‏ Joshua 18

Үлэһэн газарнуудые хубаахын урда тээ

1Израилиин бүхы зон Шилоодо шүүлгын газарта суглараад, тэндэ суглаанай майхан һүмэ табиба, юундэб гэхэдэ, тэрэ орон тэдээнэй мэдэлдэ ороод байгаа. 2Израилиин хүбүүдһээ хубитаяа абаагүй долоон обог үлэһэн байгаа.

3Иисүүс Израилиин хүбүүдтэ хэлээ:

– Эзэнэй, танай эсэгэнэрэй Бурханай танда эдлэгты гэжэ үгэһэн газарые ошоод абахые оролдонгүй удаан һууха зон гүт? 4Отог бүхэнһөө гурбан хүниие үгэгты, би тэдэниие газарнуудаар ябажа, яажа хубитада хубаахые бүридхэжэ бэшэхые эльгээхэб, тиигээд тэдэ намда бусажа ерэхэ. 5Газарые долоон хубита болгожо хубааг. Иуда өөрынгөө хилэдэ урда зүгтэ үлэг, Иосифой гэр бүлэ өөрынгөө хилэдэ хойто зүгтэ үлэг. 6Таанар долоон хубита болгожо газарые бэшээд, эндэ намда асарагты: би эндэ, Эзэнэй, манай Бурханай урда танда жээрэб хаяхаб. 7Левидүүд танай дунда үмсын газаргүй байха, юундэб гэхэдэ, шажанай албан тэдээнэй хуби болоно; Гаад, Рэүбээн ба Мэнашшээгэй обогой хахад Моисейн, Эзэнэй богоолой үгэһэн хубитаяа тэдэ Иорданай саана зүүн тээшэ абаа.

8Тэдэ зоной газар хэмжэн бэшэхэеэ ошоходо, Иисүүс тэдэндэ иимэ захиралта үгөө:

– Ошоод, газарые тойрожо харагты, тайлбарилжа бэшээд, намда бусахат; би эндэ Шилоодо Эзэнэй урда жээрэб танда хаяхаб.

9Тэдэ газарые ошожо үзөөд, хотонуудаарнь тэмдэглэн бэшээд, дэбтэр соо долоон хэсэг болгожо хубаагаад, Иисүүсэй байһан Шилоодо ерэбэ. 10Иисүүс Шилоодо, Эзэнэй урда жээрэб хаяад, хэсэг хэсэгээрнь израильшуудта газарые хубаагаа.

Бэньямиинэй обогой мэдэлэй газарнууд

11Түрүүшын жээрэб Бэньямиинэй обогой хүбүүдтэ угсаагаарнь унаа. Жээрэбэй ёһоор тэдээнэй хилэ Иудын обогой ба Иосифой обогой хоорондуур гараа.

12Тэдээнэй хилэ хойто таладаа Иорданай хажууда эхилээд, Ерихоондо дүтүүр хойгуурнь гараад, баруун тээшээ хада өөдэ аһана, тиигээд Бэт-Аавэн гэдэг элһэн губида дууһана. 13Тэндэһээ хилэ Лүүз тээшэ, ондоогоор Бэт-Ээл гэдэг Лүүзэй урда талада ошоно, тэндэһээ Атароот-Аддаар тээшэ, доодо Бэт-Һорооной урда байдаг хада тээшэ бууна.

14Тиигээд хилэ годиржо, Бэт-Һороон хадаһаа урагшаа далай тээшэ шэглэнэ. Иудын үри һадаһадай хото Кирьяат-Бааһалай, ондоогоор, Кирьяат-Еариимэй хажууда дууһана. Энэ баруун талын хилэ һэн.

15Урда талаараа Кирьяат-Еариимһээ хилэ далай тээшэ ошоно, Нэптооһаа гэдэг уһанай эхиндэ хүрэнэ. 16Тиигээд хилэ Һинноомой хүбүүнэй хүндын урда, Рэпаиимэй хүндыдэ байдаг үзүүр тээшэ уруудаад, хойшоо Һинноомой хүндыгөөр Евүүсэй урда талада буужа, Эн-Рогээл тээшэ бууна. 17Тиигээд хойноһоо годиржо, Эн-Шээмэш тээшэ, Адуммиимай үндэр нюруугай эсрэг байдаг Гелилоот тээшэ ошоно, тэндэһээ Рэүбээнэй хүбүүн Бооһанай шулуун тээшэ бууна. 18Тиигээд тэгшэ талын хажуугаар хойшоо ходоржо, тэгшэ тала тээшэ бууна; 19эндэһээ хилэ Бэт-Һоглаагай хажуугаар хойшоо ходоржо, Дабһата далайн хойто һэдэһэнэй хажууда, Иорданай урда эсэстэ дууһана. Энэ урда зүгэй хилэ һэн. Зүүн талаһаань Иордан хилэ болоно.

20Бэньямиинэй хүбүүдэй хубаари угсаагаараа хубаагдаһан бүхы талын хилэнүүдтэеэ иимэ.

21Бэньямиинэй хүбүүдэй обогой угсаатанай мэдэлдэ иимэ хотонууд байгаа: Ерихоон, Бэт-Һоглаа ба Ээмэк-Кэцииц, 22Бэт-Арабаа, Цэмарааим ба Бэт-Ээл, 23Аввиим, Параа ба Опраа, 24Хэпаар-Аммонии, Опнии ба Гээбэ: арбан хоёр хотонууд сэлеэнүүдтэеэ. 25Гибэһоон, Рамаа ба Бээроот, 26Мицпээ, Хэпираа ба Моцаа, 27Рээкэм, Ирпээл ба Таралаа, 28Цэлаа, Ээлэп ба Евүүс, ондоогоор Иерусалим, Гибаа ба Кирьяат: арбан дүрбэн хотонууд сэлеэнүүдтэеэ. Угсаагаарнь үгтэһэн Бэньямиинэй үри һадаһадай хубита энэ.