‏ Joshua 9

Иорданай саанахи хаашуул Израильтай дайлалдахаа бэлдэбэ

1Энээниие дуулахадаа Иорданай саанахи бүхы хаашуул, хададашье, таладашье, агууехэ далайн бүхы эрьеэр байһан хаашуул, Ливаанда, Хээдтэ, Эмоорто, Ханаһаанда, Пэриззиидэ, Хиивдэ ба Евүүстэ байһан хаашуул 2Иисүүстэй ба Израильтай эбтэй тэмсэхын тула булта сугларба.

3Зүгөөр Гибэһооной зон Ерихоон Һай хоёрые Иисүүсэй яаһые дуулаад, 4мэхэ гаргаба: харгыдаа эдихэ хилээмэ абаад, элжэгэнүүдтээ хуушан мүшөөгүүдые, хахархай халааһатай үзэмэй дараһан архиин туламуудые ашаад ошобо. 5Хүлэйнь гуталшье хуушан, халааһатай, хубсаһанииньшье хуушан үмхи, харгын хилээмэнииньшье хатанги, буританги байгаа. 6Тэдэ Гилгаалда Израилиин зоной тогтоһон газарта, Иисүүстэ ерээд:

– Ехэ холо газарһаа ерээбди, тиимэһээ мантай эб найрамдал тухай хэлсээ баталыт, – гэжэ хэлэбэ ха.

7Израилиинхин хиивүүдтэ хэлэбэ:

– Таанар манда дүтэ байнагүй гүт? Яажа тантай эб найрамдал тухай хэлсээ баталхабибди?

8Тэдэ Иисүүстэ хэлэбэ:

– Бидэ шинии богоолнуудбди.

Иисүүс тэдээндэ хэлэбэ:

– Хэд гээшэбта, хаанаһаа ерээбта?

9Тэдэ Иисүүстэ хэлэбэ:

– Ехэ холын газарһаа ерээбди. Эзэнэй һэшхэлдэ, шинии Бурханай һэшхэлдэ шинии богоолнууд болонобди. Тэрээнэй алдар тухай, Египедтэ Тэрээнэй юу хэһэн тухай дуулаабди. 10Иорданай саада талада байһан Эмоорой хоёр хаашуулда Хэшбооной хаан Сиһоондо, Аштароодто байһан Башаанай хаан Оогдо юу хэһыень дуулаабди. 11Иимэ юумэ дуулахадаа, манай үбгэн түрүүшүүл, манай газарай бүхы зон манда иигэжэ хэлээ:

– Харгыдаа хилээмэ абаад, урдаһаань ошожо, «Бидэ танай богоолнуудбди, мантай эб найрамдал тухай хэлсээ баталагты», – гэгты. 12Энэ хилээмэ танда ерэхээ харгыда гараһан үдэрөө халуун байхадань гэрһээ абаабди, мүнөө энэмнай хатажа буритаа. 13Энэ архиин туламуудта шэнэ үзэмэй дараһан архи хээ һэмди, мүнөө эдэмнай хахараа, гутал хубсаһамнайшье холын харгыда хуушараа.

14Израильшууд тэдээнэй хилээмынь абаад, Эзэнһээ һураагүй. 15Иисүүс тэдээнтэй эб найрамдал тухай хэлсээ баталаад, амин голытнай таһалхагүйб гэжэ тогтоол гаргаа. Олоной ударидагшад тиимэ тангариг үгөө.

16Эб найрамдал тухай хэлсээ баталһанай хойно гурба хоноод, тэдэ хүршэнэрнай, манһаа холо бэшэ байдаг гэжэ дуулаа. 17Яагаад бэ гэбэл, Израилиин хүбүүд харгыда гараад, гурбадахи хоногтоо тэдэнэй хотонуудта хүрөө. Тэдэнь Гибэһоон, Хэпираа, Бээроот ба Кирьяат-Еариим хотонууд һэн. 18Израилиин хүбүүд тэдээниие сохёогүй, юундэб гэхэдэ, олоной ударидагшад Эзэнэй, Израилиин Бурханай нэрээр тангариглаа. Энээнэй түлөө бүхы Израилиин зон дарганартаа голхорон гомдоо. 19Ударидагшад бүхы олондо хэлээ:

– Бидэ Эзэнэй, Израилиин Бурханай нэрээр тангариглаабди, тиимэһээ эдээнэй ойро хүрэхэ аргагүйбди. 20Манай үгэһэн тангаригай түлөө уур хилэндэ хүртэхэгүйн тула эдээниие амиды орхиё.

21Тиигээд ударидагшад хэлээ:

– Амиды байг, зүгөөр хамта олондо түлеэ хахалдаг, уһа удхадаг байха. Бүхы олон дарганарай хэлэһэн ёһоор болоо.

22Иисүүс тэдээниие дуудаад:

– Юунэй түлөө маниие мэхэлээбта, манда дүтэ байдаг аад, «ехэ холымди» гээбта? – гэжэ һураа.

23– Энээнэй түлөө хараалда хүртэбэт! Наһан соогоо богоол ябахат, минии Бурханай гэртэ түлеэ хахалхат, уһа удхахат, – гээ. 24Харюудань тэдэ хэлээ:

– Эзэн, шинии Бурхан таанарта бүхы газар үгэжэ, танай урда газар дээрэхи бүхы зониие усадхахынь өөрынгөө богоол Моисейдэ захираа гэһэн мэдээн богоолнуудайш шэхэндэ хүрөө, тиихэдэнь бидэ амиимнай таһалхань гэжэ ехээр айһандаа иимэ юумэ хээбди. 25Мүнөө шинии гарта байнабди: яажа һайнаар, гомдолгүйгөөр манда хандахаб гэжэ һананаш, тиижэл ханда.

26Иисүүс тэдэниие Израилиин хүбүүдэй гарһаа сүлөөлөө, израильшууд тэдээниие алаагүй. 27Тэрэ үдэр Иисүүс олондо ба Эзэнэй үргэлэй газарта түлеэ хахалхынь, уһа удхахынь томилоо; мүнөөш хүрэтэр тэдэ Эзэнэй һунгаһан үргэлэй газарта тиимэ ажал хэжэ байна.