‏ Joshua 8

Израильшууд Һай хотые эзэлбэ

1Эзэн Иисүүстэ хэлээ:

– Бү ай, бү һүрдэ; дайлалдаха шадалтай бүхы зоноо абаад, Һай хото тээшэ ошо. Би Һай хотын хааниие, тэрээнэй арад зониие, тэрээнэй хотые, тэрээнэй газар шинии гарта үгэнэб. 2Һай хотые, тэрээнэй хааниие, Ерихоон хотые, тэрээнэй хааниие хэһээһэндээл адли хэһээ. Гансал олзыень малынь өөһэдтөө хубаагты, хотын ара талада һахюул сэрэг таби.

3Иисүүс, дайлалдаха шадалтай бүхы зон Һай тээшэ ошохо гэжэ бодобо. Иисүүс гушан мянган зоригтой зониие һунгаад, һүни тэдээниие эльгээбэ. 4Тэдээндэ захиралта үгөөд хэлээ:

– Таанар хотын ара талада һахюул сэрэг болохо ёһотойт; хотоһоо бү холодогты, булта бэлэн байгты. 5Намтай ябаһан бүхы зонтой хамта бидэ хотодо дүтэлэн ошохобди. Һай хотын зоной манай урдаһаа гарахада, урданайхидаал адли бидэ тэдээнһээ зугадахабди. 6Тэдэ манай хойноһоо дахан мүрдэхэ, бидэ тэдээниие хотоһоо һамааруулхабди; манай зугадахада тэдэ: «Урданайхидал адли манһаа зугадаба», – гэлдэхэ. 7Тиихэдэнь таанар отон хоргодоһон газарһаа бодоод, хотые эзэлхэт. Эзэн, танай Бурхан хотые танай гарта үгэхэ. 8Хотые абахадаа, тэрээниие галдахат. Эзэнэй үгөөр хэгты, би танда захиралта үгэнэб.

9Иигэжэ Иисүүсэй тэдээниие эльгээхэдэ, тэдэ отон хоргодохоо ошоод, Бэт-Ээл Һай хоёрой хоорондо Һай хотын баруун тээ хоргодоо; Иисүүс тэрэ һүни арад зоной дунда хоноо. 10Үглөөгүүр эртэ бодоод, Иисүүс арад зоноо хараа. Иисүүс ба Израилиин аха захашуул зоной урда Һай хото тээшэ ошоо. 11Дайлалдаха шадалтай зон, тэрээнтэй ябаһан зон Һай хотодо дүтэлэн ошоо. 12Һайн хойто талада зоноо тогтоон табяа. Хотын ба тэдээнэй хоорондо хүнды тала байгаа. Тиигээд табан мянган тухай зониие абаад, Бэт-Ээл Һай хоёрой хоорондо, хотын баруун талаһаа хоргодон отохынь табяа. 13Хотын хойно тогтон хоноһон зониие һүүлэйнь хотын баруун талаһаа байхаар табяа. Тиигээд тэрэ һүни Иисүүс хүндын тэг дунда гараа. 14Һай хотын хаан энээниие харахадаа, үглөөгүүр эртэ бодоод, хотынгоо зонтой Израилиин урдаһаа тэмсэхээ талын наана хэлсэһэн газартаа гараа. Хотын ара талада отоһон сэрэг бии гэжэ тэрэ мэдээгүй. 15Иисүүс ба бүхы Израиль диилдэһэн юумэдэл элһэн тала тээшэ гүйлдөө. 16Һай хотынхид хотодо байһан бүхы зониие мүрдэе гэжэ дуудаад, Иисүүсые намнан хотоһоо холо ошоо. 17Һайда, Бэт-Ээлдэ Израилиин хойноһоо намнаагүй нэгэш хүн үлөөгүй. Израилиие мүрдэн тэдэ хотоёо һула орхёо.

18Тиихэдэнь Эзэн Иисүүстэ хэлээ:

– Гартаа бариһан мэсэеэ хурсадха, Һай тээшэ ошо, Би тэрээниие шинии гарта үгэхэб.

Иисүүс гартаа бариһан мэсэеэ хурсадхаад, хото тээшэ ошоо. 19Отон хоргодоһон зон һууриһаа бодоод, Иисүүсэй гараа урагшань һарбайхада, хото руу орожо, тэрэ дары эзэлэн шатаагаа. 20Һай хотын зон гэдэргээ эрьеэд, хотын утаан тэнгэри өөдэ соробхилно гэжэ хараа. Хайшааш тэрьелхэ газар байгаагүй, юундэб гэхэдэ, элһэн тала руу гүйлдэжэ ябаһан зон мүрдэгшэдэйнгөө урдаһаа эрьеэ.

21Хоргодоод һууһан зон хотые эзэлээ, хотын утаан тэнгэри өөдэ соробхилно гэжэ харахадаа, Иисүүс ба бүхы Израиль һөөргөө тэхэрин, Һай хотын зониие хюдажа эхилээ. 22Һай хотынхид урдаһаань гарахадаа, хоёр талаһаа Израилиин зондо хашагдаа. Израильшууд нэгэш хүниие амиды үлөөн, зугадуулангүй хуу хюдаа. 23Һай хотын хааниие амидыгаар баряад, Иисүүстэ асараа.

24Израильшууд Һай хотын бүхы зониие хүндыдэ, элһэн губида мүрдэжэ нэгэш хүниие үлөөнгүй алаа. Тиигээд Һай тээшэ хандажа, мэсын хурса үзүүрээр хосороогоо. 25Тэрэ үдэр унаһан үбгэд һамгад, Һай хотын бүхы зон арбан хоёр мянга һэн. 26Иисүүс Һай хотын бүхы зониие хюдан унагаатараа һарбайһан мэсэтэй гараа һула табяагүй.

27Гансал малынь ба энэ хотын зөөриие Израилиин хүбүүд Эзэнэй Иисүүстэ хэлэһэн ёһоор хоорондоо хубаагаа. 28Иисүүс Һай хотые шатаажа, бутархай һандарал, элһэн губи болгоо.

29Һай хотын хааниие модондо үлгөө. Үдэшэ болотор хаан тэрэ модон дээрэ үлгөөтэй байгаа. Наранай ороходо Иисүүсэй захиралтаар модонһоо абаад, хотын ханын хаалгын хажууда хаяа, обоо шулуугаар булаа. Тэрэ обоонь мүнөөш хүрэтэр бии.

Иисүүс зондо Моисейн хуулиие уншаба

30Тиихэдэ Иисүүс Эбаал хада дээрэ Эзэндэ, Израилиин Бурханда үргэл эмхидхээ. 31Эзэнэй богоол Моисейн Израилиин хүбүүдтэ захиһан ёһоор, үргэлэй шэрээ хабтагар шулуунуудаар хээ, тэрээн дээрэ түмэр гаргадаггүй байгаа. Энээн тухай Моисейн хуулиин ном соо бэшээтэй. Үргэлэй шэрээ дээрэ Эзэндэ зорюулжа түгэс шатаалта үргэлнүүдые, амгалан байдалай түлөө үргэлнүүдые асараа.

32Тэндэ шулуун дээрэ Иисүүс Моисейн хуулиһаа сэг буулгажа, Израилиин хүбүүдэй урда бэшээ. 33Бүхы Израиль, тэрээнэй ахамадууд ба хинадаг дарганар, зарга шүүгшэд Эзэнэй хэлсээнэй ханза үргэһэн шажанай албатан левидүүдэй урда ерүүлшье, анханай байһаншье хоёр талаһаа зогсоо; нэгэ хахадынь Гэризиим хадын хажууда, нүгөө хахадынь Эбаал хадын хажууда урдань Эзэнэй богоол Моисейн захирһанай ёһоор Израилиин арадые үреэл хэшэгтээ хүртээхэеэ зогсоо. 34Тиигээд Иисүүс хуулиин бүхы үгэнүүдые, юрөөл хараалынь хуулиин номдо бэшэгдэһэнэй ёһоор уншаа. 35Моисейн Иисүүстэ орхиһон бүхы захяа сооһоо Израилиин бүхы суглаанай урда, һамгадайнь ба хүүгэдэйнь урда, тэдээнэй дунда байһан ерүүл зоной урда Иисүүсэй уншаагүй нэгэш үгэ үлөөгүй.