Jos 3 | BxrBBL2024 | STEP | Иисүүс израильшуудтайгаа үглөөгүүр эртэ бодоод, Шиттиимһээ гаража, Иорданда ерэбэ. Тэдэ Иорданиие гаталангүй тэндээ хонобо.

‏ Joshua 3

Израиль угсаатан Иорданиие гаталба

1 Иисүүс израильшуудтайгаа үглөөгүүр эртэ бодоод, Шиттиимһээ гаража, Иорданда ерэбэ. Тэдэ Иорданиие гаталангүй тэндээ хонобо.

2 Гурба хоноод, ахамадууд зоной байһан газар эрьебэ. Тиигээд зондо зарлиг буулгаба:

3 – Танай Бурхан болохо Эзэнэй хэлсээнэй ханза, тэрээниие үргөөд ябаһан шажанай албатан левидүүдые харахадаа, байраһаа хүдэлжэ, хойноһоонь ябагты. 4 Танай ба Эзэнэй хоорондохи зай хоёр мянган тохой хүрэтэр хэмжүүртэй байха ёһотой; тэрээндэ бү дүтэлэгты. Тэрэ замаар ябаашьегүй һаа, тиигэжэ ябаха замаа мэдэхэт.

5 «Бэеэ арюудхагты, юуб гэхэдэ, үглөөдэр Эзэн танай дунда үзэгдөөгүй юумэ харуулха», – гэжэ Иисүүс зондо хэлэбэ.

6 Санаартанда Иисүүс иигэжэ хэлэбэ: – Хэлсээнэй ханза үргөөд, зоной урда ябагты.
Санаартан ханза үргөөд, зоной урда ябаба.

7 Тиихэдэнь Эзэн Иисүүстэ иигэжэ айладаба:

– Израилиин бүхы хүбүүдэй урда шамайе энэ үдэр алдаршуулан магтажа эхилхэб. Тиихэдэм Намайе Моисейтэй ябаһандал шамтай ябахань гэжэ тэдэ ойлгохо. 8 Ши хэлсээнэй ханза үргэжэ ябаһан санаартанда: «Иорданай уһан соо орон сасуу тогтогты», – гэжэ зарлиг буулга.

9 Иисүүс Израилиин хүбүүдтэ:

– Наашаа дүтэлөөд, Эзэнэй, танай Бурханай үгэ шагнагты, – гэжэ хэлэбэ.

10 Иисүүсэй хэлэһэниинь:

– Тэрэ үгэһөө танай дунда амиды Бурхан бии гэжэ мэдэхэт. Танда газар үгэхын тула Тэрэ ханаһаануудые, хээдүүдые, хиивүүдые, пэриззиинүүдые, гиргаашуудые, эмооршуудые, евүүсүүдые үлдэхэ. 11 Энэ бүхы газарай Эзэнэй хэлсээнэй ханза танай урда Иорданиие гаталха; 12 Израилиин обогуудһаа арбан хоёр хүниие, обог бүхэнэй нэгэ хүниие абагты. 13 Бүхы газарай Эзэнэй ханза үргэлжэ ябаһан санаартанай хүлэй һүеын Иорданай уһанда ороходо, Иорданай уһан хатаха, дээрэһээ урдаһан уһан хана болохо.

14 Тиигээд зоной Иорданиие гаталхаа майхангуудһаа хүдэлхэдэ санаартан хэлсээнэй ханза зоной урдуур үргэн гараба. 15 Хэлсээнэй ханза үргөөшэдэй Иорданда орожо, шажанай албатанай хүлнүүдэй уһанда нороходо (Иордан шэниисэ хадаха бүхы үдэрнүүдтэ эрьеһээ халижа байгаа), 16 дээрэһээ урдаһан уһан Царэтаанай хажуудахи Адаам хото хүрэтэр ехэ зайда хана болобо; талын далай, Дабһата далай руу урдаһан уһан шэргэн дууһаба. 17 Зон Ерихооной хажуугаар гаталба; Эзэнэй хэлсээнэй ханза үргэжэ ябаһан санаартан Иорданай тэг дунда хуурай газар дээрэ зогсожо байба. Израилиин хүбүүд хуурай газараар Иордан голые гаталба.