‏ Joshua 2

Рахааб ба тагнуулшад

1Нүүнэй хүбүүн Иисүүс Шиттиимһээ хоёр тагнуулшые нюусаар эльгээгээд:

– Ошожо газараа, Ерихоониие харагты, – гэжэ захиба. Хоёр залуу хүбүүд Рахааб нэрэтэй залихай эмын гэртэ ерээд, тэндээ хонобо.

2Энэ һүни газар харахаа Израиль угсаатанһаа танигдаагүй хүнүүд ерээ гэжэ Ерихооной хаанда дуулгаба.

3Ерихооной хаан Рахаабда хүниие эльгээжэ: «Шамда ерэһэн, шинии гэртэ ороһон зониие гаргажа үгэ, тэдэш бүхы газарымнай харахаа ерээ», – гэжэ хэлүүлбэ.

4Тэрэ эхэнэр ерэһэн хоёр хүниие нюугаад:

– Ямаршьеб зон намда ерээ һэн, зүгөөр хаанахи зон байһынь мэдэнэгүйб. 5Харанхыда хашаагай үүдэ хааха сагай болоходо тэдэ гараад ошоо һэн, хайшаа ошоһынь мэдэнэгүйб, түргэн намнажа хүсэгты, – гэжэ хэлэбэ.

6Өөрөө тэдээниие хушалта дээрэ гаргаад, тэндэ дэлгээһэн дурһанай боолтонууд соо нюуба.

7Эльгээгдэһэн элшэд тэдээниие Иордан ошоһон харгыгаар гарса хүрэтэр мүрдэбэ. Намнагша нэхүүлэй гаран сасуу хашаагай үүдэ хааба.

8Унтахаа хэбтэхынь урда эхэнэр тэдээндэ гэрэй орой дээрэ гараба. 9Тэдээндэ иигэжэ хэлэбэ:

– Эзэнэй энэ газарые танда үгэһые мэдэнэб. Тиигээд таанар маниие һүрдөөн айлгаат, энэ газарта һуудаг бүхы зон танһаа һүрдэн шэшэржэ байна. 10Танай Египедһээ гаража ябахада, Эзэн танай урда Хулһата далайн уһа хатаагаа гэжэ дуулаа һэмди. Иорданай саанахи Эмоорой хоёр хаашуулые, Сиһоон Оог хоёрые яажа усадхаһытнайш дуулаа һэмди. 11Энээн тухай дуулахадаа, зүрхэмнай һулараа, танда эсэргүүсэхэ хэндэмнайш үгы болоо, юундэб гэхэдэ, Эзэн, танай Бурхан дээрэ тэнгэришье, доро газарташье захирна. 12Тиигээд Эзэнэй нэрээр намда тангариглагты: минии танда һайниие хэһэн ёһоор минии эсэгын гэртэ һайниие хэхээ хэлэгты. Намда найдамтай тэмдэг үгэгты, 13минии эсэгэ эхые, аха дүүем, эгэшэ дүүем, тэдээнэйдэ байһан бүхы зониие амиды үлөөхэбди, манай һүнэһые үхэлһөө абархабди гэгты.

14Тэдэ зон эхэнэртэ хэлэбэ:

– Манай энэ хэрэг элирүүлээгүй һаатнай, манай һүнэһэн танай орондо үхэлөө олог; Эзэнэй манда газар үгэхэдэ, бидэ шамда һайниие хэхэбди, үнэниие нээхэбди.

15Тиигээд эхэнэр сонхоороо мушхамалаар тэдэниие табяа, юундэб гэхэдэ, гэрынь хотын ханада баригдаһан тула тэдэ хана соо байгаа.

16– Мүрдэгшэдөөр уулзахагүйн тула хада өөдэ ошогты, мүрдэгшэдэй бусатар тэндээ гурбан хоног хоргодохот, бусаһан хойнонь харгыдаа гарахат, – гэжэ хэлээ.

17Тэдэ зон эхэнэртэ хэлэбэ:

– Иимэ юумэ хээгүй һаашни, манай тангаригһаа бидэ сүлөөрхэбди: 18энэ газарта манай ерэхэдэ, маниие табиһан сонходоо ши улайлгаһан мушхамал уяарай, тиигээд эсэгэ эхэеэ, аха дүүнэрээ, эсэгынгээ бүхы бүлые гэртээ суглуураарай. 19Хэрбээ шинии гэрэй үүдээр хэн нэгэн газаашаа гараа һаань, шуһан тэрэнэй толгойдо тудаха, бидэ шинии жадха тангаригһаа сүлөөрхэбди, шинии гэртэ шамтай хүнэй байгаа һаа, тэрээндэ ондоо хүнэй гарай хүрөө һаа, тэрэнэй шуһан манай толгойдо тудаха; 20хэрбээ манай энэ хэрэг нээгээ һааш, тэрэ тангаригһаа баһал сүлөөрхэбди.

21Эхэнэр:

– Танай үгын ёһоор болог, – гээд, тэдээниие табиба. Тэдэнэй саашаа ошоходо, эхэнэр сонходоо улаан мушхамал уяба.

22Тэдэ ошожо, хада дээрэ гараад, нэхүүлэй бусатар тэндээ гурбан үдэр байба. Нэхүүл тэдээниие бүхы харгыгаар бэдэрээд олоогүй. 23Тиигээд тэдэ хоёр хүнүүд гэдэргээ бусаад, хадаһаа буужа, Иорданиие гаталаад, Нүүнэй хүбүүн Иисүүстэ ерэжэ, бүхы ябадалаа хөөрэбэд.

24Тэдэ Иисүүстэ хэлэбэ:

– Эзэн тэрэ бүхы газарые манай гарта үгөө, тэндэхи бүхы зон манһаа айжа һүрдэжэ байна.