа байһан юумэн Эпрааимай, хойшоо байһан юумэн Мэнашшээгэй; далай тэдээнэй хилэ байгаа. Ашээртэ тэдэ хойто талаһаань туладаг, Иссахаарта зүүн талаһаань туладаг.

11 Иссахаарай ба Ашээрэй хажууда Бэт-Шэһаан ба тэрээнтэй холбоотой газарнууд, Иблэһаам ба тэрээнтэй холбоотой газарнууд, Доорой, Эн-Доорой зон ба тэдээнтэй холбоотой газарнууд, Таанаахай зон ба тэрээнтэй холбоотой газарнууд, Мэгиддооной зон ба тэрээнтэй холбоотой газарнууд, Наапет гурбадахи хуби Мэнашшээгэй мэдэлдэ үгтэнхэй. 12 Мэнашшээгэй хүбүүд эдэ хотонуудые эзэлжэ шадаагүй, тиигээд ханаһаанууд энэ газарта үлөө. 13 Израилиин хүбүүд хүсэ ороходоо, ханаһаануудые ясаг түлөөшэд болгоо, зүгөөр үлдөөгүй.

Эпрааимай ба Мэнашшээгэй угсаатан үлүү ехэ газар эреэд абаагүй

14 Иосифой үри һадаһад Иисүүстэ иигэжэ хэлээ:

– Юундэ ши минии хубида ганса хубита, ганса хэсэг газар үгөөбши, би олон зонтой ха юмбиб, Эзэн намайе элбэг дэлбэг юрөөгөө бэшэ гү?

15 Иисүүс тэдээндэ хэлэбэ:

– Хэрбээ ши олон зонтой һаа, Эпрааимай хадын багадаа һаа, ой руу ошоод, тэндэ пэриззиинүүдэй ба рэпаиимүүдэй газарта ой сэбэрлэ.

16 Иосифой үри һадаһад хэлэбэ:

– Манда хада үлэхэгүй, юундэб гэхэдэ, хүндын талада, Бэт-Шэһаанда, тэдээнтэй холбоотой газарта, Езрээлэй талада һуудагшье ханаһаанууд байлдаанай түмэр тэргэтэй.

17 Теэд Иисүүс Иосифой үри һадаһадта, Эпрааимда ба Мэнашшээдэ хэлээ:

– Ши олон зонтойш, хүсэ ехэтэйш, гансал хубита газартай байхагүйш: 18 хадашье шинии болохо, энэ ойешье сэбэрлэхэш, тэрэ дууһатараа шинии байха; байлдаанай түмэр тэргэтэйшье, хүсэтэйшье һаань, ханаһаануудые ши үлдэхэш.