‏ Joshua 7

Ахаанай нүгэл ба хараал тухай

1Теэд Израилиин хүбүүд гэмтэ хэрэг хээ, Эзэндэ зорюулаатай юумэнһээ абаа. Иудын обогой Зээрахай Забдиин, тэрээнэй хүбүүн Хармиигай хүбүүн Ахаан хараалта юумэнһээ абаад, Эзэнэй уур хилэн Израилиин хүбүүдтэ буугаа.

2Ерихоонһоо Иисүүс Бэт-Ээлэй зүүн талада Бэт-Аавэн шадар байһан Һай руу хүнүүдые эльгээгээд, тэдээндэ:

– Ошоод газар харагты, – гэжэ хэлээ. Тэдэнь ошоод, Һай хотые хараа.

3Һөөргөө Иисүүстэ бусаад, тэдэ хэлээ:

– Бүхы зон тиишэ бү ошог, хоёр гурбан мянга тухай зон ошоод, Һай хотые эзэлэг; бүхы зониие тиишэ эльгээжэ бү зобоо, хотодо үсөөн зон байна.

4Тиигээд бүхы арадһаа гурбан мянга тухай зон тиишэ ошоо. Теэд тэдэ Һай хотын зонһоо тэрьелэн зугадаа. 5Һай хотынхид гушан зургаан хүниие алаад, хотынгоо хаалгаһаа Севарим хүрэтэр мүрдэн намнаа, тиигээд хадаһаа буухадань, бута сохёо. Тэрээнһээ арадай зүрхэн хайлаад, уһан шэнги болоо.

6Иисүүс хубсаһаа таһа татан уряад, Эзэнэй хэлсээнэй ханзын урда нюураараа газар мүргэн унаа, үдэшэ болотор хэбтээ. Иисүүс ба Израилиин аха захатан тархидаа үнэһэн тоборог адхаа.

7Иисүүс иигэжэ хэлээ:

– Түгэс хүсэтэ Эзэн! Юундэ Та энэ арадые Иордан гаталуулан гаргаабта? Маниие эмооршуудай гарта үгэжэ, усадхахын түлөө гү? Иорданай саана үлэхөө яагаабибди! 8Эзэн Бурхан! Израилиин дайсадтаа нюргаа харуулһан хойно би юун гэхэбиб? 9Ханаһаан оронойхид ба газар дэлхэйн бүхы зон дуулаад, манай нэрые газар дээрэһээ усадхахал. Тиихэдэнь Танай агууехэ нэрэ нэрлүүлхэдэ Та юу хэхэбта?

10Эзэн Иисүүстэ хэлээ:

– Бодо, юундэ ши нюураараа газар мүргэн хэбтээбши? 11Израиль нүгэл хээ, Минии тэдэндэ сахижа байхыень захирһан, Намтай баталһан хэлсээгээ эбдээ, Намда зорюулагдаһан юумэнһээ тэдэ хулуужа абаад, өөһэдынгөө юумэнэй дунда нюугаа. 12Тииһэнэй түлөө Израилиин хүбүүд дайсадайнгаа урда тэсэнгүй дайсадта нюргаа харуулаа, юуб гэхэдэ, тэдэ хараалда хүртөө; өөһэдынгөө дундаа хараалтые усадхаагүй һаатнай, таанадаар ябахагүйб. 13Бодо, арад зоноо арюудхаад, тэдээндэ хэлэ:

– Үглөөгүүр болотор нүгэлөө арюудхагты. Юундэб гэхэдэ, Эзэн, Израилиин Бурхан: «Израиль, хараалта юумэн дундашни байна; тиимэһээ хараалтые бэеһээ холодхоогүй сагтаа дайсадайнгаа урда тэсэхэгүйш», – гэнэ гэ.

14Үглөөдэр булта обогуудаараа ерэгты. Эзэнэй зааһан обог угуудаараа ерэг; Эзэнэй зааһан уг бүлэнүүдээрээ ерэг; Эзэнэй зааһан бүлэһөө нэгэ нэгэ хүн ерэг. 15Хараалда хүртэһэн юумэ хулуугаа гэжэ элирүүлэгдэһэн хүн хамаг юумэтэйгээ хамта галда шатаагдаха зэргэтэй; тэрэ хүн Эзэнтэй баталһан хэлсээгээ эбдээ, хуули буса ябадалаараа Израилиие бузарлаа.

16Иисүүс үглөөгүүр эртэ бодоод, Израилиие обог обогоорнь ерэхые захиржа, Иудын обог зааба. 17Тиигээд Иудын обогые угуудаараа ерэхынь захиржа, Зээрахай уг заагаа. Зээрахай угта бүлөөрөө ерэхынь захираад, Забдиин бүлэ заагаа. 18Бүлэдэ нэгэ нэгээрээ ерэхыень захираад, Зээрахай гуша, Забдиин аша, Хармиигай хүбүүн Ахааниие Иудын обогһоо заагаа.

19Тиигээд Иисүүс Ахаанда хэлээ:

– Хүбүүмни! Эзэндэ, Израилиин Бурханда алдар соло үгэ, Тэрээнэй урда сэхэеэ хэлэ, намһаа нюунгүй юу хэһэнээ намда соносхо.

20Харюудань Ахаан Иисүүстэ хэлээ:

– Зүб, би Эзэнэй урда, Израилиин Бурханай урда нүгэлтэйб, тиимэ юумэ хээб: 21олзын дунда нэгэ һайхан Шинаарай хубсаһа, хоёр зуун шээкэл мүнгэ, табин шээкэл жэнтэй монсогор алта харааб. Эдэ бүгэдые һайхашаагаад абааб; эдээниие майхан соогоо газарта булааб, мүнгэ доронь нюугааб.

22Иисүүсэй эльгээһэн хүнүүд майхандань гүйлдэжэ ошоод, нюуһан юумыень, доронь мүнгыень олоо. 23Эдэ бүгэдые майхан соонь олоод, Иисүүстэ, Израилиин бүхы хүбүүдтэ асараад, Эзэнэй урда табяа.

24Иисүүс ба тэрээнтэй бүхы израильшууд Зээрахай хүбүүн Ахааниие, мүнгэ, хубсаһа, монсогор алта, хүбүүд, басагад, сар, элжэгэ, хони, майхан, бүхы байһан юумыень абаад, Ахоор хүндыдэ гаргаа. 25Иисүүс иигэжэ хэлээ:

– Манда гай тодхор асарһанайш түлөө Эзэн энэ үдэр шамда тодхор ушаруулна.

Израильшууд тэрээниие шулуугаар шэдээд, бултыень шулуудажа шатаагаад, шулуу хаяжа булаа. 26Үндэр обоо шулуу дээрэнь хаяа. Тэрэ обоо мүнөөш хүрэтэр бии. Энээнэй һүүлээр Эзэнэй уур хилэн номгороо. Тиимэһээ тэрэ газарые мүнөөш хүрэтэр Ахоор хүнды гэдэг.