Jos 23 | BxrBBL2024 | STEP | Эзэнэй Израилиие бүхы талын дайсадһаань номгодхоһон, тэнигэр болгоһон хойно олон жэл үнгэрхэдэ Иисүүс хүгшэржэ, үндэр наһатай болоо.

‏ Joshua 23

Иисүүсэй хахасалгын үгэ

1 Эзэнэй Израилиие бүхы талын дайсадһаань номгодхоһон, тэнигэр болгоһон хойно олон жэл үнгэрхэдэ Иисүүс хүгшэржэ, үндэр наһатай болоо. 2 Тиигээд Иисүүс Израилиин бүхы хүбүүдые, тэдээнэй ахамадуудые, түшэмэлнүүдые, зарга шүүгшэдые, хинадаг дарганарые дуудаад:

– Би үбгэрөөб, үндэр наһатай болооб. 3 Эзэнэй, танай Бурханай танай урда дайлалдаһан арадуудыетнай таанар хараат, юуб гэхэдэ, Эзэн, танай Бурхан, Өөрөө танай урда дайлалдаа. 4 Тиигээд лэ би үндэһэн арадуудые жээрэбэй ёһоор танай хубита болгон хубаагааб, Иорданһаа наранһаа баруун тээшэ Агууехэ далай хүрэтэр усадхаһан бүхы арадуудаа танда хубаагааб. 5 Эзэн, танай Бурхан Өөрөө тэдээниие танһаа үлдэхэ, танай урда хюдан усадхаха, тиигэжэ Эзэн, танай Бурхан тэдээнэй газарые танай эдлэл болгон үгэхэ. 6 Тиимэһээ Моисейн Хуулиин номдо бэшэгдэһэниие тон зүбөөр хадагалжа сахихые оролдогты, баруун тээшэшье, зүүн тээшээшье бү хазагайрагты. 7 Танай урда үлэһэн тэдэ арадуудтай бү худхалдагты, тэдээнэй бурхадай нэрые бү дурдагты, тэдээгээр бү тангариглагты, тэдээндэ бү алба хэгты, һүгэдэн бү дохигты. 8 Зүгөөр мүнөө хүрэтэр тииһэн ёһоороо Эзэндэ, танай Бурханда няалдагты. 9 Эзэн агууехэ ба хүсэтэй арадуудые танһаа үлдөө, мүнөө хүрэтэр танай урда хэншье тэнсэжэ тэсээгүй. 10 Танай нэгэ хүн мянган хүниие үлдэнэ, юундэб гэхэдэ, Эзэн, танай Бурхан, Өөрөө танай түлөө дайлалдана гээ һэм. 11 Тиимэһээ Эзэндэ, танай Бурханда али болохоор дуратай байхые оролдогты. 12 Хэрбээ таанарай буруу хараад, танай дунда үлэһэн арадуудта халдаа һаатнай, тэдээнтэй түрэл болоо һаатнай, тэдээндэ ябадаг болоо һаатнай, тэдээнэй танда ябадаг болоо һаа, 13 Эзэн, танай Бурхан тэдэ арадуудые танһаа үлдэхэгүй, тэдэ танда бугуули ба губшуур болохо, танай хабһанда ташуур, нюдэндэтнай адаалхай үбһэн болохо, Эзэнэй, танай Бурханай танда үгэһэн газарһаа таанар усадхагдахат.

14 Мүнөө би бүхы газарай замаар ябахамни. Таанар бүхы зүрхөөрөө, бүхы сэдьхэлээрээ Эзэнэй, танай Бурханай тан тухай хэлэһэн нэгэшье һайн үгэ дэмы байгаагүй, танда бүхы юумэн бэелүүлэгдээ, бэелүүлэгдээгүй нэгэшье үгэ үлөөгүй гэжэ мэдэгты. 15 Танай толгой дээрэ Эзэнэй, танай Бурханай алибаа һайн үгэ яажа бэелүүлэгдээб, тэрээн шэнгеэр Эзэн танай толгой алибаа муу үгэ бэелүүлжэ шадаха. Эзэнэй, танай Бурханай танда үгэһэн энэ һайн газарһаа үгы болотортнай усадхаха. 16 Эзэнтэй, танай Бурхантай баталһан хэлсээгээ эбдээ һаатнай, Тэрэнэй захяа заабаринуудые сахяагүй һаатнай, ондоо бурхадта алба хэжэ, тэдээндэ мүргөө һаатнай, Эзэнэй уур хилэн танай тархида шатажа, Эзэнэй танда үгэһэн энэ һайн газарһаа таанар үгы болон арилхат.