Jos 21 | BxrBBL2024 | STEP | Левидүүдэй обогой дарганар шажанай албатан Эльазаарта, Нүүнэй хүбүүн Иисүүстэ, Израилиин удамаршадта ерээд,

‏ Joshua 21

Левидүүдтэ үгтэһэн хотонууд

1 Левидүүдэй обогой дарганар шажанай албатан Эльазаарта, Нүүнэй хүбүүн Иисүүстэ, Израилиин удамаршадта ерээд, 2 Шилоодо, Ханаһаанай газар дээрэ, иигэжэ хэлээ:

– Эзэн Моисейгээр дамжуулжа, манай һууха хотонуудые, малаа бариха шадарай газар үгэхэ гээ.

3 Тиигээд Израилиин хүбүүд Эзэнэй зарлигаар өөһэдынгөө хубаариһаа левидүүдтэ иимэ хотонуудые шадар газартайнь үгөө.

4 Кэһаадай угсаатанда жээрэб буулгаа; шажанай албата Аһарооной үри һадаһад байһан левидүүдтэ Иудын обогһоо, Симеоной обогһоо, Бэньямиинэй обогһоо жээрэбээр арбан гурбан хотонууд тудаа. 5 Кэһаадай бэшэ хүбүүдтэ Эпрааимай обогой угсаатанһаа, Даанай обогһоо, Мэнашшээгэй обогой хахадһаа жээрэбээр арбан хотонууд тудаа. 6 Гэршооной хүбүүдтэ Иссахаарай обогой угсаатанһаа, Ашээрэй обогһоо, Напталиигай обогһоо, Мэнашшээгэй обогой хахадһаа Башаанда жээрэбээр арбан гурбан хотонууд тудаа. 7 Мэрариин үри һадаһадта тэдээнэй угсаагаар Рэүбээнэй, Гаадай ба Зэбүлүүнэй обогуудһаа арбан хоёр хотонууд тудаа.

8 Тиигээд Израилиин хүбүүд Эзэнэй Моисейгээр дамжуулжа захиһан ёһоор левидүүдтэ энэ хотонуудые шадар газартайнь үгөө.

9 Иудын хүбүүдэй обогһоо, Симеоной хүбүүдэй обогһоо эндэ нэрээрнь нэрлэһэн хотонуудые үгөө: 10 жээрэбынь түрүүлэн бууһан ушарһаа Кэһаадай угсаатанһаа, Левиин хүбүүдһээ Аһарооной хүбүүдтэ 11 Иудын хада дээрэ оршоһон Кирьяат-Арбаае, ондоогоор Хэброониие, тойроод байһан шадар газарынь үгөө (Арба болбол Анаагай эсэгэнь һэн); 12 энэ хотын талбай, оршон тойроһон тосхонуудынь Епуннээгэй хүбүүн Халээбтэ үмсэ болгожо үгөө.

13 Иигэжэ шажанай албатан Аһарооной хүбүүдтэ алууршын хорохо шэбээ хото Хэброониие ба шадарынь, Либнаае ба шадар газарынь, 14 Яттиирые ба шадар газарынь, Эштэмооһае ба шадар газарынь, 15 Холоониие ба шадар газарынь, Дэбиирые ба шадар газарынь, 16 Ааиниие ба шадар газарынь, Юттаае ба шадар газарынь, Бэт-Шээмэшые ба шадар газарынь: хоёр обогһоо юһэн хотонуудые үгөө. 17 Бэньямиинэй обогһоо Гибэһоониие ба шадар газарынь, Гээбые ба шадар газарынь, 18 Анатоодые ба шадар газарынь, Алмоониие ба шадар газарынь, хамтадаа дүрбэн хото үгөө.

19 Бүхы дээрээ Аһарооной хүбүүдтэ, шажанай албатанда, арбан гурбан хото шадар газартаяа үгтөө.

20 Кэһаадай хүбүүдэй угсаатанда, левидүүдтэ, Кэһаадай бэшэшье хүбүүдтэ жээрэбэй ёһоор Эпрааимай обогһоо хотонууд тудаа. 21 Тэдээндэ алууршанай хорохо шэбээ хото Шэхээмые ба шадар газарынь Эпрааимай хада дээрэ, Гээзэрые ба шадар газарынь, 22 Кибцааимые ба шадар газарынь, Бэт-Һороониие ба шадар газарынь: дүрбэн хотонуудые үгөө.

23 Даанай обогһоо Элтэкээе ба шадар газарынь, Гиббэтоониие ба шадар газарынь, 24 Аялоониие ба шадар газарынь, Гаат-Риммоониие ба шадар газарынь: дүрбэн хотонуудые үгөө.

25 Мэнашшээгэй обогой хахадһаа Таанаахые ба шадар газарынь, Гаат-Риммоониие ба шадар газарынь: хоёр хотые үгөө.

26 Кэһаадай хүбүүдэй бэшэ угсаатанда бүхы дээрээ арбан хотонууд шадар газартаяа үгтөө.

27 Гэршооной хүбүүдтэ, левиин угсаатанай, Мэнашшээгэй обогой хахадһаа алууршын хорохо шэбээ – Башаанай Голаан хотые шадар газартайнь ба Бээштэраае шадар газартайнь: хоёр хото үгөө.

28 Иссахаарай обогһоо Кишиһоониие ба шадар газарынь, Дабэраатые ба шадар газарынь, 29 Ярмуудые ба шадар газарынь, Эн-Ганниимые ба шадар газарынь: дүрбэн хото үгөө.

30 Ашээрэй обогһоо Мишаалые ба шадар газарынь, Абдооние ба шадар газарынь, 31 Хэлкаадые ба шадар газарынь, Рэһообые ба шадар газарынь: дүрбэн хото үгөө.

32 Напталиигай обогһоо алууршын хорохо шэбээ хотые – Галилейн Кээдэшые ба шадар газарынь, Хаммоот-Доорые ба шадар газарынь, Картааные ба шадар газарынь: гурбан хотые үгөө.

33 Гэршооной хүбүүдтэ изагуураарнь бүхы дээрээ арбан гурбан хотонууд шадар газартаяа үгтөө.

34 Мэрариин хүбүүдэй изагуурнуудта, бэшэ левидүүдтэ Зэбүлүүнэй обогһоо Ёкнэһаамые ба шадар газарынь, Картаае ба шадар газарынь, 35 Димнаае ба шадар газарынь, Наһалаалые ба шадар газарынь: дүрбэн хотые үгөө.

36 Рэүбээнэй обогһоо Бээцэрые ба шадар газарынь, Яаһцаае ба шадар газарынь, 37 Кэдэмоотые ба шадар газарынь, Мэпаадые ба шадар газарынь: дүрбэн хото үгөө.

38 Гаадай обогһоо алууршанай хорохо шэбээ хотонуудые – Галаадай Рамоотые шадар газартайнь, Маханааимые шадар газартайнь, 39 Хэшбоониие шадар газартайнь, Язээрые шадар газартайнь: дүрбэн хото үгөө.

40 Мэрариин хүбүүдтэ изагуураарнь, левидэй бэшэ изагууртанда бүхы дээрээ жээрэбээр арбан хоёр хото тудаа.

41 Израилиин хүбүүдэй мэдэлэй газарта левидүүдтэ бүхыдөө дүшэн найман хотонууд шадар газартаяа байгаа. 42 Хото бүхэнэй дэргэдэ тойроод шадар газар байгаа.

Эзэнэй үгэ дүүргэгдөө: заяата газар эзэлэгдээ

43 Иигэжэ Эзэн эсэгэнэртэнь үгэхэб гэжэ тангариглаһан бүхы газараа Израильда үгөө. Тэдэ газарые үеһөө үедэ орохо эдлэл болгон абаад, дээрэнь һуурижаа.

44 Эсэгэнэртэнь тангариглаһан ёһоороо бүхы талаһаань амгалан байдал Эзэн тогтоогоо; дайсадайнь хэнииньшье тэдэнэй урда тэсээгүй, бүхы дайсадые Эзэн тэдээнэй гарта үгөө.

45 Израилиин гэртэ Эзэнэй хэлэһэн бүхы һайн үгэнүүдһээ нэгэшье үгэ дүүргэгдөөгүй үлөөгүй, хамаг юумэн хүсэлдөө.