‏ Joshua 24

Иисүүс ба Израилиин арад Шэхээмдэ

1Иисүүс Израилиин бүхы обогуудые Шэхээмдэ суглуулаад, Израилиин ахамадуудые, түшэмэлнүүдые, зарга шүүгшэдые, хинадаг дарганарые дуудаад, Эзэнэй урда жагсаагаа. 2Иисүүс арад зондо хандаа:

– Эзэн, Израилиин Бурхан иигэжэ хэлэнэ: «Эртэ урданһаа танай эсэгэнэр голой саана байгаа. Абраһаамай эсэгэ Тээраа, Нахоорой эсэгэ ондоо бурхадта албан хэдэг байгаа. 3Танай эсэгэ Абраһаамые Би голой саанаһаа абаад, Ханаһаанай бүхы газар дээгүүр ябуулааб, тэрээнэй үрые олон болгоод, Исаагые тэрээндэ үгөөб. 4Исаагта Яковые ба Эсаавые үгөөб. Эсаавта Сэһиирэй уула хайрлааб, теэд Яков ба тэрээнэй хүбүүд Египет руу ошоо. 5Би Моисейе ба Аһароониие эльгээгээд, Египедые гай зоболонгоор дайрааб, Египедтэ гай тодхор ушаруулааб; тиигээд таанарые гаргааб. 6Танай эсэгэнэрые Египедһээ гаргахадамни, таанар Хулһата далайда ерээт. Тиихэдэ Египедэй зон хоёр сахаригтай тэргээр, хазаар морёор танай эсэгэнэрые Хулһата далай хүрэтэр намнаа. 7Эсэгэнэртнай Эзэндэ хандан гуйгаа. Эзэн таанарай ба Египедэй зоной хоорондо шэб харанхые табяа, тэдээн тээшэ далай урадхуулхадань, уһан тэдээниие дараа. Египедтэ юу хэһыемни танай нюдэн хараа. Тиигээд удаан элһэн губида байгаат. 8Би таанадые Иорданай саана байһан эмооршуудай газарта асарааб. Тэдэ таанартай тулалдаа. Би тэдээниие танай гарта үгөөб, таанар тэдээнэй газарые эдлэл болгожо абаат. Би тэдээниие танай урда хюдааб. 9Моһаабай хаан, Циппоорой хүбүүн Балаак буһалгаатаад, Израилиин урдаһаа дайгаар ошоо. Тиигээд Бэһоорой хүбүүн Балаһаамые эльгээжэ, таанарта хараал хүртөөхыень уряалаа. 10Теэд Би Балаһаамай үгэ дуулаха дурагүй байгааб. Тэрэ таниие юрөөгөө. Би таанарые тэрээнэй гарһаа сүлөөлөөб. 11Таанар Иорданиие гаталаад, Ерихоондо ерээт. Ерихооной зон, эмооршууд, пэриззиинүүд, ханаһаанууд, хээдүүд, гиргаашууд, хиивүүд, евүүсүүд тантай дайлалдажа эхилээ, теэд Би тэдээниие танай гарта үгөөб. 12Би танай урда хорото зүгынүүдые эльгээгээб, тэдэ танһаа хоёр эмооршуудай хаашуулые үлдөө; танай һэлмээр, танай номоор энэ хэгдээ бэшэ. 13Танда Би газар үгөөб, тэрээн дээрэ таанар ажаллаагүйт, танай баряагүй хотонуудые үгөөб, тэдээн соо таанар һуунат, танай һуулгаагүй уһан үзэмэй, оливын сэсэрлигүүдһээ таанар жэмэсынь эдинэт».

14Эзэнһээ айгты, сэбэрээр, үнэн сэхээр Тэрээндэ алба хэгты. Голой саана Египедтэ танай эсэгэнэрэй алба хэһэн бурхадта бү шүтэгты, Эзэндэ алба хэгты. 15Эзэндэ шүтэхэ дурагүй һаа, хэндэ алба хэхэеэ мүнөө шэлэгты, голой саана ба Египедтэ танай эсэгэнэрэй алба хэһэн бурхадта алба хэхэ гүт, али танай һуужа байһан газарай арадай, эмооршуудай, бурхадта гү? Би, минии гэр бүлэ Эзэндэ алба хэхэбди.

16Арад зон харюудань иигэжэ хэлээ:

– Эзэниие орхижо, ондоо бурхадта бидэ алба хэхэгүйбди! 17Юундэб гэхэдэ, Эзэн болбол манай Бурхан мүн. Тэрэ бидэниие, манай эсэгэнэрые Египедһээ, богоолой гэрһээ гаргажа, хараһаар байтарнай агууехэ гайхамшагта хэрэгүүдые бүтээгээ, манай ябаһан бүхы замда, зүрэжэ гараһан бүхы арадуудай дунда маниие хаража ябаа. 18Эзэн манһаа бүхы арадуудые ба энэ газарта байһан эмооршуудые үлдөө. Тиимэһээ бидэ Эзэндэ алба хэхэбди, юундэб гэхэдэ, Тэрэ – манай Бурхан мүн.

19Иисүүс зондо хэлээ:

– Эзэндэ алба хэжэ шадахагүйт, юундэб гэхэдэ, Тэрэ – арюун Бурхан, хатуу сахилта Бурхан, хуули буса ябадалыетнай, нүгэлыетнай хүлисэхэгүй. 20Хэрбээ һайе хэжэ байһан Эзэниие таанарай орхижо, ондоо хариин бурхадта алба хэдэг болоо һаа, Тэрэ таанадһаа буруу хараха, муу юумэ таанадта шэглүүлжэ, усадхаха.

21Арад зон Иисүүстэ хэлээ:

– Бидэ Эзэндэ алба хэхэбди.

22Иисүүс зондо хандаа:

– Өөһэдөө Эзэниие һунгажа, Тэрээндэ алба хэхэбди гэжэ өөһэдыгөө гэршэлхэ гүт?

Зон:

– Гэршэлхэбди, – гэжэ харюусаа.

23– Тиигэбэл танда байһан хариин бурхадаа орхёод, сэдьхэл зүрхэеэ Эзэндэ, Израилиин Бурханда шэглүүлэгты.

24Зон Иисүүстэ хэлээ:

– Эзэндэ, манай Бурханда алба хэхэбди, Тэрээнэй үгэ дуулахабди.

25Тиигээд тэрэ үдэр Иисүүс арадай зүгһөө Эзэнтэй хэлсээ баталаа, Шэхээмдэ арад зондо тогтоолнуудые ба хуули тунхаглаа. 26Эдэ үгэнүүдые Иисүүс Бурханай һургаалай номдо бэшээд, томо шулуу абажа, тэрээнээ сарса модон доро табяа. Тэрэ шулуун Эзэнэй нангин газарай хажууда байдаг. 27Тиигээд Иисүүс бүхы арад зондо хэлээ:

– Энэ шулуун манда гэршэ болохо, юуб гэхэдэ, Эзэнэй манда хэлэһэн бүхы үгэнүүдые тэрэ дуулаа; Бурханайгаа урда танай худалаар хэлэбэлтнай, тэрэ таниие гэмнэһэн гэршэ болохо.

28Тиигээд Иисүүс арад зониие табяа, хүн бүхэн өөрынгөө хубита газарта ошоо.

29Энээнэй һүүлээр Нүүнэй хүбүүн, Эзэнэй богоол Иисүүс зуун арбан наһатайдаа наһа бараа. 30Тиигээд тэрээниие өөртэнь заяагдаһан хубаариин газарта, Эпрааимай хада дээрэ, Гааһаш хадаһаа хойшо байдаг Тимнаат-Сээраада хүдөөлүүлээ. 31Иисүүсэй амиды ябахада, мүн тэрэнэй наһанһаа нүгшэһэн хойно Эзэнэй Израильда юу бүтээһые хараһан ахамадуудай амиды мэндэ ябахада, Израиль бүхы үдэрнүүдтэ Эзэндэ һүгэдэн, Тэрээндэ алба хээ.

32Израилиин хүбүүдэй Египедһээ гаргаһан Иосифой яһыешье Шэхээмдэ, Шэхээмэй эсэгэ Хамоорой хүбүүдһээ Яковай зуун зоосоор худалдажа абаһан, һүүлдэ Иосифой хүбүүдтэ хубаари боложо хүртэһэн талбай газар дээрэ хүдөөлүүлээ.

33Тэрээнэй һүүлээр Аһарооной хүбүүн Эльазаар наһа бараа. Эпрааимай хада дээрэ тэрээндэ үгтэһэн, хожомынь тэрээнэй хүбүүндэ хүртэһэн Пинэһаасай нюруу дээрэ тэрээниие хүдөөлүүлээ.